ଏଣିକି ବିଭାଗ ସହ ମିଶି କାମ କରିବ ନିର୍ଦ୍ଦେଶାଳୟ : ସିଙ୍ଗଲ ୱିଣ୍ଡୋରେ ହେବ ଫାଇଲ କାମ

ଭୁବନେଶ୍ୱର ୨୨/୮: ‘ଲୋକଙ୍କୁ ଯାହା ପ୍ରତିଶ୍ରୁତି ଦେଇଛୁ, ତାକୁ କାର୍ଯ୍ୟକାରୀ କରିବୁ ।’ ଏ କଥାକୁ ବାରମ୍ବାର ମୁଖ୍ୟମନ୍ତ୍ରୀ ଦୋହରାଉଥିଲା ବେଳେ ସରକାର ଏ ନେଇ ଗୋଟିଏ ପରେ ଗୋଟିଏ ପଦକ୍ଷେପ ମଧ୍ୟ ନେଉଛନ୍ତି । ରାଜ୍ୟର ଶାସନ ଓ ପ୍ରଶାସନିକ ବ୍ୟବସ୍ଥାରେ ସରକାର ସଂସ୍କାର ଆଣିବାକୁ ଯେ ଚାହୁଁଛନ୍ତି ତାହା ଅନୁମାନ କରାଯାଉଛି । ଏଣିକି ପ୍ରଶାସନିକ ବିଭାଗ ଅଧୀନରେ ସମସ୍ତ ସରକାରୀ ନିର୍ଦ୍ଦେଶାଳୟ କାମ କରିବ । ସିଙ୍ଗଲ ୱିଣ୍ଡୋରେ ଫାଇଲ କାମ ହେବ । ଏହାଦ୍ୱାରା ସରକାରୀ ନିଷ୍ପତ୍ତି ତ୍ୱରିତ ହେବା ସହ ଲୋକମାନେ ଶୀଘ୍ର ସେବା ପାଇପାରିବେ । ଏ ନୂଆ ବ୍ୟବସ୍ଥା ପ୍ରଶାସନକି ଢାଞ୍ଚାରେ ବଡ଼ ସଂସ୍କାର ଆଣିବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ରାଜ୍ୟ ସରକାର ପୂରାକୁ ପୂରା ‘ଆକ୍ସନ ମୁଡ’ ବୋଲି ବିଭିନ୍ନ ମହଲରେ ଆଲୋଚନା ହେଉଛି ।

କ୍ରମାଗତ ୫ମ ପାଳିରେ ରାଜ୍ୟର ଶାସନ ଡୋରି ଧରିବା ପରେ ନବୀନ ପ୍ରଥମ ଦିନରୁ ମନ୍ତ୍ରୀ ପରିଷଦର ବୈଠକରେ ସ୍ପଷ୍ଟ କରିଥିଲେ, ଓଡ଼ିଶାବାସୀ ଆମକୁ ଆଶୀର୍ବାଦ କରିଛନ୍ତି । ପୁଣି ସେବା କରିବାକୁ ସୁଯୋଗ ଦେଇଛନ୍ତି । ଆସନ୍ତୁ, ଆମେ ସମସ୍ତେ ସମୟର ପରିବର୍ତ୍ତନରେ ସାମିଲ ହେବା । ଏକ ସଶକ୍ତ ଓ ନୂଆ ଓଡ଼ିଶା ଗଠନ କରିବା । ଏ ଆହ୍ୱାନ ଦେବା ପରେ ମୁଖ୍ୟମନ୍ତ୍ରୀ ଗୋଟିଏ ପରେ ଗୋଟିଏ ନୂଆ ନିଷ୍ପତ୍ତି ନେଉଛନ୍ତି ।

ପ୍ରଶାସନିକ ବିଭାଗ ସହ ନିର୍ଦ୍ଦେଶାଳୟଗୁଡ଼ିକର ମିଶ୍ରଣ ନେଇ ସାଧାରଣ ପ୍ରଶାସନ ବିଭାଗ ବିଜ୍ଞପ୍ତି ଜାରି କରଛି । ନିଷ୍ପତ୍ତି ହୋଇଛି ଏଣିକି ଗୋଟିଏ ଛାତ ତଳେ ଉଭୟ ପ୍ରଶାସନିକ ବିଭାଗ ଓ ନିର୍ଦ୍ଦେଶାଳୟ କାମ କରିବ । ଓସ୍ୱାସରେ ସିଙ୍ଗଲ ଫାଇଲ ବ୍ୟବସ୍ଥା ରହିବ । ନିର୍ଦ୍ଦେଶାଳୟରୁ ଆସୁଥିବା ସମସ୍ତ ପ୍ରସ୍ତାବ ଏଣିକି ବିଭାଗ ଦ୍ୱାରା ଅନୁଧ୍ୟାନ କରିବା ଆବଶ୍ୟକତା ରହିବନି । ଦୁଇ ଅଫିସର କର୍ମଚାରୀମାନଙ୍କୁ କାମର ଚାପ ଅନୁସାରେ ଦାୟିତ୍ୱ ବଣ୍ଟନ କରାଯିବ । ମାତ୍ର ସମୟ ଅପଚୟକୁ ଆଦୌ ବରଦାସ୍ତ କରାଯିବନି ।

ବଳକା କର୍ମଚାରୀଙ୍କୁ ଅନ୍ୟତ୍ର ବିନିଯୋଗ କରାଯିବ । କର୍ମଚାରୀଙ୍କର କ୍ୟାଡରରେ ପରିବର୍ତ୍ତନ ହେବନାହିଁ । କ୍ୟାଡର ଅନୁସାରେ କର୍ମଚାରୀଙ୍କୁ ସମସ୍ତ ସରକାରୀ ସୁବିଧା ସୁଯୋଗ ମିଳିବ । ତେବେ ଅର୍ଥ ବିଭାଗର ଗାଇଡଲାଇନ ଅନୁସାରେ ତଳିଆ ପଦବିକୁ ଉଚ୍ଛେଦ କରାଯିବ । ଉଲ୍ଲେଖଯୋଗ୍ୟ, ମୁଖ୍ୟ ଶାସନ ସଚିବ ଭାବେ ଅସିତ ତ୍ରିପାଠୀ ଦାୟିତ୍ୱ ନେବା ବେଳେ ସ୍ପଷ୍ଟ କରିଥିଲେ, ଏଣିକି ଫାଇଲ ‘ରକେଟ୍‌ ବେଗ’ରେ ଯିବ । ନୂଆ ମୁଖ୍ୟ ସଚିବ ଭାବେ ଦାୟିତ୍ୱ ନେବାର ଦୁଇଦିନ ମଧ୍ୟରେ ସରକାର ଏ ନିଷ୍ପତ୍ତି ନେଇଛନ୍ତି ।
ନବୀନ ୫ମ ପାଳି ଆରମ୍ଭ କରିବାର ଦୁଇ ମାସ ପରେ ପୁଲିସ ମୁଖିଆ ଓ ପ୍ରଶାସନିକ ମୁଖିଆ ପଦବିରେ ନୂଆ ନିଯୁକ୍ତି ଦେଇଛନ୍ତି । ଆଇଏଏସ ଓ ଆଇପିଏସସ୍ତରରେ ବଡ଼ ଧରଣର ଅଦଳ ବଦଳ କରିଛନ୍ତି । ରାଜ୍ୟରେ ବିକାଶର ଗତିଶୀଳତାକୁ ଆଗକୁ ନେବାକୁ ନୂଆ ଟିମ୍‌ ‘୫ ଟି’ ଦଳଗତ କାର୍ଯ୍ୟ, ସ୍ୱଚ୍ଛତା, ବୈଷୟିକ ଜ୍ଞାନ, ପରିବର୍ତ୍ତନ ଓ ସମୟ (ଟିମ୍‌ ୱାର୍କ, ଟ୍ରାନସ୍‌ପରେନ୍ସି, ଟେକ୍‌ନୋଲୋଜି, ଟ୍ରାନସଫରମେସନ, ଟାଇମ୍‌) ଅନୁସାରେ କାମ କରିବାକୁ ନବୀନ ଗୁରୁତ୍ୱ ଦେଇଆସୁଛନ୍ତି । ଅଫିସରମାନଙ୍କୁ ନବୀନ କହିଛନ୍ତି, ଆପଣମାନଙ୍କର କାମର ମୂଲ୍ୟାଙ୍କନ ରିପୋର୍ଟ ମୁଁ ଲେଖୁଛି ।

ମୁଁ କ’ଣ କାମ କରୁଛି, ଜନତା ତା’ର ରିପୋର୍ଟ ଲେଖୁଛନ୍ତି । ମୁଁ ଚାହେଁ, ଉଭୟକୁ ଯୋଡ଼ିବାକୁ । ଆମ ସମସ୍ତଙ୍କୁ ଲୋକଙ୍କ ନିକଟରେ ଉତ୍ତରଦାୟୀ ହେବାକୁ ପଡ଼ିବ । ଏଥିପାଇଁ ସରକାରଙ୍କର ସବୁ ବିଭାଗ ଶାସନ ବ୍ୟବସ୍ଥାରେ ସଂସ୍କାର ଆଣି ଏକ ସମୃଦ୍ଧ ରାଜ୍ୟ ଗଢ଼ିବାକୁ ନିଷ୍ଠାର ସହ କାମ କରିବାକୁ ମୁଖ୍ୟମନ୍ତ୍ରୀ ଅଫିସରମାନଙ୍କୁ ଆହ୍ୱାନ ଦେଇଛନ୍ତି । ଜିଲ୍ଲାର ଏସପି ଓ ଭାରତୀୟ ବନ ସେବା (ଆଇଏଫଏସ୍‌)ର ଅଫିସରମାନେ ଏଣିକି ବାର୍ଷିକ କାର୍ଯ୍ୟ ପ୍ରଦର୍ଶନ ମୂଲ୍ୟାଙ୍କନ ରିପୋର୍ଟ (ଆନୁଆଲ ପର୍ଫମାନସ ଆପ୍ରିଜାଲ ରିପୋର୍ଟ) ମୁଖ୍ୟମନ୍ତ୍ରୀଙ୍କୁ ପ୍ରଦାନ କରିବେ । ଏହି ରିପୋର୍ଟର ମୂଲ୍ୟାୟନ ବେଳେ ୫ ‘ଟି’ର ଉତ୍ତମ ପ୍ରଦର୍ଶନ ପାଇଁ ୨୦% ୱେଟେଜ୍‌ ମଧ୍ୟ ରଖାଯାଇଛି । ଏହାପଛରେ ମୁଖ୍ୟମନ୍ତ୍ରୀଙ୍କର ମୂଳ ଉଦ୍ଦେଶ୍ୟ ପ୍ରଶାସନିକ ସଂସ୍କାର ବୋଲି ପାୱାର କରିଡରରେ ଚର୍ଚ୍ଚା ।

ବିଧାୟକମାନଙ୍କୁ ନବୀନ ସ୍ପଷ୍ଟ ଭାବେ କହିଛନ୍ତି, କ୍ଷମତା ନିଶାରେ ଅହଂକାର ଛାଡ଼ । ନମ୍ର ଓ ସରଳ ହେବା ସହ ଦଳୀୟ ବାଛ ବିଚାରରୁ ଉଧ୍ୱର୍କୁ ଯାଇ ଲୋକଙ୍କ ପାଇଁ କାମ କର । ଦଳର ଇସ୍ତାହାରକୁ ନୀତିଗତ ଭାବେ ନୂଆ ସରକାର ସରକାରଙ୍କ କାର୍ଯ୍ୟକ୍ରମ ବୋଲି ଗ୍ରହଣ କରଛି । ଏହିକ୍ରମରେ ମନ୍ତ୍ରୀମାନେ କେତେ ନିଷ୍ଠା ଓ ଦକ୍ଷତାର ସହ ନିଜ କାମ ତୁଲାଉଛନ୍ତି ସେ ସଂପର୍କରେ ମୁଖ୍ୟମନ୍ତ୍ରୀ ରିପୋର୍ଟ କାର୍ଡ ମାଗୁଛନ୍ତି । ମନ୍ତ୍ରୀମାନେ ପ୍ରତି ମାସର ୭ ରେ ମାସକର କାର୍ଯ୍ୟ ବିବରଣୀ ମୁଖ୍ୟମନ୍ତ୍ରୀଙ୍କ ନିକଟରେ ଦାଖଲ କରୁଛନ୍ତି । ଏହାକୁ ନିଜେ ନବୀନ ଅନୁଧ୍ୟାନ କରିବାକୁ କହି ମନ୍ତ୍ରୀମାନଙ୍କ ମୁଣ୍ଡରେ ଖଣ୍ଡା ଝୁଲାଇଛନ୍ତି । ଏହାର ଉଦ୍ଦେଶ୍ୟ ବିକାଶର ଗତିଶୀଳତା କେତେ ତ୍ୱରିତ ହେବ । ମନ୍ତ୍ରୀମାନେ ଅଧିକ ଗସ୍ତ କରିବା ସହ ସରକାରୀ ଅଫିସ ଅଚାନକ ଯାଞ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି । ଏପରିକି ଦଳୀୟ ସାଂସଦମାନେ ମଧ୍ୟ ପ୍ରତି ଦୁଇ ମାସରେ ରିପୋର୍ଟ କାର୍ଡ ଦେବାକୁ ନବୀନ ପରାମର୍ଶ ଦେଇଛନ୍ତି ।

ଦୁର୍ନୀତି ବିରୋଧରେ ନବୀନ ଖଣ୍ଡା ବୁଲାଇ ଅଫିସରଙ୍କୁ ବରଖାସ୍ତ କଲେଣି । ଏପଟେ ଲୋକାୟୁକ୍ତ ନିଯୁକ୍ତି ସହ ମାନବାଧିକାର କମିଶନ ଅଧ୍ୟକ୍ଷ ଓ ସଦସ୍ୟ ନିଯୁକ୍ତି ପାଇଁ ପ୍ରକ୍ରିୟା ଆଗେଇଛି । ସରକାର ଦାୟିତ୍ୱକୁ ଆସିବା ପରେ କିଛି ମନ୍ତ୍ରୀ ବିଭିନ୍ନ ସରକାରୀ ଅଫିସକୁ ଅଚାନକ ଗସ୍ତ କରୁଛନ୍ତି । କୃଷି ଓ ଉଚ୍ଚଶିକ୍ଷା ସହ ଗଣଶିକ୍ଷା ମନ୍ତ୍ରୀ ନିଜ ବିଭାଗରେ ସଂସ୍କାର ଆଣିବାକୁ ଘନ ଘନ ବୈଠକ ଡାକୁଛନ୍ତି । ସଚିବାଳୟର ନାମ ବଦଳାଇ ‘ଲୋକସେବା ଭବନ’ ରଖିବା, ‘ଗାର୍ଡ ଅଫ ଅନର’ ବ୍ୟବସ୍ଥା ଉଚ୍ଛେଦ ସହ ସ୍ୱାଧୀନତା ସଂଗ୍ରାମୀମାନଙ୍କୁ ‘ମାନ୍ୟବର’ ସମ୍ବୋଧନ କରିବା ଭଳି ନିଷ୍ପତ୍ତି ନେଇ ମୁଖ୍ୟମନ୍ତ୍ରୀ ଏବେ ଚର୍ଚ୍ଚାରେ ଅଛନ୍ତି । ଅନ୍ୟ ପାଳିଗୁଡ଼ିକ ଅପେକ୍ଷା ନବୀନ ସରକାର ୫ମ ପାଳିରେ ପ୍ରଥମରୁ ଅଧିକ ଚଳଚଞ୍ଚଳ ଲାଗୁଛି ବୋଲି ଏବେ ସବୁଠି ଚର୍ଚ୍ଚା ।

   ସମ୍ବନ୍ଧିତ ଖବର


କରୋନାରେ ଆଉ ୧୫ ସଂକ୍ରମିତଙ୍କ ମୃତ୍ୟୁ, ମୃତକଙ୍କ ସଂଖ୍ୟା ୭୩୬ରେ ପହଞ୍ଚିଲା

୧୦୦ ଶର୍ଯ୍ୟା ବିଶିଷ୍ଟ କୋଭିଡ୍‌ ହସ୍ପିଟାଲରେ ଅଗ୍ନିକାଣ୍ଡ, କାରଣ ଅସ୍ପଷ୍ଟ

ବରିଷ୍ଠ ଦଇତା ସେବାୟତ ପ୍ରେମାନନ୍ଦ ଦାସମହାପାତ୍ରଙ୍କ ଦେହାନ୍ତ

୭ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା : ୧୦ ଜିଳ୍ଲାକୁ ୟଲୋ ଓ୍ବାର୍ଣ୍ଣିଂ, ୭ ଜିଳ୍ଲାକୁ ଅରେଞ୍ଜ ଓ୍ବାର୍ଣ୍ଣିଂ ଜାରି

ମହିଳା IICଙ୍କୁ ନିର୍ଯାତନା : ସ୍ବାମୀଙ୍କ ବିରୋଧରେ ଆଣିଲେ ସଙ୍ଗିନ ଅଭିଯୋଗ, ଥାନାରେ ଏତଲା

ବିଜେଡି ପ୍ରାର୍ଥୀ ହେବେ ଓଡିଆ ସିନେଷ୍ଟାର ଅରିନ୍ଦମ୍ !