ରାଜଧାନୀ ପାଲଟିଛି ଚୋରା ବନ୍ଧୁକର ପେଣ୍ଠ; ନେତା ନେଇଛନ୍ତି ୧୩ ବନ୍ଧୁକ, ନିର୍ବାଚନ ପରେ ବନ୍ଧା ହେବେ!

ଭୁବନେଶ୍ୱର,୧୯ା୪(ବ୍ୟୁରୋ): କମିଶନରେଟ୍‌ ପୁଲିସ୍‌ର ସ୍ପେଶାଲ୍‌ ସ୍କ୍ୱାଡ୍‌ ପୁଲିସ ଧରିଥିଲା କୁଖ୍ୟାତ ଚୋରା ବନ୍ଧୁକ ବେପାରୀ ବାଦଲ ଓରବାବୁଲି ଓର ସଂଗ୍ରାମ ନାଥକୁ । ଏବେ ବାବୁଲି ଜେଲ୍‌ରେ । ହେଲେ ପୁଲିସ୍‌ ତା’ଠାରୁ ଯେଉଁ ତଥ୍ୟ ପାଇଛି ତାକୁ ନେଇ ଏବେ ଚିନ୍ତାରେ ପଡ଼ିଛି । ପୁଲିସ୍‌ ଜାଣିବାକୁ ପାଇଛି ବାବୁଲି ଭୁବନେଶ୍ୱରରେ ୧୩ ଜଣ ନେତାଙ୍କୁ ଚୋରା ବନ୍ଧୁକ ବିକ୍ରି କରିଛି । ସେଥିରେ ୪ ଜଣ ଯୁବନେତା ଥିବା ଜଣାପଡିଛି । ସେମାନଙ୍କ ନାଁ ମଧ୍ୟ ପୁଲିସ୍‌ ପାଇଛି । ହେଲେ ନିର୍ବାଚନ ଥିବାରୁ ପୁଲିସ୍‌ ତାଙ୍କୁ ଧରିବାକୁ ସାହସ କରୁନି । ନିର୍ବାଚନ ସରିବା ପରେ ସେମାନଙ୍କ ଉପରେ ପୁଲିସ୍‌ର ଛାଟ ପଡ଼ିବ ବୋଲି କମିଶନରେଟ୍‌ ପୁଲିସ୍‌ର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି । ଖାଲି ନେତା ନୁହେଁ କିଛି ବିଲ୍ଡରଙ୍କୁ ମଧ୍ୟ ବନ୍ଧୁକ ବିକିଛନ୍ତି ବାବୁଲି । ସେ ସବୁ ବିଲ୍ଡରଙ୍କ ମଧ୍ୟରେ ଜଣଙ୍କ ପରିଚୟ ପୁଲିସ୍‌ ହାତରେ ଲାଗିଛି । ପୁଲିସ୍‌ ଜାଣିବାକୁ ପାଇଛି ସହିନଗର ଥାନା ଅଞ୍ଚଳରେ ସେ ବିଲ୍ଡରଙ୍କ ଅଫିସ୍‌ ରହିଛି । ଉକ୍ତ ବିଲ୍ଡରଙ୍କ ବାଲିଅନ୍ତା ଓ ହଂସପାଳରେ ଅନେକ ପ୍ରୋଜେକ୍ଟ ଚାଲିଛି । ପୁଲିସ୍‌ ତାଙ୍କୁ ବାନ୍ଧିବାକୁ ଯୋଜନା କରୁଛି ।

ଚାଉଳ ବସ୍ତାରେ ବନ୍ଧୁକ
ବିହାର ମୁଙ୍ଗେରରୁ ବନ୍ଧୁକ ଅତି ଚତୁରତାର ସହ ଆଣୁଥିଲା ବାବୁଲି । ଚାଉଳ ବସ୍ତାରେ ବନ୍ଧୁକ ପୂରାଇ ମୁଙ୍ଗେରରୁ ପହଞ୍ଚୁଥିଲା ଅମରପୁର ଠାରେ । ସେଠାରୁ ଟ୍ରେନ୍‌ ଯୋଗେ ପଶ୍ଚିମବଙ୍ଗ ଦେଇ ଓଡ଼ିଶା ଆସୁଥିଲା । ବେଳେବେଳେ ପଶ୍ଚିମବଙ୍ଗରେ ପହଞ୍ଚିଲା ପରେ ଟ୍ରେନ୍‌ରେ ନ ଆସି ବାବୁଘାଟ ବସ୍‌ ଷ୍ଟାଣ୍ଡରେ ରାତ୍ରି ବସ୍‌ରେ ବସି ଭୋର ସମୟରେ ଭୁବନେଶ୍ୱରରେ ଓହ୍ଲାଉଥିଲା । ୧୫ରୁ ୨୦ କେଜି ଚାଉଳ ବସ୍ତା ଭିତରେ ବନ୍ଧୁକ ଆଣୁଥିଲା ବାବୁଲି । ଏହାକୁ ଦେଖିଲେ କେହି ସନ୍ଦେହ କରୁ ନଥିଲେ ।

ରାଜଧାନୀରେ ମାଳମାଳ ଚୋରା ବନ୍ଧୁକ
ରାଜଧାନୀ ଏବେ ଚୋରା ବନ୍ଧୁକ କାରବାରର ପେଣ୍ଠ ପାଲଟିଛି । ଏହା ସ୍ପଷ୍ଟ ହୋଇଛି ଗତ ୧୫ ଦିନ ମଧ୍ୟରେ ଭୁବନେଶ୍ୱରରେ ଜବତ ହୋଇଥିବା ଚୋରା ବନ୍ଧୁକର ସଂଖ୍ୟାରୁ । ୧୫ ଦିନ ମଧ୍ୟରେ ୩ ବେପାରୀଙ୍କ ଠାରୁ ୭ ବନ୍ଧୁକ, ୩ ଟି ଅଧା ତିଆରି ବନ୍ଧୁକ ଓ ଅନେକ ଗୁଳିଗୋଳା ଜବତ ହୋଇଛି । ବନ୍ଧୁକ କାରବାର କେଉଁ ସ୍ତରରେ ପହଞ୍ଚିଛି ପୁଲିସ ଏବେ ଜାଣୁଛି । ୧୫ ତାରିଖ ଦିନ ଖଣ୍ଡଗିରି ଥାନା ପୁଲିସ୍‌ ଓୟୁଏଟି କଲୋନୀ କ୍ୱାର୍ଟର୍ସ ନଂ.ଆଇଭି ୧/୭ରୁ ଏକ ବନ୍ଧୁକ କାରଖାନା ଠାବ କରିଥିଲା । ଓୟୁଏଟିର ଡିପିପି ବିଭାଗର ସୁପରଭାଇଜର ନୃସିଂହ ନାୟକ ଦୀର୍ଘ ୧୦ ବର୍ଷ ହେବ ବନ୍ଧୁକ ତିଆରି କରି ବିକ୍ରି କରୁଥିଲେ । ୧୦ ବର୍ଷ ମଧ୍ୟରେ ସେ ୧୪୦ରୁ ଅଧିକ ଦେଶୀ ବନ୍ଧୁକ ବିକ୍ରି କରିଥିବା ପୁଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ।
ଗତ ୯ ତାରିଖରେ ସହିଦନଗର ଥାନା ପୁଲିସ ଦୁର୍ଦ୍ଦାନ୍ତ ଅପରାଧୀ ପ୍ରଦୋଷ ପଟ୍ଟନାୟକଙ୍କୁ ଗିରଫ କରି ତା’ଠାରୁ ଏକ ବନ୍ଧୁକ ଜବତ କରିଥିଲା । ୧୦ ତାରିଖରେ ଢ଼େଙ୍କାନାଳ ବାଲିମି ଥାନା ଅନ୍ତର୍ଗତ କୁମାରସିଂହା ଗ୍ରାମର ନିରଞ୍ଜନ ନାୟକ ଓ ବିଶ୍ୱଜିତ ନାୟକଙ୍କୁ ଗିରଫ କରିଥିଲା ଖଣ୍ଡଗିରି ଥାନା ପୁଲିସ୍‌ । ସେମାନଙ୍କ ଠାରୁ ଦେଶୀ ବନ୍ଧୁକ ଓ ଗୁଳି ଜବତ କରିଥିଲା । ୩ ତାରିଖରେ ଜଟଣୀ ଥାନା ପୁଲିସ ୨ ବ୍ରାଉନ୍‌ସୁଗର ବେପାରୀ ସେକ୍‌ ଫରିଦ ଓ ସେକ୍‌ ଚାନ୍ଦ୍‌ଙ୍କୁ ଗିରଫ କରି ସେମାନଙ୍କ ଠାରୁ ବନ୍ଧୁକ ଜବତ କରିଥିଲା ।

   ସମ୍ବନ୍ଧିତ ଖବର


ଆଗାମୀ ଦିନରେ ପିଲାଙ୍କ ସିଲାବସ୍‌ରେ ସାମିଲ ହେବ ‘ସାଇବର୍‌ ସିକ୍ୟୁରିଟି’ ବିଷୟ : ବିଦ୍ୟାଳୟସ୍ତରରୁ ଆରମ୍ଭ ହେବ ସଚେତନତା

ରାଜ୍ୟରେ କରୋନା ନେଲା ଆଉ ୧୪ ମୁଣ୍ଡ: ମୃତକଙ୍କ ସଂଖ୍ୟା ୧୭୧୮କୁ ବୃଦ୍ଧି

ଓଡ଼ିଶାରେ ତଳକୁ ଖସିଲା କରୋନା ଗ୍ରାଫ୍: ୨୪ଘଣ୍ଟା ଆଉ ୫୯୪ ପଜିଟିଭ ଚିହ୍ନଟ୍, ଆକ୍ରାନ୍ତଙ୍କ ସଂଖ୍ୟା ୩ ଲକ୍ଷ ୧୭ହଜାର ଟପିଲା

କଥା ଦେଇ କଥା ରଖିଲେ ସରକାର: ସାମ୍ବାଦିକଙ୍କ ପାଇଁ ମେଗା ଯୋଜନ; ମୃତ୍ୟୁ ହେଲେ ପରିବାରକୁ ୪ ଲକ୍ଷ, ଗୃହ ଋଣ ସହ ପିଲାଙ୍କୁ ପଢ଼ା ଖର୍ଚ୍ଚ ଦେବେ

ମାନବପ୍ରେମୀ ଆଦିତ୍ୟ ଦାଶଙ୍କ ମୃତ୍ୟୁ ଘଟଣାର ତଦନ୍ତ ରିପୋର୍ଟ ଦାଖଲ: ହତ୍ୟା କରାଯାଇଥିବା ପ୍ରମାଣିତ ହୋଇପାରୁନି, ମାନସିକ ଚାପରୁ ଆତ୍ମହତ୍ୟା

ବିନ୍ଦୁସାଗରରେ ଡଙ୍ଗା ଭସା ମନା, କଟକଣା ଜାରି କଲା ବିଏମ୍‌ସି