ରାଜଧାନୀରେ ଗର୍ଜିଲା ବନ୍ଧୁକ:ପୂଜାମଣ୍ଡପରେ ତୀବ୍ର ଉତ୍ତେଜନା ,୩୦ ଅଭିଯୁକ୍ତଙ୍କୁ ଖୋଜୁଛି ପୁଲିସ

ଭୁବନେଶ୍ୱର ୧/୯ : ରାଜଧାନୀର ବରମୁଣ୍ଡା ଗାଁରେ କାଲି ସନ୍ଧ୍ୟାରେ ବନ୍ଧୁକ ଗର୍ଜିଛି । ବରମୁଣ୍ଡା ଗାଁର ପ୍ରଧାନ ସାହିରେ ୩୦ରୁ ଅଧିକ ଦୁର୍ବୃତ୍ତ ପଶି ଆତଙ୍କ ଖେଳାଇଛନ୍ତି । ଫାଙ୍କା ଗୁଳିଚାଳନା ସହ ସେଠାରେ ଥିବା ଗଣେଶ ପୂଜା ମଣ୍ଡପରେ ଭଙ୍ଗାରୁଜା କରିବା ସହ ୩ ଜଣଙ୍କୁ ମରଣାନ୍ତକ ଆକ୍ରମଣ କରିଛନ୍ତି । ଏଥିରେ ପ୍ରଧାନ ସାହିର ଜଗନ ରାଉତରାୟ (ଗୁଡୁ), ବିଜୟ ମହାପାତ୍ର (ବିଜୁ) ଓ ସିଲୁ ଆହତ ହୋଇଛନ୍ତି । ଦୁର୍ବୃତ୍ତମାନେ ଗୁଡୁଙ୍କ ପେଟରେ ଭୁଜାଲି ଭୁସିଛନ୍ତି । ଏନେଇ ଗାଁରେ ତୀବ୍ର ଉତ୍ତେଜନା ଦେଖାଦେଇଛି । ଖଣ୍ଡଗିରି ଥାନା ପୁଲିସ ଘଟଣାସ୍ଥଳରେ ପହଞ୍ଚି ତନାଘନା ଚଳାଇଛି ।

ସ୍ଥାନୀୟ ଲୋକଙ୍କ କହିବା ମୁତାବକ, ସମୟ ପ୍ରାୟ ସନ୍ଧ୍ୟା ୮ଟା ହେବ । ବରମୁଣ୍ଡା ବସ୍‌ଷ୍ଟାଣ୍ଡ ପଟୁ ମହିମା ମିଶ୍ର ଆବାସ ରାସ୍ତା ଦେଇ ବରମୁଣ୍ଡା ଗାଁ ଭିତରକୁ ୧୫-୨୦ ବାଇକ୍‌ ପଶିଥିଲା । ଏଥିରେ ପାଖାପାଖି ୩୦ ଜଣ ଦୁର୍ବୃତ୍ତ ବସିଥିଲେ । ସମସ୍ତେ ମୁହଁରେ ମୁଖା ପିନ୍ଧି ହାତରେ ବନ୍ଧୁକ, ଭୁଲାଜି, ଖଣ୍ଡା ଓ ପ୍ଲାଷ୍ଟିକ୍‌ ପାଇପ୍‌ ଧରିଥିଲେ । ସେମାନେ ପୂଜା ମଣ୍ଡପ ସାମ୍ନାରେ ଅଟକି ହଙ୍ଗାମା କରିଥିଲେ । ରାସ୍ତା ଉପରେ ବନ୍ଧୁକରୁ ଫାଙ୍କା ଫାୟାରିଂ କରିଥିଲେ । ମଣ୍ଡପରେ ଚେୟାର ଟେବୁଲ ଭଙ୍ଗାରୁଜା କରିଥିଲେ । ସେମାନଙ୍କୁ ଗୁଡୁ, ବିଜୁ ଓ ସିଲୁ ବିରୋଧ କରିଥିଲେ । ଦୁର୍ବୃତ୍ତମାନେ ମିଳିତ ଭାବେ ଏମାନଙ୍କ ଉପରେ ଝାମ୍ପି ପଡି଼ ପ୍ରବଳ ମାଡ଼ ମାରିଥିଲେ । ପିଲାମାନଙ୍କୁ ଆକ୍ରମଣ ହେଉଥିବା ଦେଖି ଗାଁ ଲୋକ ଏକାଠି ହୋଇ ମଣ୍ଡପ ଆଡ଼କୁ ମାଡି଼ ଆସିଥିଲେ । ଏହାଦେଖି ଦୁର୍ବୃତ୍ତମାନେ ଘଟଣାସ୍ଥଳରୁ ଛତ୍ରଭଙ୍ଗ ଦେଇଥିଲେ ।

ଗାଁ ଲୋକ ଆହତମାନଙ୍କୁ ତୁରନ୍ତ କ୍ୟାପିଟାଲ ହସ୍ପିଟାଲକୁ ନେଇଥିଲେ । ଖଣ୍ଡଗିରି ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା । ଅଭିଯୁକ୍ତଙ୍କୁ ଗିରଫ ଦାବିରେ ଗାଁ ଲୋକ ରାସ୍ତା ଅବରୋଧ କରିଥିଲେ । ପୁଲିସ ବୁଝାସୁଝା କରିବା ପରେ ପରିସ୍ଥିତି ଥମିଥିଲା । ଖଣ୍ଡଗିରି ଥାନାରେ ଏନେଇ ଏକ ଅଭିଯୋଗ ହୋଇଛି । ପୁଲିସ କହିଛି, ଅଭିିଯୁକ୍ତମାନେ ସମସ୍ତେ ହାଉସିଂ ବୋର୍ଡ କଲୋନିର । ଏମାନେ ବରମୁଣ୍ଡା ଶିଶୁମନ୍ଦିର ପାଖରେ ଖଟି କରନ୍ତି । ଗତକାଲି ବରମୁଣ୍ଡା ବସ୍‌ଷ୍ଟାଣ୍ଡରେ ଥିବା ମଦ କାଉଣ୍ଟର ନିକଟରେ କୌଣସି କାରଣରୁ ପ୍ରଧାନ ସାହିର କିଛି ଯୁବକଙ୍କ ସହ ଅଭିଯୁକ୍ତମାନଙ୍କର ଝଗଡ଼ା ହୋଇଥିଲା । ସେଇଠୁ ବିବାଦ ଆରମ୍ଭ ହୋଇଛି । ଅଭିଯୁକ୍ତମାନଙ୍କୁ ଧରିବାକୁ ଚେଷ୍ଟା ଚାଲିଛି ।

   ସମ୍ବନ୍ଧିତ ଖବର


ବିବାହକୁ ଅକ୍ଷୁଣ୍ଣ, ସ୍ଥାୟୀ କରିବାକୁ ବର୍ଷାଙ୍କ ପିଟିସନ୍‌; ଅନୁଭବଙ୍କୁ ପରିବାର ଅଦାଲତରୁ ନୋଟିସ୍‌

ଅସ୍ତ୍ରଶସ୍ତ୍ର ଧରି ଦୁଇଟି ଜେଲ ଉପରେ ଉତ୍ୟକ୍ତ ଲୋକଙ୍କ ଆକ୍ରମଣ,୨୦୦୦ କଏଦୀ ଫେରାର

ଖଣ୍ଡଗିରିରୁ ଯୁବକଙ୍କୁ ଉଠାଇନେଲା NIA, ଅଜ୍ଞାତ ସ୍ଥାନରେ କରୁଛି ପଚରାଉଚରା

ବାଡିରୁ ଫୁଲ ତୋଳିଦେଲା ବୋଲି, ଦିବ୍ୟାଙ୍ଗ ନାବାଳିକାକୁ ନିସ୍ତୁକ ମାଡ ମାରିଲେ ପଡୋଶୀ…

ସାବଧାନ ! ପାର୍ବଣରେ ମାତିଛନ୍ତି ଲୁଟେରା, ଜୋର୍ ଜବରଦସ୍ତ ମହିଳାଙ୍କ ଠାରୁ ଝାମ୍ପିନେଲେ କାନଫୁଲ…

ରାସ୍ତାରେ ଝାଡୁମାରି ଚର୍ଚ୍ଚାରେ ଥିବା ଟ୍ରାଫିକ୍ କନେଷ୍ଟବଳଙ୍କୁ ସମ୍ବର୍ଦ୍ଦିତ କଲେ କମିଶନର…