ଭୁବନେଶ୍ୱର,୧୪/୦୭: ହସ୍ପିଟାଲ ପାଲଟିଛି କରୋନା ହଟ୍‌ସ୍ପଟ । ଡାକ୍ତର, ନର୍ସ ହେଉ କି ରୋଗୀ, ସବୁଦିନ ନୂଆ ସଂକ୍ରମଣ ଖବର ସାମ୍ନାକୁ ଆସୁଛି । କ୍ୟାପିଟାଲ ହସ୍ପିଟାଲରେ ରବିବାର ମେଡିସିନ୍‌ ବିଭାଗର ଜଣେ ମେଡିସିନ୍‌ ଡାକ୍ତର ସଂକ୍ରମିତ ହୋଇଥିଲେ । ଏହା ପରେ କ୍ୟାପିଟାଲ ହସ୍ପିଟାଲକୁ ବି ବିପଦ ଘନେଇଛି । ପୂର୍ବରୁ ଦୁଇ ଜଣ ଷ୍ଟାଫ୍‌ ନର୍ସ ମଧ୍ୟ ସଂକ୍ରମିତ ହୋଇଥିଲେ। ମେଡିସିନ୍‌ ଓପିଡିରୁ ସଂକ୍ରମିତ ଚିହ୍ନଟ ହେବା ପରେ ଗତକାଲି ମେଡିସିନ୍‌ ଓପିଡିକୁ ବନ୍ଦ କରିଦେଇଛନ୍ତି ହସ୍ପିଟାଲ କର୍ତ୍ତୃପକ୍ଷ । ଏହା ସହ ଓପିଡିକୁ ସାନିଟାଇଜ୍‌ କରାଯାଇଛି । ମଙ୍ଗଳବାର ମଧ୍ୟ ସାନିଟାଇଜ୍‌ ହେବ।

ଓପିଡି ଆଜି ମଧ୍ୟ ବନ୍ଦ ରହିବ । ତେବେ ବୁଧବାର ଦିନ ଓପିଡି ଖୋଲା ରହିବ । ଏପଟେ ଓପିଡିରେ ଡ୍ୟୁଟି କରିଥିବା ସମସ୍ତ ଡାକ୍ତରଙ୍କ କରୋନା ପରୀକ୍ଷା କରାଯିବ । ପଜିଟିଭ୍‌ ଡାକ୍ତରଙ୍କ ସଂସ୍ପର୍ଶରେ ଆସିଥବା ୨୨ ଜଣଙ୍କୁ ଚିହ୍ନଟ କରାଯାଇଛି । ଆଜି ସେମାନଙ୍କ ନମୁନା ପରୀକ୍ଷା କରାଯିବ । ଏ ପଟେ ସୋମବାର ମେଡିସିନ୍‌ ଭଳି ଗୁରତ୍ୱପୂର୍ଣ୍ଣ ବିଭାଗଓ ଓପିଡି ବନ୍ଦ ଥିବାରୁ ରୋଗୀ ବହୁତ ହଇରାଣ ହୋଇଛନ୍ତି । ଅନେକ ରୋଗୀ କାଜୁଆଲଟିରେ ଡାକ୍ତର ଦେଖାଇଛନ୍ତି । କାଜୁଆଲଟିରେ ମଧ୍ୟ ଡାକ୍ତରଙ୍କ ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଯାଇଛି । ତେବେ କାଜୁଆଲଟିରେ କେବଳ ଡାକ୍ତରଙ୍କୁ ପିପିଇ ଦିଆଯାଇଥିବା ବେଳେ ହସ୍ପିଟାଲ ଆଟେଣ୍ଡାଣ୍ଟଙ୍କୁ କିଛି ଦିଆଯାଇନି ।