ନୂଆଦିଲ୍ଲୀ ୧୬/୦୫: ଗୋଟିଏ କିମ୍ବା ଦୁଇଟି ବିଶ୍ୱବିଦ୍ୟାଳୟରୁ ଅଧ୍ୟୟନ ଅଫର୍‌ ଆସିଲେ ବିଦ୍ୟାର୍ଥୀଙ୍କ ଖୁସି ବଢ଼ିଯାଏ । ଆମେରିକାର ଜଣେ ବିଦ୍ୟାର୍ଥୀଙ୍କୁ ୨୩୧ ବିଶ୍ୱବିଦ୍ୟାଳୟରୁ ଅଧ୍ୟୟନ ଲାଗି ଅଫର୍‌ ଆସିଛି । ସେତିକି ନୁହେଁ, ପ୍ରାୟ ୧୨୨ କୋଟି ଟଙ୍କାର ସ୍କଲାରସିପ୍‌ ଅଫର୍‌ ମଧ୍ୟ ମିଳିଛି । ଏହି ଭାଗ୍ୟଶାଳୀ ଛାତ୍ରୀ ହେଉଛନ୍ତି ଜର୍ଜିଆ ବାସିନ୍ଦା ୧୮ ବର୍ଷୀୟା ମାଡିସନ୍‌ କ୍ରୋୱେଲ । ୨୩୧ ବିଶ୍ୱବିଦ୍ୟାଳୟ ମଧ୍ୟରୁ ଅଧ୍ୟୟନ ଲାଗି ସେ ନର୍ଥ କାରୋଲିନାର ହାଇ ପଏଣ୍ଟ୍‌ ୟୁନିଭର୍ସିଟିକୁ ଚୟନ କରିଛନ୍ତି । 

କ୍ରୋୱେଲ ଆସନ୍ତା ୧୮ ତାରିଖରେ ଲିବର୍ଟି କାଉଣ୍ଟି ହାଇସ୍କୁଲ୍‌ରୁ ସ୍ନାତକ ଡିଗ୍ରୀ ହାସଲ କରିବେ । ଆଗକୁ ଅଧ୍ୟୟନ ଲାଗି ସେ ଶତାଧିକ ଆମେରିକୀୟ ବିଶ୍ୱବିଦ୍ୟାଳୟରେ ଆବେଦନ କରିଥିଲେ । ତନ୍ମଧ୍ୟରୁ ୨୩୧ ବିଶ୍ୱବିଦ୍ୟାଳୟ ତାଙ୍କ ଆବେଦନ ସ୍ୱୀକାର କଲେ । ହାଇ ପଏଣ୍ଟ୍‌ ବିଶ୍ୱବିଦ୍ୟାଳୟ ଚୟନକୁ ସେ ନିଜର ସବୁଠୁ ଭଲ ନିଷ୍ପତ୍ତି ବୋଲି କହିଛନ୍ତି । ସେଠାରେ ସେ ଫିଜିକାଲ ଥେରାପିରେ ଡାକ୍ତରୀ ଅଧ୍ୟୟନ କରିବେ । କ୍ରୋୱେଲ ଏହି ସଫଳତା ଜରିଆରେ ଲିବର୍ଟି କାଉଣ୍ଟିର ପିଲାଙ୍କୁ କହିବାକୁ ଚାହୁଁଛନ୍ତି ଯେ ଯେଉଁ ପ୍ରତିଷ୍ଠାନରେ ପ୍ରବେଶ ଅସମ୍ଭବ ବୋଲି ସେମାନଙ୍କ ଧାରଣା, ପରିଶ୍ରମ ଦ୍ୱାରା ସେଠାରେ ମଧ୍ୟ ପହଞ୍ଚିପାରିବେ । 

ଲିବର୍ଟି କାଉଣ୍ଟି ଆମେରିକାର ଅନ୍ୟତମ ସବୁଠୁ ଗରିବ କାଉଣ୍ଟି । ସେଠାରେ ରହୁଥିବା ୬୯୦୦୦ ଲୋକଙ୍କ ମଧ୍ୟରେ ପ୍ରାୟ ୧୪ ପ୍ରତିଶତ ଗରିବ ସୀମାରେଖା ତଳେ ଅଛନ୍ତି । କ୍ରୋୱେଲ ମିଡିଲ ସ୍କୁଲ୍‌ରେ ପଢ଼ିବା ବେଳଠୁ ତାଙ୍କ ମା’ବାପା ତାଙ୍କୁ କଲେଜ ପଠାଇବାକୁ ପ୍ରସ୍ତୁତି ଚଳାଇଥିଲେ । ଅନେକ ସମୟରେ ସେମାନେ ୟୁନିଭର୍ସିଟି କ୍ୟାମ୍ପସ୍‌କୁ ମଧ୍ୟ ଯାଉଥିଲେ । ଆମେରିକାରେ ବିଦ୍ୟାର୍ଥୀମାନେ ବିଶ୍ୱବିଦ୍ୟାଳୟରେ ଅଧ୍ୟୟନ ଲାଗି ବିଶେଷକରି ସ୍କଲାରସିପ୍‌ ଉପରେ ନିର୍ଭର କରନ୍ତି । ଏଥିପାଇଁ ସେମାନେ ଶତାଧିକ ବିଶ୍ୱବିଦ୍ୟାଳୟରେ ସ୍କଲାରସିପ୍‌ ପାଇଁ ଆବେଦନ କରନ୍ତି । ବିଶ୍ୱବିଦ୍ୟାଳୟ ପକ୍ଷରୁ ସେମାନଙ୍କ ପାଠ୍ୟକ୍ରମ ଅନୁସାରେ ସ୍କଲାରସିପ୍‌ ପ୍ରଦାନ କରାଯାଏ । ଏଥିରୁ ବିଦ୍ୟାର୍ଥୀ ନିଜ ପସନ୍ଦର ବିଶ୍ୱବିଦ୍ୟାଳୟ ଚୟନ କରନ୍ତି ।