ବଣ୍ଟି ଔର ବବଲି ୨ର ଟ୍ରେଲର ରିଲିଜ୍ : ପୁରୁଣା ନୂଆଙ୍କ ଭିତରେ ଚାଲିବ ଲୁଚକାଳି ଖେଳ, ଦେଖନ୍ତୁ ଟ୍ରେଲର…

ନୂଆଦିଲ୍ଲୀ, ୨୫/୧୦ : ସୈଫ ଅଲ୍ଲୀ ଖାନ ଏବଂ ରାଣୀ ମୁଖାର୍ଜୀଙ୍କ ଷ୍ଟାରର ଫିଲ୍ମ ବଣ୍ଟି ଔର ବବଲି ୨ର ଟ୍ରେଲର ରିଲିଜ୍ ହୋଇଛି। ଟ୍ରେଲରରେ ବଣ୍ଟି ଏବଂ ବବଲିଙ୍କ ସେହି ପୁରୁଣା ଯୋଡିର ଝଲକ ଦେଖିବାକୁ ମିଳୁଛି। ହେଲେ ଏଥର ପୁରୁଣା ବଣ୍ଟି ଓ ବବଲିଙ୍କୁ ନୂଆ ବଣ୍ଟି-ବବଲି ଚକ୍‌ମା ଦେବେ।

ଟ୍ରେଲରେ ଦେଖିବାକୁ ମିଳିଛି ଯେ, ପ୍ରକୃତ ବଣ୍ଟି ଏବଂ ବବଲି ତାଙ୍କର ପୁରୁଣା ଅଭ୍ୟାସ ଛାଡି ବୈବାହିକ ଜୀବନ ଆରମ୍ଭ କରି ସାରିଛନ୍ତି। ବଣ୍ଟି ଏକ ରେଲୱେ ଷ୍ଟେସନରେ ଟିକେଟ୍ କାଟିବା କାମ କରୁଛନ୍ତି। ସୁରୁଖୁରୁରେ ବବଲି ସହ ତାଙ୍କର ବୈବାହିକ ଜୀବନ କଟୁଛି। ହେଲେ ଅଚାନକ ତାଙ୍କ ନାଁରେ ଆଉ ୨ ଜଣ ବଣ୍ଟି ଓ ବବଲି ଏଣ୍ଟ୍ରି ମାରୁଛନ୍ତି। ହେଲେ ପୋଲିସ ପୁରୁଣା ବଣ୍ଟି ଓ ବବଲିଙ୍କୁ ସନ୍ଦେହ କରୁଛି। ଏହାପରେ ଅସଲି ବଣ୍ଟି ଓ ବବଲି ନକଲିଙ୍କୁ ଧରିବା ପାଇଁ ମିଶନ ଆରମ୍ଭ କରୁଛନ୍ତି। ହେଲେ ସେ ଏହି ମିଶନରେ ସଫଳ ହେଉଛନ୍ତି କି ନାହିଁ ତାହା ଦର୍ଶକ ଫିଲ୍ମରେ ଦେଖିବାକୁ ପାଇବେ।

ସିଦ୍ଧାନ୍ତ ଚତୁର୍ବେଦୀ ଏବଂ ଶରବରୀ ନୂଆ ବଣ୍ଟି-ବବଲି ଭୂମିକାରେ ଅଭିନୟ କରିଛନ୍ତି। ପଙ୍କଜ ତ୍ରିପାଠୀ ପୋଲିସ ଭୂମିକାରେ ଅଭିନୟ କରିଛନ୍ତି। ଏହି ଭୂମିକାରେ ଗତ ଥର ଅମିତାଭ ବଚ୍ଚନ ଅଭିନୟ କରିଥିଲେ। ବରୁଣ ବି ଶର୍ମାଙ୍କ ନିର୍ଦ୍ଦେଶନାରେ ନିର୍ମିତ ଏହି ଫିଲ୍ମ ଏବେ ଫ୍ୟାନ୍ସଙ୍କ ଏକ୍ସସାଇଟ୍‌ମେଣ୍ଟ୍ ଆହୁରି ବଢେଇ ଦେଇଛି। ଏହି ଫିଲ୍ମ ନଭେମ୍ବର ୧୯ରେ ରିଲିଜ୍ ହେବାକୁ ଯାଉଛି।