କୋଲକାତା ବିମାନବନ୍ଦରରେ ଖତ ଖାଉଛି ଡାକୋଟା ବିମାନ: କମିଟି କରି ଭୁଲିଯାଇଛି ପରିବହନ ବିଭାଗ, କେବେ ଆସିବ.. ତା’ର ଉତ୍ତର ବି ଅନିଶ୍ଚିତତାରେ
ଭୁବନେଶ୍ୱର,୨୮/୦୧: ପ୍ରବାଦ ପୁରୁଷ ବିଜୁ ବାବୁଙ୍କ ବୀରତ୍ୱର ସ୍ମୃତି ଜାବୁଡ଼ି ଧରିଥିବା ଡାକୋଟା ବିମାନ ଖତ ଖାଉଛି କୋଲକାତା ବିମାନବନ୍ଦରରେ । ଏହାକୁ ଓଡ଼ିଶା ଫେରାଇ ଆଣିବାକୁ ଦୀର୍ଘବର୍ଷରୁ ଯୋଜନା ଚାଲିଛି । ହେଲେ ଏଯାଏଁ ଡାକୋଟା ଆସିପାରୁନି । କେବେ ଆସିବ, ତା’ର ଉତ୍ତର ବି ଅନିଶ୍ଚିତତାରେ । ଏକଥା ନୁହେଁ ଯେ, ଏ ଦିଗରେ କିଛି ପଦକ୍ଷେପ ନିଆଯାଇନି । ଏଥିପାଇଁ ପରିବହନ ବିଭାଗକୁ ଦାୟିତ୍ୱ ଦିଆଯାଇଛି । ହେଲେ ମଝିରେ ମଝିରେ ପ୍ରକ୍ରିୟା ଆରମ୍ଭ କରି ଭୁଲିଯାଉଛି ପରିବହନ ବିଭାଗ । ବର୍ଷ ବର୍ଷର ପ୍ରତୀକ୍ଷା ସରୁନି ।
ଯୁବପିଢ଼ିକୁ ବିଜୁବାବୁଙ୍କ ବୀରତ୍ୱ କାହାଣୀ ବଖାଣିବା ପାଇଁ ଡାକୋଟାକୁ ଓଡ଼ିଶା ଫେରାଇ ଆଣିବାକୁ ରାଜ୍ୟ ସରକାର ଯୋଜନା କରିଛନ୍ତି । ଡାକୋଟା ଥିଲା ବିଜୁ ବାବୁଙ୍କ ପ୍ରିୟ ବିମାନ । ବିଜୁ ବାବୁ କରିଥିବା କଳିଙ୍ଗ ଏୟାରଲାଇନ୍ସରେ ୧୪ଟି ବିମାନ ଥିଲା । ଏଥିମଧ୍ୟରେ ଥିଲା ଡାକୋଟା । ଏହି ଡାକୋଟାକୁ ନିଜେ ବିଜୁବାବୁ ବ୍ୟବହାର କରୁଥିଲେ । ଦ୍ୱିତୀୟ ବିଶ୍ୱଯୁଦ୍ଧରେ ଶତ୍ରୁପକ୍ଷର ଛାତିଚିରି ନିଜର ପରାକାଷ୍ଠା ଦେଖାଇଥିଲା ଡାକୋଟା । ପରବର୍ତ୍ତୀ ସମୟରେ ଡାକୋଟା ବିମାନର କିଛି ଖବର ନଥିଲା । କିଛି ବର୍ଷ ତଳେ ହଠାତ୍ ଏହି ଡାକୋଟା ବିମାନକୁ କୋଲକତା ବିମାନବନ୍ଦରରେ ଦେଖିବାକୁ ମିଳିଥିଲା ।
ଐତିହାସିକ ଅନୀଲ ଧୀର୍ ଏ ନେଇ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ । ଡାକୋଟ।।କୁ ଓଡ଼ିଶାକୁ ଆଣିବାକୁ ଦାବି ହୋଇଥିଲା । ପରେ ରାଜ୍ୟ ସରକାର ଡାକୋଟା ବିମାନକୁ କୋଲକାତାରୁ ଆଣି କଟକସ୍ଥିତ ବିଜୁ ବାବୁଙ୍କ ବାସଭବନ ‘ଆନନ୍ଦଭବନ’ ସଂଗ୍ରହାଳୟରେ ରଖିବାକୁ ଯୋଜନା କରିଥିଲେ । ହେଲେ ଆନନ୍ଦ ଭବନରେ ଜାଗା ଅଭାବ କାରଣରୁ ଏହି ଯୋଜନା ବାତିଲ ହୋଇଥିଲା । ପରେ ଯୋଜନା ହେଲା, ଡାକୋଟା ବିମାନକୁ ବିଜୁ ପଟ୍ଟନାୟକ ବିମାନବନ୍ଦରରେ ରଖି ସାରା ବିଶ୍ୱବାସୀଙ୍କ ସମ୍ମୁଖରେ ବିଜୁ ବାବୁଙ୍କ ବୀରତ୍ୱ ଗାଥାର ଜ୍ୱଳନ୍ତ ପ୍ରମାଣ ପ୍ରଦର୍ଶନ କରାଯିବ । ଏଥିପାଇଁ ୧୦ କୋଟି ଟଙ୍କା ସଂସ୍କୃତି ବିଭାଗର ବଜେଟରେ ରଖାଯାଇଥିଲା । କିନ୍ତୁ, ଏ ଦିଗରେ କିଛି ଅଗ୍ରଗତି ନ ହେବାରୁ ଏହି ଟଙ୍କା ପୁଣି ସରକାରୀ ତହବିଲକୁ ଫେରି ଯାଇଥିଲା ।
୨୦୧୯-୨୦ରେ ପୁଣି ଥରେ ଏ ଦିଗରେ ଆଗେଇଲେ ସରକାର । ଗତବର୍ଷ ଜାନୁଆରୀରେ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଏ ନେଇ ବୈଠକ ବସିଥିଲା । ସ୍ଥିର ହେଲା, ଖୁବଶୀଘ୍ର ଡାକୋଟାକୁ କୋଲକାତାରୁ ଭୁବନେଶ୍ୱର ଅଣାଯିବ । ଏ ନେଇ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରାଳୟକୁ ମଧ୍ୟ ଅବଗତ କରାଗଲା । ପରିବହନ ବିଭାଗକୁ ଏହାର ଦାୟିତ୍ୱ ଦିଆଗଲା । ଗତ ଡିସେମ୍ବରରେ ଏଥିପାଇଁ ବାଣିଜ୍ୟ ଓ ପରିବହନ ବିଭାଗ ସଚିବଙ୍କ ନେତୃତ୍ୱରେ ୧୧ ଜଣିଆ ଟେକ୍ନୋ-କମର୍ସିଆଲ ପରଚେଜ୍ କମିଟି ଗଠନ କରାଯାଇଥିଲା । କମିଟିରେ ବେସାମରିକ ବିମାନ ଚଳାଚଳ ବିଭାଗ ନିର୍ଦ୍ଦେଶକଙ୍କ ସହ ପୂର୍ତ୍ତ, ପରିବହନ, ସଂସ୍କୃତି, ପର୍ଯ୍ୟଟନ, ଭୁବନେଶ୍ୱର ମହାନଗର ନିଗମ ଏବଂ ଭୁବନେଶ୍ୱର ବିମାନବନ୍ଦର କର୍ତ୍ତୃପକ୍ଷଙ୍କୁ ରଖାଯାଇଥିଲା । କୁହାଯାଇଥିଲା, ଡାକୋଟା ବିମାନକୁ କେମିତି ଭୁବନେଶ୍ୱର ଅଣାଯିବ, ସେଥିପାଇଁ କମିଟି ତର୍ଜମା କରି ରିପୋର୍ଟ ଦେବ । ତା’ ପରେ ଚୂଡ଼ାନ୍ତ ପଦକ୍ଷେପ ନିଆଯିବ । ହେଲେ କମିଟି ଗଠନ କରି ପରିବହନ ବିଭାଗ ଭୁଲିଯାଇଛି । ଏଯାଏଁ ଏହି କମିଟି ନା କୋଲକାତା ଗସ୍ତ କଲାଣି ନା ଥରୁଟିଏ ବୈଠକ ଡାକିଲାଣି ।
ପରିବହନ ବିଭାଗ ଅଧିକାରୀ କହୁଛନ୍ତି, ଡାକୋଟା ଫେରାଇ ଆଣିବାକୁ ପ୍ରକ୍ରିୟା ଚାଲିଛି । ସାଧାରଣ ପ୍ରଶାସନ ବିଭାଗ ଜମି ଦେଲେ ପରବର୍ତ୍ତୀ ପଦକ୍ଷେପ ନିଆଯିବ । ବିଜୁ ପଟ୍ଟନାୟକ ବିମାନବନ୍ଦର ପାଖରେ ଜମି ଦେବା ପାଇଁ ଅନୁରୋଧ କରାଯାଇଛି । କୋଲକାତାରେ ଡାକୋଟା ଜରାଜୀର୍ଣ୍ଣ ଅବସ୍ଥାରେ ପଡ଼ିଛି । ବିଜୁ ବାବୁଙ୍କ ବୀରତ୍ୱ ବଖାଣୁଥିବା ଏହି ବିମାନ କେବେ ଓଡ଼ିଶା ମାଟିକୁ ଫେରି ଆସିବ, ତାହା କହିବା ମୁସ୍କିଲ । ପରିବହନ ବିଭାଗ ଅଧିକାରୀଙ୍କ ଆନ୍ତରିକତା ଦେଖିଲେ ଡାକୋଟା ଫେରିବା ନେଇ ମନରେ ସନ୍ଦେହ ଉପୁଜିଲାଣି । ଏମିତିରେ ବେଶି ବିଳମ୍ବ କଲେ ଏହି ବିମାନ ଅବସ୍ଥା ଆହୁରି ଶୋଚନୀୟ ହୋଇଯିବା ଆଶଙ୍କା ରହିଛି ।
