ଚୀନ୍ ଉପରେ ବଢ଼ିବ କଟକଣା: ଫର୍ଣ୍ଣିଚର, ଖେଳନା ଓ ସ୍ପୋର୍ଟସ ସାମଗ୍ରୀ ଆମଦାନି ପାଇଁ ଲାଇସେନ୍ସ ବାଧ୍ୟତାମୂଳକ
ନୂଆଦିଲ୍ଲୀ,୪/୦୮: ଭାରତ ପକ୍ଷରୁ ଚୀନ୍ ସାମଗ୍ରୀ ଉପରେ କ୍ରମାଗତ ଭାବେ କଟକଣା ଲାଗୁ କରାଯାଉଛି । ସେଠାରୁ ଆସୁଥିବା ନିମ୍ନମାନର ଉତ୍ପାଦକୁ ଦେଶକୁ ପଶାଇ ନ ଦେବା ପାଇଁ ସବୁ ପ୍ରକାର ରଣନୀତି ଆପଣାଉଛନ୍ତି କେନ୍ଦ୍ର ସରକାର। ଏହି କ୍ରମରେ ପୂର୍ବରୁ ଅନେକ ସାମଗ୍ରୀ ଉପରେ କଟକଣା ଲାଗୁ କରାଯାଇଛି । ଆଗକୁ ଆସବାବପତ୍ର, ଖେଳନା ଏବଂ ସ୍ପୋର୍ଟସ ସାମଗ୍ରୀ ଆଦି ଆମଦାନି ପାଇଁ ଲାଇସେନ୍ସ ବାଧ୍ୟତାମୂଳକ କରିବାକୁ ନିଷ୍ପତ୍ତି ହୋଇଛି । ଆତ୍ମନିର୍ଭର ଭାରତ ଅଭିଯାନକୁ ତ୍ୱରାନ୍ୱିତ କରିବା ପାଇଁ କ୍ରମାଗତ ଭାବେ ସରକାର ଏଭଳି ପଦକ୍ଷେପ ନେଉଛନ୍ତି ।
ଏ ନିଷ୍ପତ୍ତି ଜରିଆରେ ଆମଦାନି ହ୍ରାସ ପାଇବ ଏବଂ ଘରୋଇ ଉତ୍ପାଦନ ବଢ଼ିବ ବୋଲି ଜଣେ ଅଧିକାରୀ ନିଜ ନାମ ଗୋପନ ରଖି କହିଛନ୍ତି । ଟାୟାର୍ ଏବଂ ଟିଭି ଆମଦାନି କ୍ଷେତ୍ରରେ ପୂର୍ବରୁ ଭାରତ ସରକାର ଲାଇସେନ୍ସ ବ୍ୟବସ୍ଥା ଲାଗୁ କରିସାରିଛନ୍ତି ।
ସୂଚନାଯୋଗ୍ୟ, ଦେଶକୁ ଆସୁଥିବା ମୋଟ ଟାୟାର ଏବଂ ଟିଭି କ୍ଷେତ୍ରରେ ଚୀନ୍ର ସିଂହଭାଗ ଅଂଶ ରହିଛି । ଆମଦାନିକୁ ବ୍ୟୟବହୁଳ କରିବା ପାଇଁ ସରକାର କେତେକ ନିର୍ଦ୍ଦିଷ୍ଟ ସାମଗ୍ରୀର ଆମଦାନି ଶୁଳ୍କ ବୃଦ୍ଧି କରିବା ପାଇଁ ଯୋଜନା କରୁଥିବା ଜଣାଯାଇଛି । ଏସବୁ ସାମଗ୍ରୀର ବାଉଣ୍ଡ୍ ଟାରିଫ୍ ବଢ଼ାଇବା ପାଇଁ ବିଚାର କରାଯାଉଛି ।
ସୂଚନାଯୋଗ୍ୟ, ବାଉଣ୍ଡ୍ ଟାରିଫ ହେଉଛି ବିଶ୍ୱ ବାଣିଜ୍ୟ ସଂଘ(ଡବ୍ଲ୍ୟୁଟିଓ) ଦ୍ୱାରା ନିର୍ଦ୍ଧାରିତ ଦର, ଯାହାଠାରୁ ଅଧିକ ଶୁଳ୍କ ରାଷ୍ଟ୍ରଗୁଡିକ ବଢ଼ାଇପାରିବେ ନାହିଁ। ଆମଦାନି ଶୁଳ୍କ ବଢ଼ାଇ ମଧ୍ୟ ଆମଦାନି ହ୍ରାସ ହୋଇପାରୁନାହିଁ । ଏଭଳି କ୍ଷେତ୍ରରେ ଲାଇସେନ୍ସିଂ ବ୍ୟବସ୍ଥାକୁ ଆପଣାଇବା ପାଇଁ ସରକାର ନିଷ୍ପତ୍ତି ନେଇଥିବା ଜଣେ ଅଧିକାରୀ ନାମ ଗୋପନ ରଖି ପ୍ରକାଶ କରିଛନ୍ତି ।
ଆମଦାନି ବୃଦ୍ଧିକୁ ଉଚ୍ଚ ଟାରିଫ କାଟୁ ହେଉ ନ ଥିବା ସେ କହିଛନ୍ତି । ଲାଇସେନ୍ସ ଆବଶ୍ୟକତା ଏକ ଅଣ-ଟାରିଫ୍ ବାଧକ ହେବ । ଏହା ଆମଦାନିକୁ ସଙ୍କୁଚିତ କରିବ । ମୁକ୍ତ ବାଣିଜ୍ୟ ରାଜିନାମା(ଏଫ୍ଟିଏ) ମାଧ୍ୟମରେ ଦେଶକୁ ବୃହତ୍ ମାତ୍ରାରେ ନିମ୍ନମାନର ସାମଗ୍ରୀ ଆସୁଥବା ଅଧିକାରୀଜଣକ କହିଛନ୍ତି ।
ଷ୍ଟାଣ୍ଡାର୍ଡ ଏବଂ ସ୍ପେସାଲ ଫର୍ଣ୍ଣିଚର, ଏୟାର୍ କଣ୍ଡିସନର, ଚମଡା, ଫୁଟ୍ୱେର୍, ଆଗ୍ରୋ-କେମିକାଲ୍ସ, ରେଡି-ଟୁ-ଇଟ୍ ଫୁଡ୍, ଷ୍ଟିଲ, ଆଲୁମିନିୟମ୍, କପର, ଟେକ୍ଷ୍ଟାଇଲ୍, ଇ-ଯାନ, ଅଟୋ ଯନ୍ତ୍ରାଂଶ, ଟିଭି ସେଟ୍- ଅପ୍ ବକ୍ସ, ସିସିଟିଭି, ସ୍ପୋର୍ଟସ ଗୁଡ୍, ଇଥାନଲ, ବାୟୋଫୁଏଲ୍ ଏବଂ ଖେଳନା ଆଦି ସାମଗ୍ରୀ ଉପରେ ଆମଦାନି କଟକଣା ଲଗାଇବା ପାଇଁ ସରକାର ଶିଳ୍ପଗୁଡିକର ପରାମର୍ଶ ନେଉଥିବା ଜଣାଯାଇଛି ।
