ପୁରୀ ପାଇଁ ଆଜି ନବୀନଙ୍କ ବଡ଼ ଘୋଷଣା: ଆକର୍ଷଣୀୟ ହେବ ଜଗନ୍ନାଥ ଧାମ, ୨ ବର୍ଷ ମଧ୍ୟରେ ସରିବ କାମ

ଭୁବନେଶ୍ୱର/ପୁରୀ,୨୩।୮: ଶ୍ରୀକ୍ଷେତ୍ର ପୁରୀର ବିକାଶ ପାଇଁ ରାଜ୍ୟ ସରକାର ଫୁଲ ଦମ୍‌ରେ ଅଣ୍ଟା ଭିଡ଼ିଛନ୍ତି । ଯେ କୌଣସି ରାଜ୍ୟର ପ୍ରସିଦ୍ଧ ଧର୍ମପୀଠ ଠାରୁ ଅଧିକ ଆକର୍ଷଣୀୟ ହେବ ଜଗନ୍ନାଥ ଧାମ । ଏଥିପାଇଁ ବିଦେଶୀ ଜ୍ଞାନ କୌଶଳର ସହାୟତା ନେବେ ସରକାର । ଏ ସମ୍ପର୍କରେ ଶୁକ୍ରବାର ମୁଖ୍ୟମନ୍ତ୍ରୀ ଲୋକସେବା ଭବନରେ ବଡ଼ ଘୋଷଣା କରିବେ ବୋଲି ସୂଚନା ମିଳିଛି ।
ପୁରୀର ସାମଗ୍ରିକ ବିକାଶ ସହ ଭକ୍ତମାନଙ୍କ ସୁବିଧାକୁ ଦୃଷ୍ଟିରେ ରଖି ବଡ଼ ପ୍ୟାକେଜ୍‌ ଘୋଷଣା ହେବାର ଢ଼େର ସମ୍ଭାବନା ରହିଛି । ଶୁକ୍ରବାର ଜନ୍ମାଷ୍ଟମୀ ଛୁଟିଦିନ ଥାଇ ମଧ୍ୟ ନିଜେ ମୁଖ୍ୟମନ୍ତ୍ରୀ ଲୋକସେବା ଭବନ ଯାଇ ପୁରୀ ପ୍ୟାକେଜ୍‌ ଘୋଷଣା କରିବେ । ନୂଆଦିଲ୍ଲୀ ଗସ୍ତ ପୂର୍ବରୁ ନବୀନ ଆଖି ତରାଟିଲା ଭଳି ଉନ୍ନୟନ ପ୍ୟାକେଜ୍‌ ଘୋଷଣା କରିବେ ବୋଲି ସୂଚନା ମିଳିଛି । ନୂଆ ଯୋଜନା ଅନୁସାରେ ପୁରୀ ସହର ପାଇଁ ପ୍ରସ୍ତୁତ ବ୍ଲୁପ୍ରିଣ୍ଟ କାମ ଆସନ୍ତା ୨ ବର୍ଷ ମଧ୍ୟରେ ସରିବ । ପୂରା ବିଦେଶୀ ଢ଼ାଞ୍ଚାରେ ଏ ଧାର୍ମିକ ସହରର ଚେହେରା ବଦଳାଇବାକୁ ମୁଖ୍ୟମନ୍ତ୍ରୀ ଚୂଡ଼ାନ୍ତ ନିଷ୍ପତ୍ତି ନେଇସାରିଛନ୍ତି । ପୁରୀ ପାଇଁ ମୁଖ୍ୟମନ୍ତ୍ରୀ କେଉଁ ଯୋଜନା କରିଛନ୍ତି ସେ ସମ୍ପର୍କରେ ଏକ ପ୍ରାମାଣିକ ଚିତ୍ର ପ୍ରସ୍ତୁତ କରାଯାଇଛି । ସେହି ସିଡିକୁ ଶୁକ୍ରବାର ମୁଖ୍ୟମନ୍ତ୍ରୀ ଉନ୍ମୋଚନ କରିବେ । ସେହି ସିଡିକୁ ରାଜ୍ୟସାରା ପ୍ରଦର୍ଶନ କରାଯିବ । ପୁରୀ ପାଇଁ କେଉଁ ପ୍ରକଳ୍ପ ସବୁ ହାତକୁ ନିଆଯାଇଛି ସେ ସମ୍ପର୍କରେ ମୁଖ୍ୟମନ୍ତ୍ରୀ ସିଡ଼ିରେ କହିଛନ୍ତି । ପଞ୍ଚମପାଳିର ସରକାର ଗଠନ ପାଇଁ ମହାପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦ ରହିଛି ବୋଲି ନବୀନ ପୂର୍ବରୁ କହିସାରିଛନ୍ତି ।

ଉଲ୍ଲେଖଯୋଗ୍ୟ ଯେ, ଶ୍ରୀକ୍ଷେତ୍ରର ଚେହେରା ବଦଳାଇବାକୁ ରାଜ୍ୟ ସରକାର ଯୋଜନା କରିଛନ୍ତି । ଏଠାକୁ ଆସୁଥିବା ଭକ୍ତ ଓ ପର୍ଯ୍ୟଟକମାନଙ୍କୁ କିପରି ବିଶ୍ୱସ୍ତରୀୟ ସୁବିଧାସୁଯୋଗ ମିଳିବ ସେଥିପାଇଁ ବିଭିନ୍ନ କାର୍ଯ୍ୟ ହାତକୁ ନେଇଛନ୍ତି । ଶ୍ରୀମନ୍ଦିର ପରିବେଶକୁ ଅଧିକ ଆକର୍ଷଣୀୟ କରିବା ଲାଗି ମେଘନାଦ ପାଚେରି ଚତୁଃପାଶ୍ୱର୍ରୁ ୭୫ ମିଟର ଅବରୋଧ ମୁକ୍ତ କରିବାକୁ କ୍ୟାବିନେଟ୍‌ ନିଷ୍ପତ୍ତି ନେଇଛି । ଜଷ୍ଟିସ୍‌ ବି.ପି. ଦାସଙ୍କ ସୁପାରିସ ଆଧାରରେ କ୍ୟାବିନେଟ୍‌ ଏହି ନିଷ୍ପତ୍ତି ଗ୍ରହଣ କରିଛି । ତଦନୁଯାୟୀ ପ୍ରଥମେ ମେଘନାଦ ପାଚେରିକୁ ଲାଗି ରହିଥିବା ଅବରୋଧକୁ ଗତ ତିନିଦିନ ହେଲା ଉଚ୍ଛେଦ କରାଯାଇଛି । ଏହାପରେ ମେଘନାଦ ପାଚେରିର ୭୫ ମିଟର ପର୍ଯ୍ୟନ୍ତ ଅବରୋଧ ମୁକ୍ତ କରାଯିବାର ଯୋଜନା ରହିଛି । ଖୁବ୍‌ଶୀଘ୍ର ଏହି ଉଚ୍ଛେଦ ଆରମ୍ଭ ହେବ ।
ସେହିପରି ଶ୍ରୀମନ୍ଦିର ସିଂହଦ୍ୱାର ସାମ୍ନା ରଥଚକଡ଼ାରେ କିଛି ସପ୍ତାହ ହେଲା ପ୍ରତି ରବିବାର ‘ବଡ଼ଦାଣ୍ଡ ମହୋତ୍ସବ’ ନାମରେ ଏକ ଆଧ୍ୟାତ୍ମିକ ଓ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେଉଛି । ଭକ୍ତମାନଙ୍କ ମଧ୍ୟରେ ଆଧ୍ୟାତ୍ମିକ ଭାବ ପ୍ରକାଶ ସହ ମନୋରଞ୍ଜନ କରିବା ଏହି ମହୋତ୍ସବର ଉଦ୍ଦେଶ୍ୟ ।

   ସମ୍ବନ୍ଧିତ ଖବର


ରାଜ୍ୟସଭାରେ ପାସ୍ ହେଲା କୃଷି ବିଲ୍

ଟୋଲ୍‌ପ୍ଲାଜାରେ ଚିଲିକା ବିଧାୟକଙ୍କ ଲଙ୍କାକାଣ୍ଡ-ଅଭିଯୋଗକୁ କିନ୍ତୁ ଖଣ୍ଡନ କଲେ

ଭୁଶୁଡ଼ିବ ରାମେଶ୍ୱର ମନ୍ଦିର! ଚାଳଠୁ ମୂଳ ଯାଏ ପାଣି ଝରୁଛି ,ମୂଷା ଖୋଳି ପକାଇଲେଣି ଗମ୍ଭୀରା

ବିଧାନସଭାରେ ଆସିବ ୧୨ ବିଲ୍‌ – ୨୫ରେ ସର୍ବଦଳୀୟ ବୈଠକ

ପୋଲ ତଳେ ଭାସୁଛି ଅଜଣା ଶିଶୁର ମୃତଦେହ, ପୋଲିସର ତଦନ୍ତ ଜାରି

ବାଘର କଟାମୁଣ୍ଡ ସହ ଛାଲ ଜବତ: ନାବାଳକ ସମେତ ମା’ ଓ ପୁଅଙ୍କୁ ଗିରଫ କଲା ବନବିଭାଗ