ଭୁବନେଶ୍ୱର୦୪/୦୩ : ରାଜଧାନୀରେ ରାତି ପାହିଲେ ଚୋରି ଆଉ ଲୁଟ୍ । ଡକାୟତି ଓ ରାହାଜାନି ବି ପ୍ରବଳ । ମଙ୍ଗଳବାର ଅପରାହ୍ଣରେ ଜନ ଗହଳିପୂର୍ଣ୍ଣ ସ୍ଥାନ ଶ୍ରୀୟା ଛକରୁ କାର୍ କାଚ ଭାଙ୍ଗି ୧ ଲକ୍ଷ ୨୦ ହଜାର ଟଙ୍କା ଲୁଟି ନେଇଛନ୍ତି । ଲୁଟ୍ର ଶିକାର ହୋଇଛନ୍ତି ଲକ୍ଷ୍ମୀସାଗର ଥାନା ବମିଖାଲରେ ରହୁଥିବା ବ୍ୟବସାୟୀ କୃଷ୍ଣପ୍ରିୟା ପଟ୍ଟନାୟକ । ଏନେଇ ସେ ଖାରବେଳନଗର ଥାନାରେ ଅଭିଯୋଗ କରିଛନ୍ତି । ଏଥିରେ ବାଂଲାଦେଶୀ ଲୁଟେରା ସଂପୃକ୍ତ ଥିବା ଆଶଙ୍କାରେ ପୁଲିସ ଆରମ୍ଭ କରିଛି ତନାଘନା ।
ମିଳିଥିବା ସୂଚନା ମୁତାବକ, ବମିଖାଲ କୃଷ୍ଣପ୍ରିୟାଙ୍କ ଏକ ସାନିଟାରୀ ଦୋକାନ ରହିଛି । ବୁଧବାର ଦିନ ସେ କୌଣସି କାମରେ ଖାରବେଳ ନଗର ଆସିଥିଲେ । ପ୍ରଥମେ ସେ ବ୍ୟାଙ୍କ୍କୁ ଯାଇ ୧ଲକ୍ଷ ୨୦ ହଜାର ଟଙ୍କା ଉଠାଇ ଥିଲେ । ନରୁଲା ବିଲ୍ଡିଂ ପାଖରେ ଗାଡ଼ି ରଖି ନିକଟକୁ କୌଣସି କାମରେ ଯାଇଥିଲେ । ଗାଡିରେ ଟଙ୍କା ବ୍ୟାଗ୍ ଥିଲା । କିଛି ସମୟ ପରେ ସେ ଫେରି ଦେଖିଥିଲେ ଗାଡିର କାଚ ଭାଙ୍ଗିବା ସହ ସିଟ୍ରେ ଟଙ୍କା ବ୍ୟାଗ୍ ନାହିଁ । ଟଙ୍କା ଲୁଟ୍ ହୋଇଥିବା ଜାଣି ସେ ଖାରବେଳ ନଗର ଥାନାକୁ ଫୋନ୍ କରିଥିଲେ । ପୁଲିସ୍ ଘଟଣାସ୍ଥଳରେ ଲାଗିଥିବା ସିସି ଟିଭି ଫୁଟେଜକୁ ଯାଞ୍ଚ କରିଥିଲେ । ହେଲେ ଲୁଟେରାଙ୍କ ବିଷୟରେ ଟେର ମିଳି ନଥିଲା । କେବଳ ଏହି ଘଟଣା ନୁହେଁ, ରାଜଧାନୀରେ ଗୋଟିଏ ସପ୍ତାହ ଭିତରେ ୫୫ରୁ ଅଧିକ ଲୁଟ୍ ହୋଇଥିବା ଥାନାରେ ଅଭିଯୋଗ ହୋଇଛି ।