କଶ୍ମୀରରୁ ଜୈଶକୁ ସଫା ନକଲା ପର୍ଯ୍ୟନ୍ତ ଜାରି ରହିବ ଅପରେଶନ: ସେନା
ନୂଆଦିଲ୍ଲୀ,୧୧।୩: ପୁଲଓ୍ବାମା ଆକ୍ରମଣ ଘଟଣାର ମାଷ୍ଟରମାଇଣ୍ଡ ଆଜି ସେନା ପକ୍ଷରୁ ହୋଇଥିବା ଅପରେସନରେ ନିହତ ହୋଇଛି। ଏହି ଅବସରରେ ସେନାର ଲେଫ୍ଟନେଣ୍ଟ ଜେନେରାଲ କେଜିଏସ୍ ଧିଲୋନଙ୍କ ପକ୍ଷରୁ କୁହାଯାଇଛି କଶ୍ମୀରରୁ ଜୈଶକୁ ସଫା ନକଲା ପର୍ଯ୍ୟନ୍ତ ଅପରେଶନ୍ ଜାରି ରହିବ। ଏନକାଉଣ୍ଟର ବେଳେ ଲୋକଙ୍କ ଜୀବନକୁ ସମ୍ପୂର୍ଣ୍ଣ ଧ୍ୟାନରେ ରଖି ପଦକ୍ଷେପ ନେଇଥାଉ। ଏଥିରେ ସାଧାରଣ ଲୋକଙ୍କୁ ଯେଉଁଭଳି କ୍ଷତି ନହୁଏ ତାହା ପ୍ରଥମେ ଦେଖିଥାଉ। ଗତ ୭୦ ଦିନ ଭିତରେ ୪୪ ଜଣ ଆତଙ୍କବାଦୀଙ୍କୁ ମାରିବାରେ ଆମକୁ ସଫଳତା ମିଳିଛି। ଏହା ସହ ନିୟନ୍ତ୍ରଣ ରେଖାରେ ୨୦୧୮ରେ ୧୬୨୯ ଥର ଅସ୍ତ୍ରବିରତୀ ନୀତିର ଉଲଂଘନ କରାଯାଇଥିଲା। ଚଳିତ ବର୍ଷ ଏପର୍ଯ୍ୟନ୍ତ ୪୭୮ ଥର ଏହା ହୋଇସାରିଲାଣି।
କଶ୍ମୀର ଘାଟିରେ ଜୈଶ ଆତଙ୍କବାଦୀଙ୍କ ବିରୋଧରେ ସୁରକ୍ଷାକର୍ମୀଙ୍କ ଏନକାଉଣ୍ଟର ଶେଷ ହୋଇଯାଇଛି। ଅପରେସନରେ ସୁରକ୍ଷାବଳକୁ ବଡ ସଫଳତା ମିଳିଛି। ସେନାର ଏନକାଉଣ୍ଟରରେ ଜୈଶର କମାଣ୍ଡର ମୁଦ୍ଦାସିର ଖାନ୍ ନିହତ ହୋଇଛି। ଆଜି ସକାଳେ ସୁରକ୍ଷାବଳ ଦକ୍ଷିଣ କଶ୍ମୀରର ପୁଲଓ୍ବାମା ଜିଲ୍ଲା ତ୍ରାଲ ଅଞ୍ଚଳର ପିଙ୍ଗଲିଶରେ ଘେରାଉ କରି ତଲାସୀ ଅଭିଯାନ ଆରମ୍ଭ କରିଛି। ଏହି ଅଞ୍ଚଳରେ ଆତଙ୍କବାଦୀଙ୍କ ଉପସ୍ଥିତି ସମ୍ପର୍କରେ ଗୁଇନ୍ଦା ସୂଚନା ମିଳିବା ପରେ ଏନକାଉଣ୍ଟର ହୋଇଥିଲା।
