ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଆପ୍ ସାଂସଦ ସ୍ବାତୀ ମାଲିଓ୍ବାଲଙ୍କ ଅଭିଯୋଗ ଉପରେ ପ୍ରଥମ ଥର ପ୍ରତିକ୍ରିୟା ଦେଇଛନ୍ତି । ଏହି ମାମଲାରେ ନିରପେକ୍ଷ ତଦନ୍ତ ଏବଂ ନ୍ୟାୟ ଚାହୁଁଛି ବୋଲି ପିଟିଆଇକୁ ଦେଇଥିବା ସାକ୍ଷାତକାରରେ କହିଛନ୍ତି ଅରବିନ୍ଦ କେଜ୍ରିଓ୍ବାଲ । ସେ କହିଛନ୍ତି, ‘ମାମଲା ଏବେ କୋର୍ଟରେ ଅଛି । ମୁଁ ଟିପ୍ପଣୀ କଲେ ତଦନ୍ତ ପ୍ରକ୍ରିୟା ଉପରେ ପ୍ରଭାବ ପଡ଼ିପାରେ । କିନ୍ତୁ ମୋର ବିଶ୍ବାସ ନିରପେକ୍ଷ ତଦନ୍ତ ହେବ । ଦୁଇ ପକ୍ଷକୁ ଶୁଣି ପୋଲିସ ନିରପେକ୍ଷ ତଦନ୍ତ କରୁ । ନ୍ୟାୟ ମିଳିବା ଦରକାର ।’ ଘଟଣା ସମୟରେ ସେ ଘରେ ଥିଲେ କି ବୋଲି ପ୍ରଶ୍ନରେ କେଜ୍ରିଓ୍ବାଲ ‘ନା’ ବୋଲି କହିଛନ୍ତି ।
ଦିଲ୍ଲୀ ମହିଳ ଆୟୋଗର ପୂର୍ବତନ ଅଧ୍ୟକ୍ଷା ସ୍ବାତୀ ମାଲିଓ୍ବାଲ ମେ’ ୧୩ରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ବାସଭବନ ଯାଇଥିଲେ । ଏହି ସମୟରେ ସିଏମଙ୍କ ପିଏ ବିଭବ କୁମାର ତାଙ୍କୁ ମାରପିଟ କରିଥିଲେ । ଏନେଇ ସେ ପିସିଆରକୁ କଲ କରିଥିଲେ । ହେଲେ ମେ’ ୧୩ରେ ଥାନାରେ ଅଭିଯୋଗ କରିନଥିଲେ ସ୍ବାତୀ ମାଲିଓ୍ବାଲ ।
ଏହାର ଦୁଇ ଦିନ ପରେ ପୋଲିସ ତାଙ୍କର ବୟାନ ରେକର୍ଡ କରିଥିଲା । ଏହି ଆଧାରରେ ଏଫଆଇଆର ରୁଜୁ କରିବା ସହ ବିଭବ କୁମାରଙ୍କୁ ଗିରଫ କରିଛି । ସେପଟେ ଆମ ଆଦମୀ ପାର୍ଟିର ଦାବି ଯେ, ସ୍ବାତୀ ମାଲିଓ୍ବାଲ ବିଜେପି ଚକ୍ରାନ୍ତର ଜଣେ ମୋହରା । ଅରବିନ୍ଦ କେଜ୍ରିଓ୍ବାଲଙ୍କୁ ମିଥ୍ୟା ଅଭିଯୋଗରେ ଫସାଇବା ସ୍ବାତୀଙ୍କ ଉଦ୍ଦେଶ୍ୟ ଥିଲା । ଅନ୍ୟପକ୍ଷରେ ଆଜି ସ୍ବାତୀ ମାଲିଓ୍ବାଲ ପୁଣି ଥରେ ଆପ୍ ବିରୋଧରେ ସଙ୍ଗୀନ ଅଭିଯୋଗ ଆଣିଥିଲେ । ତାଙ୍କୁ ଆପ୍ର ଜଣେ ବଡ଼ ନେତାଙ୍କ ଫୋନ୍ ଆସିଥିଲା ବୋଲି କହିଥିଲେ ସ୍ବାତୀ ।
