ଆପାର୍ଟମେଣ୍ଟରୁ ଚୋରି କରୁଥିବା ୭ ଜଣିଆ ଗ୍ୟାଙ୍ଗ୍‌ ଗିରଫ:୯ଟି ଗ୍ୟାସ ସିଲିଣ୍ଡର, ମୋବାଇଲ, ରୁପା ଟଙ୍କା ଜବତ

ଚନ୍ଦକା ୧୦/୧୧: ଯେଉଁଠି ପଶୁଥିଲେ ଏକବାର କଳାକନା ବୁଲାଇ ଦେଉଥିଲେ । ଘରୁ ଗ୍ୟାସ ସିଲିଣ୍ଡର, ଟଙ୍କା, ମୋବାଇଲ୍‌, ଇଲେକ୍ଟ୍ରୋନିକ୍ସ ସାମଗ୍ରୀ ସବୁକିଛି ନେଇ ଯାଉଥିଲେ ଏହି ଗ୍ୟାଙ୍ଗ୍‌ । ଏପରି ଏକ କୁଖ୍ୟାତ ଚୋର ଗ୍ୟାଙ୍ଗକୁ ଆଜି ଚନ୍ଦକା ଥାନା ପୁଲିସ ଗିରଫ କରିଛି । ସେମାନଙ୍କ ଠାରୁ ବହୁ ପରିମାଣର ମୂଲ୍ୟବାନ ସାମଗ୍ରୀ ଜବତ କରିଛି । ଏହା ସହିତ ଏହିସବୁ ଚୋରି ସାମଗ୍ରୀ କିଣିଥିବା ୫ ବ୍ୟକ୍ତିଙ୍କୁ ମଧ୍ୟ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ।

ଚନ୍ଦକା ଥାନା ପୁଲିସ ସୂତ୍ରରୁ ପ୍ରକାଶ ଯେ ରାଜବାଟିକା ଆପାର୍ଟମେଣ୍ଟରୁ ନିୟମିତ ବ୍ୟବଧାନରେ ଚୋରି ହେଉଥିଲା । ଘରୁ ବହୁ ମୂଲ୍ୟବାନ ସାମଗ୍ରୀ ଏହି ଗ୍ୟାଙ୍ଗ ନେଇ ଛୁ ମାରୁଥିଲେ । ଏହା ସହିତ ଏହି ଗ୍ୟାଙ୍ଗ ନିକଟସ୍ଥ ପଥରଗାଡ଼ିଆ ମୌଜାରୁ ମଧ୍ୟ ଚୋରି କରୁଥିଲେ । ରାଜବାଟିକା ଆପାର୍ଟମେଣ୍ଟ ବାସିନ୍ଦା ବିଜୟ ମହାନ୍ତି ନାମକ ଜଣେ ବ୍ୟକ୍ତି ଏନେଇ ଚନ୍ଦକା ଥାନାରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ଚନ୍ଦକା ପୁଲିସ ତଦନ୍ତ ଜାରି ରଖିଥିଲା ।

ପ୍ରଥମେ ପୁଲିସ ଶିବୁ ସାହୁ, ଖୁରୁଡ଼ି ନାମକ ଦୁଇ ଯୁବକଙ୍କୁ ଗିରଫ କରିଥିଲା । ଏମାନଙ୍କୁ ଜେରା କରିବା ପରେ ଜଣଜଣ କରି ସମସ୍ତ ଅଭିଯୁକ୍ତଙ୍କୁ ଗିରଫ କରିବାରେ ସକ୍ଷମ ହୋଇଥିଲା । ଏମାନେ ହେଲେ ଦାରୁଠେଙ୍ଗ ଗ୍ରାମର ଶିବୁ ସାହୁ(୨୨), ନୂଆସାହିର ବିଶ୍ୱନାଥ ଦେହୁରୀ(୨୨), ଚନ୍ଦନ ମହାପାତ୍ର(୧୯), ଶିମିଳିପାଟଣାର ବଚନ ନାୟକ(୨୩), ଆରତ ଜେନା(୩୫), ଧୀରେନ୍ଦ୍ର ଦେହୁରୀ(୨୮), ଦାରୁଠେଙ୍ଗ ଗ୍ରାମର ପିଙ୍କୁ ବେହେରା(୨୭) ।

ଏମାନଙ୍କଠାରୁ ଚୋରି ଜିନିଷ କିଣିବା ଅଭିଯୋଗରେ ପୁଲିସ ୫ ଜଣଙ୍କୁ ଗିରଫ କରିଛି । ସେମାନେ ହେଲେ ଚନ୍ଦ୍ରଶେଖର ମାଝି(୩୫), ରମେଶ ସାହୁ(୩୬), ଜିତେନ୍ଦ୍ର ପାଟସାହାଣୀ(୨୭), କମଳ ଦାସ(୨୯) ଓ ଅନିରୁଦ୍ଧ ନାୟକ(୨୪) । ସମସ୍ତ ୧୨ ଜଣଙ୍କୁ ପୁଲିସ ଆଜି କୋର୍ଟ ଚାଲାଣ କରିଛି । ଅଭିଯୁକ୍ତମାନଙ୍କଠାରୁ ଗୋଟିଏ ଲାପଟପ, ଗୋଟିଏ ଆଇପ୍ୟାଡ୍‌, କିଛି ମୋବାଇଲ୍‌, ୨ଟି ମୂଲ୍ୟବାନ୍‌ କ୍ୟାମେରା, ବହୁ ସଂଖ୍ୟାରେ ସିମ୍‌, ୯ଟି ଗ୍ୟାସ ସିଲିଣ୍ଡର, ରୁପା ଟଙ୍କା ଏବଂ ଅନ୍ୟାନ୍ୟ ବୈଦ୍ୟୁତିକ ସାମଗ୍ରୀ ମଧ୍ୟ ଜବତ କରାଯାଇଛି ।

   ସମ୍ବନ୍ଧିତ ଖବର


ବିବାହ ପାଇଁ ମହିଳା ଆଥଲେଟଙ୍କୁ ଚାପ୍ ପକାଉଥିଲେ କୋଚ୍,ନଶୁଣିବାରୁ ବନ୍ଧୁକ ଆଣି…

ଏଣିକି ଗାଁରେ କରିହେବନି ମନଇଛା ଘର, ନେବାକୁ ପଡିବ ଅନୁମତି

ରାଜଧାନୀରେ ପୁଣି ମିଳିଲା କଟା ଗୋଡ

ପରିବା ଟ୍ରେରେ ଫସିଗଲା ନାଗ ସାପ! ଦେଖନ୍ତୁ ଉଦ୍ଧାର ସମୟର ଭିଡିଓ…