ବଡ଼ଚଣା,୨୮ା୬(ଆପ): ଯାଜପୁର ଜିଲ୍ଲା ବଡ଼ଚଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରୋଗୀ ସେବାରେ ଅବହେଳାକୁ ନେଇ ସବୁବେଳେ ଚର୍ଚ୍ଚାରେ ରହି ଆସିଛି । କେତେବେଳେ ଡାକ୍ତର ଅଭାବ ତ ଆଉ କେତେବେଳେ ଚିକିତ୍ସାରେ ଅବହେଳା ପାଇଁ ବିବାଦ ଦେଖା ଦେଇଛି । ୨୨ ତାରିଖ ବିଳମ୍ବିତ ରାତିରେ ନକଲି ଡାକ୍ତରଙ୍କ ଚିକିତ୍ସାକୁ ନେଇ ହଟଚମଟ ସୃଷ୍ଟି ହୋଇଥିଲା ।

୨୨ ତାରିଖ ରାତି ପ୍ରାୟ ସାଢ଼େ ୧୧ଟାରେ ସ୍ଥାନୀୟ କଡ଼ାଇ ଗ୍ରାମର ନବ କିଶୋର ସାମଲଙ୍କ ପୁଅ ନିହାର ରଞ୍ଜନ ଓରଫ ବାଦଲ (୩୦) ନକଲି ଡାକ୍ତର ସାଜି ଡାକ୍ତରଖାନାର ପ୍ରସୂତି ଗୃହକୁ ଯାଇଥିଲେ । ପ୍ରସୂତିଙ୍କ ସ୍ୱାସ୍ଥ୍ୟ ପରୀକ୍ଷା ଆଳରେ ମହିଳାଙ୍କ ସମ୍ବେଦନଶୀଳ ଅଙ୍ଗରେ ହାତ ମାରିଥିବା ନେଇ ସମାଜସେବୀ କିଶୋର ବାରିକ ବଡ଼ଚଣା ପୁଲିସକୁ ଜଣାଇଥିଲେ । ପୁଲିସ ଅଭିଯୋଗକୁ ଭିତ୍ତି କରି ବାଦଲକୁ ଗିରଫ କରି କୋର୍ଟ ଚାଲାଣ କରିଥିଲା । ଏନେଇ ଡାକ୍ତରଖାନା ପକ୍ଷରୁ କୌଣସି ଅଭିଯୋଗ ହୋଇନଥିବାରୁ ମେଡିକାଲ କର୍ତ୍ତୃପକ୍ଷଙ୍କ କାର୍ଯ୍ୟଦକ୍ଷତାକୁ ନେଇ ପ୍ରଶ୍ନ ଉଠିଛି । ଡାକ୍ତର ପ୍ରିୟପ୍ରୀତମ ପଣ୍ଡାଙ୍କ ସମେତ ଡାକ୍ତରଖାନାର ଅନ୍ୟ କେତେକ କର୍ମଚାରୀଙ୍କ ଏହି ଘଟଣାରେ ସଂପୃକ୍ତି ଥିବା ନେଇ ଚର୍ଚ୍ଚା ହେଉଛି ।

ନକଲି ଡାକ୍ତରଙ୍କ ଏକ ଭିଡିଓ କ୍ଲିପିଂ ଏବେ ସୋସିଆଲ ମିଡିଆରେ ଘୂରି ବୁଲୁଛି । ଏହି ଭିଡିଓରେ ବାଦଲ ଯାହା କହିଛନ୍ତି ତାହା ଛାତି ଥରେଇ ଦେଲା ଭଳି ଘଟଣା । ବାଦଲ କହିବା ମୁତାବକ ଡାକ୍ତରଖାନାକୁ ସେ ମଉଜ କରିବା ପାଇଁ ଆସୁଥିଲା । ଡାକ୍ତରଖାନା କର୍ମଚାରୀଙ୍କୁ ମଦ ପିଇବାକୁ ଦେବାରୁ ତାକୁ ସବୁ କିଛି ସହଜରେ ମିଳିଯାଉଥିଲା । ଏହିଭଳି ଘଟଣା ବହୁବାର ଘଟିଛି । ଯେହେତୁ ଡାକ୍ତଖାନା କର୍ମଚାରୀଙ୍କୁ ମଦ ପିଇବାକୁ ଦେଉଥିଲା ତା ପାଇଁ ସବୁ ମାଫ୍‌ ଥିଲା । ମାତ୍ର ସମାଜସେବୀ ଶ୍ରୀ ବାରିକ୍‌ ଏହି ଘଟଣାର ପର୍ଦ୍ଦାଫାସ କରିଥିଲେ ।