ଅଙ୍କ ଓଲଟପାଲଟ: ନବୀନ ନିବାସରେ ଦିଲ୍ଲୀପ ରାୟ
ଭୁବନେଶ୍ୱର,୧୬ ।୩(ବ୍ୟୁରୋ): ବିଜୁ ମାର୍କା ମରା ଜଣେ ଓଜନିଆ ନେତା (ଦାମ) ‘ପଦ୍ମ’ ପୋଖରୀକୁ ଡେଇଁଲେ । ସମାନ ଓଜନର ଆଉ ଜଣେ ବିଜୁ ଲିଗାସି ନେତା ଏବେ ସେଇ ପୋଖରୀରୁ ‘ଶଙ୍ଖ’ ପିଠିକୁ ଲମ୍ଫ ମାରିଛନ୍ତି । ଅଙ୍କ ଓଲଟପାଲଟ ହୋଇ ଯାଇଛି ।
ତିନି ମାସ ତଳେ ବିଜେପିରୁ ଇସ୍ତଫା ଦେଇଥିବା ବରିଷ୍ଠ ନେତା ଦିଲ୍ଲୀପ ରାୟ ଆସନ୍ତା କାଲି ବିଜେଡିକୁ ଫେରିବେ । ଶନିବାର ବିଳମ୍ବିତ ସନ୍ଧ୍ୟାରେ ସେ ବିଜେଡି ମୁଖିଆ ନବୀନ ପଟ୍ଟନାୟକଙ୍କ ପାଖକୁ ଯାଇଥିଲେ, ନିମନ୍ତ୍ରଣ ପାଇ । ୨୦୦୨ରେ ଶେଷ ଥର ଦିଲ୍ଲୀପ ନବୀନ ନିବାସ ଯାଇଥିଲେ । ୧୭ ବର୍ଷ ପରେ ପୁଣି ପାଦ ପକାଇଲେ ।
ନବୀନଙ୍କ ସହ ମାତ୍ର ୫ ମିନିଟ ଆଲୋଚନା କରି ଦିଲ୍ଲୀପ ବାହାରି ଥିଲେ । ଗଣମାଧ୍ୟମକୁ କୌଣସି ପ୍ରତିକ୍ରିୟା ଦେଇ ନ ଥିଲେ, କିନ୍ତୁ ଫେରିଲା ବେଳେ ବେଶ୍ ହସହସ ମୁହଁ ଥିଲା ତାଙ୍କର । ମିଳିଥିବା ସୂଚନା ଅନୁସାରେ ଆସନ୍ତା କାଲି ସେ ଆନୁଷ୍ଠାନିକ ଭାବେ ବିଜେଡିରେ ଯୋଗ ଦେବେ ।
ଶୁଣାଯାଉଛି, କେନ୍ଦ୍ରାପଡ଼ା କିମ୍ବା ବରଗଡ଼ ଲୋକସଭା ଆସନରୁ ପ୍ରାର୍ଥୀ ହେବାକୁ ବିଜେଡି ମୁଖିଆ ଦିଲ୍ଲୀପଙ୍କୁ ପ୍ରସ୍ତାବ ଦେଇଛନ୍ତି । ବରଗଡ଼ ପାଇଁ ସେ ଆଗ୍ରହୀ ନୁହନ୍ତି ବୋଲି ଜଣାଇ ଦେଇଛନ୍ତି । କିନ୍ତୁ କେନ୍ଦ୍ରାପଡ଼ା କଥା ମନା କରି ନାହାନ୍ତି ।
ଦିଲ୍ଲୀପ କେନ୍ଦ୍ରାପଡ଼ାରୁ ପ୍ରାର୍ଥୀ ହେଲେ ବୈଜୟନ୍ତଙ୍କ ହିସାବ ଗୋଳମାଳିଆ ହୋଇଯିବ । କାରଣ ତାଙ୍କ ସହ ବିଜେପି ଛାଡ଼ିଥିବା ବରିଷ୍ଠ ନେତା ତଥା କେନ୍ଦ୍ରାପଡ଼ା ଷ୍ଟ୍ରଙ୍ଗମ୍ୟାନ ଭାବେ ଜଣାଶୁଣା ବିଜୟ ମହାପାତ୍ର ଦିଲ୍ଲୀପଙ୍କୁ ସମର୍ଥନ କରିବେ । ବିଜୟ ଏବଂ ଦିଲ୍ଲୀପଙ୍କ ମଧ୍ୟରେ ସମ୍ପର୍କ ଏମିତି ଯେ ବିଜେଡି ବାହାରେ ରହିଲେ ବି ଦିଲ୍ଲ୍ୀପଙ୍କୁ ସମର୍ଥନ କରିବେ ସେ । ପାଟକୁରା, ମହାକାଳପଡ଼ା, ରାଜନଗର, କେନ୍ଦ୍ରାପଡ଼ା ବିଧାନସଭା ଅଞ୍ଚଳରେ ବିଜୟଙ୍କର ବେଶ୍ ଦବ୍ଦବା ରହିଛି । ଆଳି, ମାହାଙ୍ଗା ଏବଂ ସାଲେପୁର ଅଞ୍ଚଳରେ ବି ତାଙ୍କ ପ୍ରଭାବ ରହିଛି ।
ଏପଟେ ସାଲେପୁର ବିଧାୟକ ପ୍ରକାଶ ବେହେରାଙ୍କୁ ବିଜେପିକୁ ନେଇ ନିଜ ଦୁର୍ଗକୁ ଶକ୍ତିଶାଳୀ କରିବେ ବୋଲି ବୈଜୟନ୍ତ ଆକଳନ କରିଥିଲେ । ଦିଲ୍ଲୀପ ଛିଡ଼ା ହେଲେ ସମୀକରଣ ବଦଳିଯିବ ।
ରାଜ୍ୟ ରାଜନୀତିର ବେଶ୍ ପରିଚିତ ଚେହେରା ଦିଲ୍ଲୀପ ରାୟଙ୍କ ଗତିବିଧି ଉପରେ ଗତ କିଛିଦିନ ହେବ ରାଜନୈତିକ ମହଲର ନଜର ଲାଗି ରହିଥିଲା । ୩ ମାସ ତଳେ ବିଜେପିର ହାତ ଛାଡ଼ିଥିବା ଶ୍ରୀ ରାୟ ପୁଣି ଶଙ୍ଖ ଫୁଙ୍କିବେ ବୋଲି ଦୁଇଦିନ ହେବ ଚର୍ଚ୍ଚା ହେଉଥିଲା । ଶନିବାର ସନ୍ଧ୍ୟାରେ ଏ ଚର୍ଚ୍ଚାର ଅବସାନ ଘଟିଛି । ଦିଲ୍ଲୀପ ନବୀନ ନିବାସ ଆସିବା ପରେ ରାଜ୍ୟ ରାଜନୀତିରେ ହଠାତ୍ କରେଣ୍ଟ ଲାଗିଛି । ବିଜେଡି ଶିବିରରେ ଭରିଛି ନୂଆ ଉତ୍ସାହ ।
ଶନିବାର ସନ୍ଧ୍ୟା ୭ଟା ୪୬ ହେବ । ଗଣମାଧ୍ୟମ ପ୍ରତିନିିଧି ନବୀନ ନିବାସ ଗେଟ ନିକଟରେ ଭିଡ଼ କରିଥିଲେ । ଏକ ଧଳା ରଙ୍ଗର କାର ଦ୍ରୁତ ଗତିରେ ଆସିଲା । ଗାଡ଼ିର ପଛ ସିଟରେ ବସିଥିଲେ ଦିଲ୍ଲୀପ । ପୂର୍ବରୁ ଗେଟ୍ ସୁରକ୍ଷା କର୍ମୀଙ୍କୁ ନିର୍ଦ୍ଦେଶ ଥିଲା । କାର୍ ପହଞ୍ଚିବା ମାତ୍ରେ ଗେଟ୍ ଖୋଲିଲା । ଗାଡ଼ି ସିଧା ପୋର୍ଟିକୋରେ ପହଞ୍ଚିବା ପରେ ବରିଷ୍ଠ ନେତା ଅନଙ୍ଗ ଉଦୟ ସିଂହଦେଓ, ପିନାକୀ ମିଶ୍ର, ବିକ୍ରମ ଆରୁଖ, ପ୍ରସନ୍ନ ଆଚାର୍ଯ୍ୟ ପ୍ରମୁଖ ଦିଲ୍ଲୀପଙ୍କୁ ପାଛୋଟି ନେଲେ । ଭିତରକୁ ଯାଇ ନବୀନଙ୍କ ସହ ପ୍ରାୟ ୫ ମିନିଟର ରୁଦ୍ଧଦ୍ୱାର ବୈଠକ କଲେ ଦିଲ୍ଲୀପ । ସାଙ୍ଗେ ସାଙ୍ଗେ ଭିଆଇପି ଗେଟ୍ ଦେଇ ବାହାରିଗଲେ । ସାମ୍ବାଦିକମାନେ ଚାହିଁଲେ ବି ପ୍ରତିକ୍ରିୟା ନେଇପାରିଲେନି ।
ବିଜୁ ଜନତା ଦଳ ଗଠନରେ ସକ୍ରିୟ ଭୂମିକା ତୁଲାଇଥିବା ଦିଲ୍ଲୀପ ୨୦୦୨ରେ ବିଜେଡିରେ ଅଲୋଡ଼ା ହୋଇ ପଡ଼ିଥିଲେ । ତେବେ ବିଜେଡିକୁ ଚାଲେଞ୍ଜ କରି ରାଜ୍ୟସଭାକୁ ପୁଣି ନିର୍ବାଚିତ ହେବା ପରେ ବିଜେଡି ସହ ସଂପର୍କ ତୁଟାଇ ଦେଇଥିଲେ । ୨୦୦୪ରେ ସେ କଂଗ୍ରେସରେ ଯୋଗ ଦେଇଥିଲେ । ୨୦୦୮ରେ କଂଗ୍ରେସ ଛାଡ଼ି ପରବର୍ତ୍ତୀ ସମୟରେ ବିଜେପିରେ ସାମିଲ ହୋଇଥିଲେ । ଗତ ୨୦୧୪ ନିର୍ବାଚନରେ ଦିଲ୍ଲୀପ ବିଜେପି ଟିକେଟରେ ରାଉରକେଲାରୁ ବିଧାୟକ ଭାବେ ନିର୍ବାଚିତ ହୋଇଥିଲେ । ମାତ୍ର ପ୍ରଧାନମନ୍ତ୍ରୀ ରାଉରକେଲାବାସୀଙ୍କୁ ଦ୍ୱିତୀୟ ବ୍ରାହ୍ମଣୀ ସେତୁ ଓ ଆଇଜିଏଚ ସୁପର ସ୍ପେଶାଲିଟି ହସ୍ପିଟାଲର ପ୍ରତିଶ୍ରୁତି ପୂରଣ ନହେବାରୁ ଗତ ନଭେମ୍ବର ୩୦ରେ ଶ୍ରୀ ରାୟ ବିଜେପିରୁ ଇସ୍ତଫା ଦେଇଥିଲେ । ଦିଲ୍ଲୀପଙ୍କ ସହ ବିଜୟ ମହାପାତ୍ର ମଧ୍ୟ ବିଜେପି ଛାଡ଼ିଥିଲେ । ଦଳର ରାଷ୍ଟ୍ରୀୟ ସଭାପତି ଅମିତ୍ ଶାହଙ୍କୁ ଦୁହେଁ ଚିଠି ଲେଖି ଦଳ ଲକ୍ଷଚ୍ୟୁତ ହୋଇଥିବାରୁ ସେମାନେ ଦଳ ଛାଡୁଥିବା ଉଲ୍ଲେଖ କରିଥିଲେ ।
