ନୂଆଦିଲ୍ଲୀ: ଲୋକସଭା ନିର୍ବାଚନ ପାଇଁ ଶନିବାର ବିଜେପି ଆଉ ଏକ ପ୍ରାର୍ଥୀ ତାଲିକା ଜାରି କରିଛି, ଯେଉଁଥିରେ ଦଳ ଜଣାଶୁଣା ଓକିଲ ଉଜୱାଲ ନିକାମଙ୍କୁ ମୁମ୍ବାଇ ଉତ୍ତର ସେଣ୍ଟ୍ରାଲର ପ୍ରାର୍ଥୀ କରିଛି । ଉଜୱାଲ ନିକାମ ହେଉଛନ୍ତି ସେହି ଓକିଲ, ଯିଏକି 26/11 ଆକ୍ରମଣରେ ଧରାପଡିଥିବା ଆତଙ୍କବାଦୀ ଅଜମଲ କସାବ ବିରୋଧରେ ଅଦାଲତରେ ଲଢୁଥିଲେ । ଆଉ ଶେଷରେ ତାକୁ ଫାଶୀ ଖୁଣ୍ଟରେ ଝୁଲାଇଥିଲେ । ତେବେ ପୁନମ ମହାଜନ ବର୍ତ୍ତମାନ ଏହି ଆସନରୁ ସାଂସଦ ଅଛନ୍ତି, ଯାହାର ଟିକେଟ୍ ବିଜେପି ବାତିଲ କରିଛି । ମେ ୨୦ରେ ମୁମ୍ବାଇ ଉତ୍ତର ସେଣ୍ଟ୍ରାଲ ଆସନ ପାଇଁ ନିର୍ବାଚନ ଅନୁଷ୍ଠିତ ହେବ । ପୁନମ ମହାଜନ ୨୦୧୪ ଏବଂ ୨୦୧୯ ରେ ଏହି ଆସନରୁ ଜିତିଥିଲେ । ବିରୋଧୀଦଳକୁ ଦୃଷ୍ଟିରେ ରଖି ମୁମ୍ବାଇ ଉତ୍ତର ସେଣ୍ଟ୍ରାଲରୁ ବିଜେପି ଏକ ନୂଆ ଚେହେରା ଦେଇଛି ବୋଲି ରାଜନୈତିକ ବିଶେଷଜ୍ଞ ମାନେ କହିଛନ୍ତି । 

ଗତ ନିର୍ବାଚନରେ ମଧ୍ୟ ବିଜେପି ଜାଲଗାଓଁରୁ ଆସିଥିବା ଉଜୱାଲ ନିକାମଙ୍କୁ ଟିକେଟ୍ ଦେବାକୁ ଚାହୁଁଥିଲା । ମୁମ୍ବାଇ ଆକ୍ରମଣ ବ୍ୟତୀତ ସେ ଅନ୍ୟାନ୍ୟ ମାମଲା ସହ ଲଢିଛନ୍ତି । ୨୦୧୬ ମସିହାରେ ଭାରତ ସରକାର ନିକାମଙ୍କୁ ପଦ୍ମଶ୍ରୀ ପୁରସ୍କାର ପ୍ରଦାନ କରିଥିଲେ। ଉଜୱାଲ ନିକାମଙ୍କୁ Z ପ୍ଲସ୍ ସୁରକ୍ଷା ମିଳିଛି । ନିକାମଙ୍କ ଜନ୍ମ ମହାରାଷ୍ଟ୍ରର  ଜାଲଗାଓଁରେ ଏକ ମରାଠୀ ପରିବାରରେ। ତାଙ୍କ ପିତା ଦେବରାବଜି ନିକାମ ଜଣେ ବିଚାରପତି ଏବଂ ବାରିଷ୍ଟର ଥିଲେ ଏବଂ ତାଙ୍କ ମା ଜଣେ ଗୃହିଣୀ ଥିଲେ । ବିଜ୍ଞାନରେ ଡିଗ୍ରୀ ହାସଲ କରିବା ପରେ ସେ କେସିଏରୁ ଆଇନ ଡିଗ୍ରୀ ହାସଲ କରିଥିଲେ । ତାଙ୍କ ପୁଅ ଅନିକେତ ମଧ୍ୟ ମୁମ୍ବାଇ ହାଇକୋର୍ଟରେ ଅପରାଧୀ ଓକିଲ ରହିଛନ୍ତି ।

ନିକାମ ଜାଲଗାଓଁରେ ଜଣେ ଜିଲ୍ଲା ଓକିଲ ଭାବରେ ନିଜର କ୍ୟାରିଅର୍ ଆରମ୍ଭ କରିଥିଲେ ଏବଂ ରାଜ୍ୟ ତଥା କେନ୍ଦ୍ର ପାଇଁ ଅନେକ ମାମଲା ଲଢିଛନ୍ତି । ୩୦ ବର୍ଷର କ୍ୟାରିଅରରେ ସେ ୬୨୮ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡ ଏବଂ ୩୭ ଜଣଙ୍କୁ ମୃତ୍ୟୁଦଣ୍ଡ ଦେଇଛନ୍ତି।