ମାଲକାନଗିରି, ୨୪/୦୪ : ନିର୍ବାଚନ ପାଇଁ ଲାଗୁ ହୋଇଛି ଆଦର୍ଶ ଆଚରଣ ବିଧି। ଏହି ସମୟରେ ମାଲକାନଗିରି ଜିଲ୍ଲାରୁ ଜବତ ହୋଇଛି ନଗଦ ୩୦ ଲକ୍ଷ ଟଙ୍କା। ଏହା ସହ ୨ ଜଣ ବ୍ୟବସାୟୀଙ୍କୁ ଗିରଫ କରିଛି ପୋଲିସ।
ସୂଚନାନୁଯାୟୀ, ମାଲକାନଗିରି ଜିଲ୍ଲାର ଦୁଇ ଜଣ ପ୍ରତିଷ୍ଠିତ ବ୍ୟବସାୟୀ ହେମନ୍ତ ପଟ୍ଟନାୟକ ଓ ପାଲ୍ ସ୍ୱାମୀ ୩୦ ଲକ୍ଷ ଟଙ୍କା ନେଇ ମାଲକାନଗିରିରୁ ସୁକୁମା ରାସ୍ତାରେ ଯାଉଥିଲେ। ଏହି ସମୟରେ ଚାଲାଣଗୁଡା ପୋଲିସ ଚେକ୍ ପୋଷ୍ଟରେ ଫ୍ଲାଇଇଂ ସ୍କ୍ଵାଡ ଏହାକୁ ଜବତ କରିଛି । ଏହା ସହ ୨ ଜଣଙ୍କୁ ଗିରଫ କରି ମାଲକାନଗିରି ଆଦର୍ଶ ଥାନା ପୋଲିସକୁ ହସ୍ତାନ୍ତର କରିଛି। ତେବେ ଏତେ ବଡ ସଂଖ୍ୟକ ନଗଦ ଟଙ୍କା ନେଇ ଦୁଇ ଜଣ ବ୍ୟକ୍ତି କୁଆଡେ ଯାଉଥିଲେ ତାହାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ଏହି ଟଙ୍କା କୌଣସି ନିର୍ବାଚନୀ ପ୍ରଚାର ଲାଗି ନିଆ ଯାଉଥିଲା କି ନାହିଁ ତାହା ବର୍ତ୍ତମାନ ସୁଦ୍ଧା ଜଣା ପଡିନାହିଁ। ଆଦର୍ଶ ଥାନା ପୋଲିସ ଘଟଣାର ତଦନ୍ତ ଜାରି ରଖିଥିବା ବେଳେ ଆୟକର ବିଭାଗକୁ ଏହାର ଛାନଭିନ୍ କରିବା ଲାଗି ଉପଜିଲ୍ଲାପାଳ ଜଣାଇଛନ୍ତି।