୫ ବର୍ଷରେ ଚାକିରି ହରାଇଛନ୍ତି ୨ କୋଟି ପୁରୁଷ

ନୂଆଦିଲ୍ଲୀ,୨୩ା୩(ଏଜେନ୍ସି):୨୦୧୧-୧୨ରୁ ୨୦୧୭-୧୮ ମଧ୍ୟରେ ପ୍ରାୟ ୨ କୋଟି ପୁରୁଷ ଚାକିରି ହରାଇଛନ୍ତି । ଜାତୀୟ ନମୂନା ସର୍ବେକ୍ଷଣ କାର୍ଯ୍ୟାଳୟ (ଏନ୍‌ଏସ୍‌ଏସ୍‌ଓ) ରିପୋର୍ଟରୁ ଏହା ଜଣାଯାଇଛି । ଏହି ରିପୋର୍ଟକୁ କେନ୍ଦ୍ର ସରକାର ଚପାଇ ରଖିଥିବା ପୂର୍ବରୁ ଅଭିଯୋଗ ହୋଇଥିଲା । ସର୍ବସାଧାରଣରେ ପ୍ରକାଶ ପାଇବାକୁ ଥିବା ଏନ୍‌ଏସ୍‌ଏସ୍‌ଓ ରିପୋର୍ଟ ୨୦୧୭-୧୮ ଅନୁସାରେ ୨୦୧୧-୧୨ରେ ଦେଶରେ ୩୦.୪ କୋଟି ପୁରୁଷ ଚାକିରି କରୁଥିଲେ । ୨୦୧୭-୧୮ରେ ଏହି ସଂଖ୍ୟା ୨୮.୬ କୋଟିକୁ ଖସି ଆସିଥିବା ରିପୋର୍ଟରେ ଦର୍ଶାଯାଇଛି । ୧୯୯୩-୯୪ରୁ ପ୍ରଥମ ଥର ପାଇଁ ପୁରୁଷ ଶ୍ରମବଳରେ ହ୍ରାସ ଘଟିଛି । ଉକ୍ତ ସମୟରେ ଦେଶର ମାନବସମ୍ବଳରେ ପୁରୁଷଙ୍କ ସଂଖ୍ୟା ୨୧.୯ କୋଟି ଥିଲା । ୨୦୧୧-୧୨ରେ ଏହି ସଂଖ୍ୟା ୩୦.୪ କୋଟିକୁ ବଢ଼ିଥିଲା । କିନ୍ତୁ ୨୦୧୭-୧୮ରେ ଏହା ୨୮.୬ କୋଟିକୁ ହ୍ରାସ ପାଇଥିବା ରିପୋର୍ଟରେ ଉଲ୍ଲେଖ କରାଯାଇଛି । ସହରାଞ୍ଚଳ ଏବଂ ଗ୍ରାମାଞ୍ଚଳରେ ପୁରୁଷ ବେକାରି ହାର ଯଥାକ୍ରମେ ୭.୧% ଏବଂ ୫.୮% ରହିଥିବା
ଏଥିରେ ପ୍ରକାଶ କରାଯାଇଛି । ସୂଚନାଯୋଗ୍ୟ, ଏହି ରିପୋର୍ଟକୁ ଜାତୀୟ ପରିସଂଖ୍ୟାନ ଆୟୋଗ (ଏନ୍‌ଏସ୍‌ସି) ପକ୍ଷରୁ ୨୦୧୮ ଡିସେମ୍ବରରେ ମଞ୍ଜୁରି ଦିଆଯାଇଥିଲା ।

କିନ୍ତୁ ସରକାର ଏହାକୁ ପ୍ରକାଶ ନ କରି ଚପାଇ ରଖିବାରୁ ଏନ୍‌ଏସ୍‌ସି ଅଧ୍ୟକ୍ଷ ପି. ସି. ମୋହନନ୍‌ଙ୍କ ସମେତ ପ୍ରମୁଖ ଅଧିକାରୀମାନେ ଜାନୁଆରୀରେ ଇସ୍ତଫା ଦେଇଛନ୍ତି । ଏନ୍‌ଏସ୍‌ଏସ୍‌ଓ ରିପୋର୍ଟରେ ଆହୁରି ମଧ୍ୟ ଉଲ୍ଲେଖ କରାଯାଇଛି ଯେ, ଗ୍ରାମାଞ୍ଚଳରେ ଅନୌପଚାରିକ କ୍ଷେତ୍ରରେ କାର୍ଯ୍ୟ କରୁଥିବା ଶ୍ରମିକଙ୍କ ସଂଖ୍ୟାରେ ମଧ୍ୟ ହ୍ରାସ ଘଟିଛି । ୨୦୧୧-୧୨ରେ ଏହି ସଂଖ୍ୟା ୧୦.୯ କୋଟି ଥିଲା । ୨୦୧୭-୧୮ରେ ଏହା ୭.୭ କୋଟିକୁ ହ୍ରାସ ପାଇଛି । ୫ ବର୍ଷରେ ଏଥିରେ ୩୦% ହ୍ରାସ ଘଟିଛି । ଗ୍ରାମୀଣ କୃଷି କ୍ଷେତ୍ରରେ କାର୍ଯ୍ୟ କରୁଥିବା ଅନୌପଚାରିକ ଶ୍ରମିକ ପରିବାର ସଂଖ୍ୟାରେ ମଧ୍ୟ ହ୍ରାସ ଘଟିଛି । ୫ ବର୍ଷ ମଧ୍ୟରେ ଏହା ୩.୬ କୋଟିରୁ ୨.୧ କୋଟିକୁ ହ୍ରାସ ପାଇଛି । ଯଦିଓ ସରକାର ରିପୋର୍ଟରେ କୌଣସି ପ୍ରକାର ରାଜନୈତିକ ପ୍ରଭାବ ରହି ନ ଥିବା କହୁଛନ୍ତି ତଥାପି ବିଶ୍ୱର ବିଭିନ୍ନ କୋଣରୁ ୧୦୮ ଜଣ ଅର୍ଥନୀତିଜ୍ଞ ଏହା ଉପରେ ଆପତ୍ତି ଦର୍ଶାଇଛନ୍ତି । ସରକାର ରିପୋର୍ଟରେ ଥିବା ତଥ୍ୟଗୁଡିକୁ ସଂଶୋଧନ କରିଦେଉଥିବାବେଳେ ଅନେକ ତଥ୍ୟକୁ ଲୁଚାଇ ଦେଉଥିବା ଏମାନେ ଅଭିଯୋଗ କରୁଛନ୍ତି । ସରକାରଙ୍କ ପ୍ରଦର୍ଶନ ଉପରେ ପ୍ରଶ୍ନବାଚୀ ସୃଷ୍ଟି କରୁଥିବା ତଥ୍ୟଗୁଡିକୁ ହଟାଇ ଦିଆଯାଉଥିବା ଏମାନେ କହିଛନ୍ତି ।

   ସମ୍ବନ୍ଧିତ ଖବର


ମାନସିକ ଅବସାଦ ଅର୍ଥ ନୁହେଁ ପାଗଳାମି, ଅପରାଧ ପାଇଁ ମିଳିବ ଦଣ୍ଡ

ଲଭ ଜିହାଦକାରୀଙ୍କୁ ଯୋଗୀ ରୋକଠୋକ୍‌ ଶୁଣାଇଲେ ରାମ ନାମ ସତ୍ୟ ହୈ…ସୁଧୁରି ନଗଲେ ହୋଇଯିବ ଶେଷ

ଭାରତୀୟ ସେନା ପ୍ରସ୍ତୁତ କରିଛି ସ୍ୱଦେଶୀ ଆଣ୍ଡ୍ରଏଡ୍‌ ମେସେଜିଂ ଆପ୍‌ ‘ସାଇ’

ହଲିଉଡର ଭେଟରାନ ଅଭିନେତା ସିନ୍‌ କନେରିଙ୍କ ପରଲୋକ, ୭ଟି ଫିଲ୍ମରେ ଜେମ୍ସ ବଣ୍ଡ ଭୂମିକାରେ କରିଥିଲେ ଅଭିନୟ

ଯଦି ଭଗବାନ ବି ମୁଖ୍ୟମନ୍ତ୍ରୀ ହୋଇଯାଆନ୍ତି ତେବେ ୧୦୦ ପ୍ରତିଶତ ଚାକିରି ଦେବାରେ ବିଫଳ ହେବେ: ଗୋଆ ମୁଖ୍ୟମନ୍ତ୍ରୀ

ନଭେମ୍ବରରେ ଏତେ ଦିନ ବନ୍ଦ ରହିବ ବ୍ୟାଙ୍କ, ତା ପୂର୍ବରୁ କରି ନିଅନ୍ତୁ ଜରୁରୀ କାମ