ଭୁବନେଶ୍ୱର: କମିଶନରେଟ୍ ପୁଲିସର ଅତିରିକ୍ତ କମିଶନର ଭାବେ ଦାୟିତ୍ୱ ନେଇଛନ୍ତି ଆଇପିଏସ୍ ରେଖା ଲୋହାନି । ପୂର୍ବ ଅତିରିକ୍ତ କମିଶନର ସଞ୍ଜୟ ସିଂହଙ୍କଠାରୁ ସେ ଦାୟିତ୍ୱ ଗ୍ରହଣ କରିଛନ୍ତି । ଏନେଇ ପୁଲିସ ସେବା ଭବନରେ ଏକ ବିଧିବଦ୍ଧ ଶପଥ ଗ୍ରହଣ ଉତ୍ସବ ଆୟୋଜିତ ହୋଇଥିଲା । ଯେଉଁଥିରେ ପୁଲିସ କମିଶନର ଡ. ସୁଧାଂଶୁ ଷଡ଼ଙ୍ଗୀ ଶ୍ରୀମତୀ ଲୋହାନିଙ୍କୁ ଦାୟିତ୍ୱ ଦେଇଥିଲେ । ସିପି ଡ. ଷଡ଼ଙ୍ଗୀ ଉତ୍ସବର ଅଧ୍ୟକ୍ଷତା କରି ଶ୍ରୀମତୀ ଲୋହାନିଙ୍କୁ ସ୍ୱାଗତ ସମ୍ବର୍ଦ୍ଧନା ଜଣାଇଥିଲେ । ଏହାସହ ବିଦାୟୀ ଆଇପିଏସ୍ ଶ୍ରୀ ସିଂହଙ୍କୁ ବିଦାୟ କାଳୀନ ସମ୍ବର୍ଦ୍ଧନା ଜ୍ଞାପନ କରିଥିଲେ । କୋଭିଡ୍-୧୯ କଟକଣା ଯୋଗୁଁ ଉତ୍ସବରେ ହାତଗଣତି ପୁଲିସ ଅଧିକାରୀ ଉପସ୍ଥିତ ଥିଲେ ।
ପୁଲିସର ସୋଲିଆଲ୍ ମିଡିଆ ପ୍ଲାଟଫର୍ମରେ ଅନ୍ଲାଇନ୍ ଯୋଗେ ଉତ୍ସବର ‘ଲାଇଭ୍ ଷ୍ଟ୍ରିମିଂ’ କରାଯାଇଥିଲା । ଡିସିପି ଉମାଶଙ୍କର ସିଂହ ଉତ୍ସବରେ ଧନ୍ୟବାଦ ଅର୍ପଣ କରିଥିଲେ । ୧୯୯୭ ବ୍ୟାଚ୍ର ଆଇପିଏସ୍ ଶ୍ରୀମତୀ ଲୋହାନି ଏହାପୂର୍ବରୁ ଆଇଜି (ଆଧୁନିକୀକରଣ) ଥିଲେ । ଜେଏନ୍ଏୟୁର ତତ୍କାଳୀନ ଛାତ୍ରୀ ଶ୍ରୀମତୀ ଲୋହାନି କମିଶନରେଟ୍ ପୁଲିସରେ ଡିସିପି (ମୁଖ୍ୟାଳୟ) ଭାବେ କାମ କରିସାରିଛନ୍ତି । ସେ ସୋନପୁର ଓ ନୟାଗଡ ଜିଲ୍ଲାର ଏସ୍ପି ଥିଲେ । ଏହାବାଦ୍ ଗୁଇନ୍ଦା ବିଭାଗ ଓ କେନ୍ଦ୍ର ଡେପୁଟେସନରେ କାମ କରିଛନ୍ତି । ଶ୍ରୀମତୀ ଲୋହାନି ତାଙ୍କ ପାଠପଢ଼ା କ୍ୟାରିଅରରେ ସାଇବର୍ ଲ’ରେ ଡିପ୍ଲୋମା କରିଛନ୍ତି । ଯାହାକି, ଏବେକାର ସାଇବର ଠକେଇ ସଙ୍କଟରେ ବେଶ୍ ସହାୟକ ହେବ । ସାଇବର ଅପରାଧକୁ ସେ ଫୋକସ୍ ଦେବେ ବୋଲି ସୂଚନା ଦେଇଛନ୍ତି । ଆଇପିଏସ୍ ଶ୍ରୀ ସିଂହ ଅତିରିକ୍ତ କମିଶନର ଭାବେ ପାଖାପାଖି ଅଢ଼େଇ ବର୍ଷ କମିଶନରେଟ୍ ପୁଲିସରେ ଥିଲେ ।
ତାଙ୍କ କାର୍ଯ୍ୟକାଳରେ ଡ୍ରଗ୍ସ କାରବାର କଣ୍ଟ୍ରୋଲ କରିବାକୁ ଗୁରୁତ୍ୱ ଦେଇଥିଲେ । ତାଙ୍କ ନେତୃତ୍ୱରେ ଏକ ଡ୍ରଗ୍ସ ସ୍କ୍ୱାଡ୍ ଗଢ଼ାଯାଇଥିଲା । ଗତ ଜାନୁଆରୀରୁ ଜୁଲାଇ ମଧ୍ୟରେ ୬୫ଟି ମାମଲା ରୁଜୁ ହେବା ସହ ପାଖାପାଖି ୧ କେଜି ୮୨୧ ଗ୍ରାମର ବ୍ରାଉନ୍ସୁଗାର ଜବତ କରାଯାଇଥିଲା । କମିଶନରେଟ୍ ପୁଲିସ ଇତିହାସରେ ଏତିକି କମ୍ ସମୟ ଅବଧିରେ ଏତେ ସଂଖ୍ୟକ ବ୍ରାଉନ୍ସୁଗାର ପ୍ରଥମ ଥର ପାଇଁ ମିଳିଥିଲା ।
