ନୂଆଦିଲ୍ଲୀ,୨୦/୦୫: ସଂସଦ ଭବନର ସୁରକ୍ଷା ଦାୟିତ୍ୱ ସମ୍ପୂର୍ଣ୍ଣ ଭାବେ ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ୍ ସିକ୍ୟୁରିଟି ଫୋର୍ସ (ସିଆଇଏସ୍ଏଫ୍) ହାତକୁ ଯାଇଛି । ସୋମବାରଠାରୁ ୩,୩୧୭ ସିଆଇଏସ୍ଏଫ୍ ଯବାନ ସଂସଦର ସୁରକ୍ଷା ଦାୟିତ୍ୱରେ ମୁତୟନ ହେବେ । ଗତବର୍ଷ ଡିସେମ୍ବର ୧୩ରେ ସଂସଦ ଭବନରେ ହୋଇଥିବା ସୁରକ୍ଷା ତ୍ରୁଟି ଘଟଣା ପରେ ଏହି ନିଷ୍ପତ୍ତି ନିଆଯାଇଛି ।
ସେପଟେ ସଂସଦରେ ମୁତୟନ ଥିବା ସିଆର୍ପିଏଫ୍ର ପାର୍ଲାମେଣ୍ଟ ଡ୍ୟୁଟି ଗ୍ରୁପ୍ (ପିଡିଜି)ର ୧,୪୦୦ ଯବାନଙ୍କୁ ସେଠାରୁ ପ୍ରତ୍ୟାହାର କରିନିଆଯାଇଛି । ସିଆର୍ପିଏଫ୍ର ସମସ୍ତ ବାହାନ, ଅସ୍ତ୍ରଶସ୍ତ୍ର ଏବଂ କମାଣ୍ଡୋ ବି ହଟାଯାଇଛି । ଏଥିସହ ସଂଯୁକ୍ତ ଭାବେ ସଂସଦର ସୁରକ୍ଷାରେ ନିୟୋଜିତ ହୋଇଥିବା ଦିଲ୍ଲୀ ପୁଲିସର ପ୍ରାୟ ୧୫୦ କର୍ମଚାରୀ ଏବଂ ସଂସଦ ସୁରକ୍ଷା କର୍ମଚାରୀ (ପିଏସ୍ଏସ୍)ଙ୍କୁ ମଧ୍ୟ ପ୍ରତ୍ୟାହାର କରାଯାଇଛି । ସିଆର୍ପିଏଫ୍ର କମାଣ୍ଡର ଡିଆଇଜି ର୍ୟାଙ୍କର ଅଧିକାରୀ ସଂସଦର ସୁରକ୍ଷା ସହ ଜଡ଼ିତ ସମସ୍ତ ତଥ୍ୟ ସିଆଇଏସ୍ଏଫ୍କୁ ହସ୍ତାନ୍ତର କରିଛନ୍ତି । ସିଆଇଏସ୍ଏଫ୍ ଯବାନମାନେ ନ୍ୟାସନାଲ ସିକ୍ୟୁରିଟି ଗାର୍ଡ (ଏନ୍ଏସଜି) ଠାରୁ ଟ୍ରେନିଂ ନେଇଛନ୍ତି ।
ସୂଚନା ଅନୁସାରେ, ସିଆଇଏସ୍ଏଫ୍ ଯବାନମାନେ ୧୦ ଦିନ ଧରି ଏନ୍ଏସ୍ଜିର ବ୍ଲାକ୍ କମାଣ୍ଡୋଙ୍କଠାରୁ ଯେ କୌଣସି ଆକ୍ରମଣର ମୁକାବିଲା ଲାଗି ତାଲିମ ନେଇଛନ୍ତି । ସେମାନେ ଏଣ୍ଟ୍ରି ଗେଟ୍ରେ ଲୋକଙ୍କ ତଲାସିଠାରୁ ଆରମ୍ଭ କରି ଆସବାବପତ୍ର ତଥା ସାମଗ୍ରୀ ଯାଞ୍ଚ, ବୋମା ସନ୍ଧାନ ଏବଂ ତାହାକୁ ନିଷ୍କ୍ରିୟ କରିବା, ତୁରନ୍ତ ଆକ୍ସନ, ସ୍ନାଇପର ଟାସ୍କ ଆଦି କରିବା ଲାଗି ତାଲିମ ନେଇଛନ୍ତି ।