ନୂଆଦିଲ୍ଲୀ,୨୦/୦୧ : ଅର୍ଥ ମନ୍ତ୍ରାଳୟ ପକ୍ଷରୁ ୨୦୨୨-୨୩ ବଜେଟ୍ ପାଇଁ ପ୍ରସ୍ତୁତି ଜାରୀ ରହିଛି । ଯେଉଁଥିରେ ମୁଖ୍ୟ ଭୁମିକା ଗ୍ରହଣ କରୁଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସିତାରମଣ । କୁହାଯାଉଛି କି ଫେବୃଆରୀ ପହିଲାରେ ଦେଶବାସୀଙ୍କ ସାମ୍ନାରେ ବଜେଟ ୨୦୨୨ ଉପସ୍ଥାପନ କରିପାରନ୍ତି ଅର୍ଥମନ୍ତ୍ରୀ । ଏହାକୁ ନେଇ ସମସ୍ତ ପ୍ରସ୍ତୁତିପ୍ରଣାଳୀ କରୁଥିବା ଅର୍ଥମନ୍ତ୍ରାଳୟର ଡିପାର୍ଟମେଣ୍ଟ ଅଫ୍ ଏକୋନୋମିକ୍ ଆଫାୟର୍ସ ର କର୍ମଚାରୀ ମାନଙ୍କ ଉପରେ ଏବେ ସତେ ଯେମିତି କରୋନାର କରାଳ ଛାଇ ପଡ଼ିଛି ।
ଗତ କିଛି ସପ୍ତାହ ଧରି ବିଭାଗର କର୍ମଚାରୀ ମାନେ କୋଭିଡ଼ରେ ସଂକ୍ରମିତ ହେଉଥିବା ଖବର ଆସୁଛି । ତେଣୁ ବଜେଟ ପୂର୍ବରୁ ବିଭାଗର କର୍ମଚାରୀ ମାନଙ୍କ ଚିକିତ୍ସା ପାଇଁ ଆବଶ୍ୟକୀୟ ଆଇସୋଲେସନ୍ ଅବଧି, ହୋମ କ୍ୱାରେନଟାଇନ୍ ଭଳି ତମାମ ନିର୍ଦ୍ଦେଶନାମା ଜାରୀ କରାଯାଇଛି । ଏହି ପରିପ୍ରେକ୍ଷୀରେ ଭାରତ ସରକାରଙ୍କର ଅଧିନସ୍ଥ ସଚିବ ହିମାଂଶୁ ଗାନ୍ଧୀ ଦ୍ୱାରା କାର୍ଯ୍ୟାଳୟ ପକ୍ଷରୁ ଏକ ସ୍ମାରକପତ୍ର ପ୍ରଦାନ କରାଯାଇଛି । ଯେଉଁଥିରେ ଲେଖାଯାଇଛି ଯେ, ଗତ କିଛି ସପ୍ତାହ ଧରି ଡିପାର୍ଟମେଣ୍ଟ ଅଫ୍ ଏକୋନୋମି ଆଫାୟର୍ସରେ କୋଭିଡ୍ ଯୋଗୁ ସଂକ୍ରମଣ ମାମଲା ବଢ଼ିବାରେ ଲାଗିଛି । ସେପଟେ ସମ୍ଭାବ୍ୟ ତୃତୀୟ ଲହରକୁ ଦୃଷ୍ଟିରେ ରଖି ଆଇସୋଲେସନ୍, ହୋମ କ୍ୱାରେନଟାଇନ୍ ଏବଂ ତମାମ ନିର୍ଦ୍ଦେଶାବଳୀ ପାଳନ କରିବାକୁ ଆଇସିଏମଆର ଏବଂ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ଦ୍ୱାରା କୁହାଯାଇଛି ।
କୁହାଯାଇଛି ଯେ, ଯେତେବେଳେ ସରକରୀ କର୍ମଚାରୀ କୋଭିଡ୍ ସଂକ୍ରମିତ ଚିହ୍ନଟ ହେଉଛନ୍ତି ସେତେବେଳେ , ତାଙ୍କର ପଜିଟିଭ୍ ରିପୋର୍ଟ ଦାଖଲ କରିବାର ଆଗାମୀ ୭ ଦିନ ପର୍ଯ୍ୟନ୍ତ ପରିବର୍ତ୍ତିତ ଅବକାଶ ବା ଛୁଟି ପ୍ରଦାନ କରାଯିବ । ସେପଟେ ଯଦି କୌଣସି ସରକାରୀ କର୍ମଚାରୀଙ୍କ ପରିବାରରେ କେହି ସଂକ୍ରମିତ ହୁଅନ୍ତି, ତାହେଲେ ୭ ଦିନ ପର୍ଯ୍ୟନ୍ତ କର୍ମଚାରୀ ଜଣଙ୍କ ଘରେ ରହି କାମ କରିପାରିବେ ।