ଭୁବନେଶ୍ୱର : ବରମୁଣ୍ଡା ବସ୍ଷ୍ଟାଣ୍ଡରୁ ଏକ ଅଖାରେ ୩୦ ଲକ୍ଷ ଟଙ୍କା ନେଉଥିବା ଜଣେ ଯୁବକକୁ ଉଠାଇ ନେଇଛି ଖଣ୍ଡଗିରି ଥାନା ପୁଲିସ୍ । ଯୁବକ ଜଣକ ହେଉଛନ୍ତି ଯାଜପୁର ଛତିଆ ଅଞ୍ଚଳର ମହାବୀର ପ୍ରସାଦ ଦାସ । ତେବେ ଏତେ ପରିମାଣର ଟଙ୍କା କେଉଁଠୁ ଆଣିଲେ, କାହାକୁ ଦେଇଥାନ୍ତେ? ଏନେଇ ପୁଲିସ ତନାଘନା ଚଳାଇଛି । ପାରଳାଖେମୁଣ୍ଡିରୁ ବସ୍ ଯୋଗେ ମହାବୀର ଟଙ୍କା ଭର୍ତ୍ତି ବ୍ୟାଗ୍ ନେଇ ବରମୁଣ୍ଡା ବସ୍ଷ୍ଟାଣ୍ଡକୁ ଆସିଥିଲେ ।
ପେଟ୍ରୋଲ ଟାଙ୍କି ପାଖରେ ବ୍ୟାଗ୍ରେ ଟଙ୍କା ରଖି ଅନ୍ୟ ଗାଡ଼ିକୁ ଅପେକ୍ଷା କରିଥିବା ନେଇ ପୁଲିସକୁ ସୂଚନା ମିଳିଥିଲା । ପୁଲିସ ସେଠାରୁ ତାଙ୍କୁ ଅଖା ଭର୍ତ୍ତି ଟଙ୍କା ସହ ଥାନାକୁ ଉଠାଇ ଆଣିଥିଲା । କେଉଁଠୁ ଏତେ
ପରିମାଣର ଟଙ୍କା ଆଣିଲେ ବୋଲି ପଚରାଉଚରା ଚଳାଇଥିଲା । ଏତିକିବେଳେ ଖୁସବୁ ପ୍ରଡକ୍ସନର ମାଲିକ ପ୍ରଳୟ ପାଢୀ ଥାନାରେ ପହଞ୍ଚି ମହାବୀରଙ୍କୁ ନିଜ ସାଙ୍ଗ ବୋଲି ପରିଚୟ ଦେଇଥିଲେ । ତାଙ୍କ ପକ୍ଷରୁ ପକ୍ଷ ରଖି ପୁଲିସ୍କୁ କହିଥିଲେ ଯେ ତାଙ୍କର ତେଲ ମସଲାର ବେପାର ଚାଲିଛି । ଲକଡାଉନ୍ ଯୋଗୁଁ ଗଞ୍ଜାମ ଗଜପତି ଅଞ୍ଚଳରେ ବେପାରୀଙ୍କ ପାଖରେ ଲକ୍ଷ ଲକ୍ଷ ଟଙ୍କା ବକେୟା ପଡ଼ିଥିଲା । ଯାହାକୁ ଆଦାୟ ପାଇଁ ସେ ମହାବୀରଙ୍କୁ ସେଠାକୁ ପଠାଇଥିଲେ । ତେବେ ଟଙ୍କା ବେଆଇନ ନୁହେଁ, ଏ ବାବଦରେ ସମସ୍ତ କାଗଜପତ୍ର ତାଙ୍କ ପାଖରେ ଅଛି ବୋଲି ପୁଲିସକୁ ପ୍ରଳୟ କହିଥିଲେ । ଥାନା ଅଧିକାରୀ ପଦ୍ମନାଭ ପ୍ରଧାନ କହିଛନ୍ତି, ମହାବୀରଙ୍କୁ ଅଟକ ରଖାଯାଇଛି ।
ଟଙ୍କା କାରବାରର ଯାଞ୍ଚ ଚାଲିଛି । କାଗଜପତ୍ର ମଗାଯାଇଛି । କାଗଜପତ୍ର ଯାଞ୍ଚ ପାଇଁ ଆୟକର ବିଭାଗକୁ ଅବଗତ କରାଯାଇଛି । ଯଦି ଜବତ ଟଙ୍କା ସମ୍ପର୍କିତ କାଗଜପତ୍ର ନ ଦେଖାଇ ପାରନ୍ତି, ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ସୂଚନା ଥାଉ କି, ପୂର୍ବରୁ ଏକାଧିକ ଥର ରାଜଧାନୀରୁ ବିପୁଳ ମାତ୍ରାରେ ଟଙ୍କା ଜବତ ହୋଇଛି । ୨୦୧୬ ନଭେମ୍ବର ୧୯ରେ ସହିଦନଗରରୁ ୩୦ ଲକ୍ଷ ଟଙ୍କାର କଳା ଧନ ଜବତ ହୋଇଥିଲା ।
