ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ସ୍କୁଲ ଏବଂ ସରକାରୀ ତଥା ବେସରକାରୀ ଅନୁଷ୍ଠାନକୁ ବୋମା ବିସ୍ଫୋରଣ କରି ଉଡାଇ ଦେବାର ଧମକ ମିଳିବା ଆରମ୍ଭ ହୋଇଛି । ବିମାନବନ୍ଦର ଏବଂ ସ୍କୁଲ୍କୁ ଧମକ ମିଳିବା ପରେ ଏବେ ତିହାର ଜେଲ୍କୁ ମଧ୍ୟ ବୋମା ବିସ୍ଫୋରଣର ଧମକ ମିଳିଛି । ବୋମା ଧମକ ପରେ ଦିଲ୍ଲୀ ପୋଲିସ ଏବଂ ପ୍ରଶାସନ ଆଲର୍ଟ ମୋଡକୁ ଆସିଛନ୍ତି । ପୋଲିସ ଏବଂ ଡଗ୍ ସ୍କ୍ବାଡ୍ ଟିମ୍ ଘଟଣାସ୍ଥଳକୁ ଯାଇ ସର୍ଚ୍ଚ ଅପରେସନ୍ ଆରମ୍ଭ କରିଛନ୍ତି । ତିହାର ଜେଲ ପ୍ରଶାସନ ଏହି ପ୍ରସଙ୍ଗରେ ପୋଲିସ ସମେତ ଅନେକ ଗୁରୁତ୍ୱପୂର୍ଣ୍ଣ ବିଭାଗକୁ ସୂଚନା ଦେଇଛି। ତେବେ ଏହା ପୂର୍ବରୁ ଦିଲ୍ଲୀର ଯେଉଁ ୪ଟି ହସ୍ପିଟାଲକୁ ବୋମା ଧମକ ମିଳିଥିଲା । ସେଠାରେ ଅନୁସନ୍ଧାନରୁ କୌଣସି ସୂଚନା ମିଳିନାହିଁ ।
ପ୍ରଶାସନ ଅନୁଯାୟୀ, ଆଜି ଅର୍ଥାତ୍ ମଙ୍ଗଳବାର ଦିନ ଦିଲ୍ଲୀର ତିହାର ଜେଲକୁ ବୋମା ଧମକ ମିଳିଛି । ଇମେଲ ମାଧ୍ୟମରେ ଏହି ଧମକ ମିଳିଛି । ଏହାପୂର୍ବରୁ ଦିଲ୍ଲୀର ସ୍କୁଲ, ଡାକ୍ତରଖାନା ଏବଂ ବିମାନ ବନ୍ଦରକୁ ଉଡ଼ାଇବା ପାଇଁ ସମାନ ଧମକ ମିଳିଥିଲା । ଏହି ବିପଦ ସମ୍ପର୍କରେ ଜେଲ ପ୍ରଶାସନ ଦିଲ୍ଲୀ ପୋଲିସକୁ ସତର୍କ କରାଇଛି । ବର୍ତ୍ତମାନ ଜେଲ ଭିତରେ ଅନୁସନ୍ଧାନ ଅଭିଯାନ ଜାରି ରହିଛି । ବିଶେଷକରି ଯେଉଁ ସ୍ଥାନରେ ରାଜନେତାଙ୍କ ସମେତ ହାଇ ପ୍ରୋଫାଇଲ୍ କଏଦୀ ମାନେ ଅଛନ୍ତି, ସେଠାରେ ଜୋରଦାର ଯାଞ୍ଚ କରାଯାଇଛି ।
ଦିଲ୍ଲୀ ଅଗ୍ନିଶମ ସେବା ଅନୁଯାୟୀ, ସେମାନେ ଜିଟିବି ହସ୍ପିଟାଲ, ଦାଦା ଦେବ ହସ୍ପିଟାଲ, ହେଡଗେୟାର ହସ୍ପିଟାଲ ଏବଂ ଦୀପ ଚନ୍ଦ୍ର ବନ୍ଧୁ ହସ୍ପିଟାଲକୁ ବୋମା ଧମକ ଦେଇଥିଲେ । ଯାଞ୍ଚ ପାଇଁ ଦିଲ୍ଲୀ ପୋଲିସ ସହିତ ବୋମା ନିରୋଧି ସ୍କ୍ବାଡ, ବୋମା ଡିଟେକ୍ଟର ଦଳ ଏବଂ ଅଗ୍ନିଶମ ସେବା ଏହି ଡାକ୍ତରଖାନାଗୁଡ଼ିକୁ ଯାଞ୍ଚ କରିଥିଲେ, କିନ୍ତୁ କୌଣସି ସନ୍ଦେହଜନକ ବିଷୟ ମିଳି ନଥିଲା । ସୂଚନାଥାଉକି ଯେ, ଏହା ପୂର୍ବରୁ ମେ ୧ ରେ ଦିଲ୍ଲୀ, ନୋଏଡା ଏବଂ ଲକ୍ଷ୍ନୌର ପ୍ରାୟ ୧୦୦ ଟି ସ୍କୁଲକୁ ବୋମା ଧମକ ମିଳିଥିଲା । ଏଭଳି ଗୁଜବ ଏଠାରେ ଏବେ ସୁଦ୍ଧା ଜାରି ରହିଛି ।
