ନୂଆଦିଲ୍ଲୀ ୧୮/୯: ଭାରତର ସ୍ୱଦେଶୀ ଜ୍ଞାନକୌଶଳରେ ନିର୍ମିତ ହାଲୁକା ଲଢ଼ୁଆ ଯୁଦ୍ଧବିମାନ ତେଜସରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଉଡାଣ ଭରିବେ । ଚଳିତ ମାସ ୧୯ ତାରିଖରେ ବେଙ୍ଗାଲୁରୁରେ ଏକ ଦୁଇ ଆସନ ବିଶିଷ୍ଟ ତେଜସ ବିମାନରେ ସେ ଉଡାଣ ଭରିବାର କାର୍ଯ୍ୟକ୍ରମ ସ୍ଥିରୀକୃତ ହୋଇଛି । ସେହି ବିମାନକୁ ଜଣେ ସ୍ୱତନ୍ତ୍ର ପାଇଲଟ ଚଳାଇବେ । ସୂଚନାଯୋଗ୍ୟ ଯେ, ତେଜସ ବିମାନକୁ ଭାରତୀୟ ବାୟୁସେନାରେ ସାମିଲ କରାଯାଇସାରିଲାଣି ।

ଏହି ଧରଣର ବିମାନକୁ ନେଇ ବାୟୁସେନା ‘ ଫ୍ଲାଇଙ୍ଗ ଡାଗର’ ନାମକ ଏକ ସ୍ୱତନ୍ତ୍ର ସ୍କ୍ୱାଡ୍ରନ ଗଠନ କରିଛି । ତାମିଲନାଡୁର ସୁଲୁର ବାୟୁସେନା ଷ୍ଟେସନରେ ଏହି ସ୍କ୍ୱାଡ୍ରନକୁ ନିୟୋଜିତ କରାଯାଇଛି । ନିକଟରେ କେନ୍ଦ୍ର ସରକାର ବାୟୁସେନା ପାଇଁ ଏଧରଣର ଆହୁରି ୮୩ଟି ବିମାନ କ୍ରୟ କରାଯିବା ପ୍ରସ୍ତାବକୁ ମଂଜୁରୀ ଦେଇଛନ୍ତି ।