ଭୁବନେଶ୍ଵର, ୨୬/୨ : ରାଜ୍ୟରେ ମଣ୍ଡି ସମସ୍ୟା ଲାଗି ରହିଛି। ଆଜି ବିଧାନସଭାରେ ଶୂନ୍ୟକାଳରେ ମଣ୍ଡି ସମସ୍ୟା ଉଠାଇ ବିଜେପି ନେତା ହୋହାଲ୍ଲା କରିଛନ୍ତି। ମଣ୍ଡି ଗୁଡିକରୁ ତୁରନ୍ତ ଧାନ ଉଠାଇବାକୁ ଦାବି କରିଛନ୍ତି। ଯଦି ମଣ୍ଡିରୁ ଧାନ ନଉଠିବ ତେବେ ଆତ୍ମହତ୍ୟା କରିବେ ବୋଲି ଧମକ ଦେଇଛନ୍ତି ବିଜେପି ବିଧାୟକ ସୁବାସ ପାଣିଗ୍ରାହୀ।
ବିଧାନସଭାରେ ପ୍ରଶ୍ନକାଳ ସମୟରେ ଧାନ ମଣ୍ଡି ସମସ୍ୟା ନେଇ ସୁବାସ ପାଣିଗ୍ରାହୀ ଗୃହର ମଧ୍ୟ ଭାଗକୁ ଉଠି ଆସିଥିଲେ। ଫଳରେ ତାଙ୍କୁ ବାଚସ୍ପତି ଆସନକୁ ଫେରିଯିବାକୁ କହିଥିଲେ ଓ ଶୂନ୍ୟକାଳରେ ସୁଯୋଗ ଦେବେ ବୋଲି କହିଥିଲେ। ଏହାପରେ ଶୂନ୍ୟକାଳରେ ସୁବାସ ପାଣିଗ୍ରାହୀ ଅଭିଯୋଗ ଆଣିଥିଲେ ଯେ, ଟୋକନରେ ବ୍ୟାପକ ଅବ୍ୟବସ୍ଥା କାରଣରୁ ଚାଷୀମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି କିନ୍ତୁ ଏଥିପ୍ରତି ସରକାର କୌଣସି ପଦକ୍ଷେପ ନେଉ ନାହାଁନ୍ତି। ତେଣୁ ମଣ୍ଡି ସମସ୍ୟାର ସମାଧାନ ନହେଲେ ସେ ଆତ୍ମହତ୍ୟା କରିବେ ବୋଲି ଧମକ ଦେଇଛନ୍ତି।