୧୦୦ ଏକର ଜମି, ବଞ୍ଚିବାକୁ ରାହା ନାହିଁ; ମୃତ୍ୟୁ ଭୟରେ ଘର ଛାଡ଼ିଲେ ଭଗବାନ

ପୁରୀ: ୫ ପୁଅ । ପୁଅମାନଙ୍କୁ ଭରସା ଥିଲା । କିନ୍ତୁ ପୁଅମାନେ ଗାଳିଗୁଲଜ କରୁଛନ୍ତି । ଗୋଡ଼ ଧରିଲେ ଗୋଡ଼ ଛିଞ୍ଚାଡ଼ି ଦେଲେ । ଜଣେ ପୁଅ ବାଡ଼ିଆବାଡ଼ି କରୁଛି । ଇଶ୍ୱରଙ୍କ ଛଡ଼ା ସଂସାରରେ ମୋର ଆଉ କେହି ନାହିଁ । ସେହି ଠାକୁରେ ହିଁ ସାହା ଭରସା । ତୁମରି ପାଖକୁ ଯାଉଛି । ପୁଅ-ଝିଅ ମୋର କେହି ନାହାନ୍ତି । ମୋର ବାପା-ମା ତୁମେ ସବୁ । ଦର୍ଶନ ଦେବ ଠାକୁରେ । ଗୁରୁବାର ରାତି ଅଧରେ ପୁରୀ-ଭୁବନେଶ୍ୱର ରାଜପଥରେ ଏକୁଟିଆ କାନ୍ଦି କାନ୍ଦି ପୁରୀ ଅଭିମୁଖେ ଚାଲି ଚାଲି ଆସୁଥିବା ଭଗବାନ ସାହୁଙ୍କ ଏହି ଉକ୍ତି ଥିଲା ହୃଦୟବିଦାରକ ।

୫ ପୁଅ, ଜଣେ ଝିଅ । ସମସ୍ତେ ଘର ସଂସାର କରି ଭଲରେ ଅଛନ୍ତି । ପତ୍ନୀ ମଧ୍ୟ ଅଛନ୍ତି । ପ୍ରାୟ ୩୦୦ ଏକର ଜମିର ଅଂଶୀଦାର ଭଗବାନ । ହେଲେ ବଞ୍ଚିବାକୁ ରାହା ନାହିଁ । ପୁଅମାନଙ୍କ ଅକଥନୀୟ ଅତ୍ୟାଚାର ସହି ନପାରି କାଳିଆ ପାଖକୁ ଚାଲି ଆସିଥିଲେ । ଭଗବାନଙ୍କ ଘର ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ଦେଉଳିପାଟଣା । ବୟସ ୯୦କୁ ଦୁଇ କମ୍‌ । ଆଖିକୁ ଭଲଭାବେ ଦିଶୁନି । ଚାଲିବାକୁ ମଧ୍ୟ ବଳ ନାହିଁ । ତଥାପି ଉଠି ବସି ରାସ୍ତା ପାର ହେଉଥାନ୍ତି । ଚନ୍ଦନପୁର ଠାରେ ସ୍ୱେଚ୍ଛାସେବୀ ଓ ଟୁରିଷ୍ଟ ପୁଲିସ ପଚରାଉଚରା କରିବା ପରେ ବୀରପ୍ରତାପପୁରସ୍ଥିତ ନୀଳାଦ୍ରି ନିଳୟରେ ଭଗବାନଙ୍କୁ ଥଇଥାନ କରିଛନ୍ତି । ଜୀବନ ଯିବା ଭୟରେ ଗୁରୁବାର ସକାଳୁ ଘର ଛାଡ଼ିଥିଲେ ଭଗବାନ । ଭୁବନେଶ୍ୱର ଚନ୍ଦ୍ରଶେଖରପୁର ସ୍ଥିତ ଏକ ଭଡ଼ା ଘରେ ପୁଅ ପାଖରେ ଥିଲେ । ବ୍ୟାଙ୍କ ଯାଉଛି କହି ପକେଟରେ ପାସ୍‌ ବୁକ ପୂରାଇ ଥିଲେ ।

ଷ୍ଟେସନରେ ପହଞ୍ଚି ପ୍ଲାଟ୍‌ଫର୍ମ ଶେଷରେ ଅପେକ୍ଷା କରିଥିଲେ ଟ୍ରେନ୍‌ ଆସିବାକୁ । ସେଠାରେ ବୃଦ୍ଧଙ୍କୁ ରେଳବାଇ କର୍ମଚାରୀ ଘଟଣା କଣ ପଚାରିଥିଲେ । ବନ୍ଧୁଙ୍କୁ ଦେଖା ହେବି କହି ସେମାନଙ୍କୁ ଭୁତାଇ ଦେଇଥିଲେ ଭଗବାନ । କିଛି ସମୟ ପରେ ପୁରୀର କୁଶ ଚନ୍ଦ୍ର ନାମକ ଜଣେ ବ୍ୟକ୍ତି ତାଙ୍କ ଠାରୁ ସବୁ ଶୁଣିବା ପରେ ଆତ୍ମହତ୍ୟା କରିବାରୁ ନିବୃତ କରି ସାଙ୍ଗରେ ଘେନି ଆସିଥିଲେ । ପୁରୀ ଆସିବା ରାସ୍ତାରେ ପିପିଲି ପାଖାପାଖି ଏକ ଦୋକାନରେ ଭଗବାନଙ୍କୁ ବସାଇ ଫେରିବାର ଆଶ୍ୱସନା ଦେଇ କୁଶ ଚନ୍ଦ୍ର ଚାଲି ଯାଇଥିଲେ ।

ଇତି ମଧ୍ୟରେ ଫେସବୁକ୍‌ରୁ ସୂଚନା ପାଇ ସତ୍ୟବାଦୀର ଯୁବ ସ୍ୱେଚ୍ଛାସେବୀ ସନ୍ଦୀପ ମହାପାତ୍ରଙ୍କୁ ଖବର ଦେଇଥିଲେ କୁଶ । ଏପଟେ କାଳିଆକୁ ଆଶ୍ରା କରି ରାଜପଥରେ ଚାଲି ଚାଲି ଆଗେଇ ଥିଲେ ଭଗବାନ । ବେଶ କିଛି ବାଟ ଚାଲିବା ପରେ ସନ୍ଦୀପ ତାଙ୍କୁ ଚନ୍ଦନପୁର ନିକଟରେ ପାଇଥିଲେ । ଟୁରିଷ୍ଟ ପୁଲିସ ଓ କୁଶ ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ । ସେହି ରାତିରେ ହିଁ ତାଙ୍କୁ ବୃଦ୍ଧାଶ୍ରମରେ ଥଇଥାନ କରାଯାଇଥିଲା । ବର୍ତ୍ତମାନର ଆଶ୍ରୟସ୍ଥଳୀରେ ସେ ବେଶ୍‌ ଖୁସିରେ ଥିବା କହିଛନ୍ତି ।