ଦୋହା,୧୧/୦୫: ଅଲିମ୍ପିକ୍ସ ତଥା ବିଶ୍ୱ ଚାମ୍ପିଅନ ଜାଭେଲିନ ଫିଙ୍ଗାଳି ନୀରଜ ଚୋପ୍ରା ସିଜନର ପ୍ରଥମ ପ୍ରତିଯୋଗିତା ଦୋହା ଡାଏମଣ୍ଡ ଲିଗ୍ରେ ରୌପ୍ୟ ପଦକ ପାଇଛନ୍ତି । ଚେକ୍ ଗଣରାଜ୍ୟର ଜାକୁବ ଭଦଲେଚ ୮୮.୩୮ ମିଟର ଫିଙ୍ଗି ପ୍ରଥମ ସ୍ଥାନ ସହ ସ୍ୱର୍ଣ୍ଣ ପଦକ ଜିତିଥିଲେ । ନୀରଜ ଅନ୍ତିମ ତଥା ଷଷ୍ଠ ପ୍ରୟାସରେ ୮୮.୩୬ ମିଟର ଫିଙ୍ଗି ଦ୍ୱିତୀୟ ସ୍ଥାନରେ ରହିଥିଲେ । ସେ ମାତ୍ର ୦.୦୨ ମିଟରରୁ ଟାଇଟଲ ହାସଲରୁ ବଞ୍ଚିତ ହୋଇଥିଲେ । ଗ୍ରେନେଡାର ପିଟର୍ସ ଆଣ୍ଡରସନ ଅନ୍ତିମ ପ୍ରୟାସରେ (୮୬.୬୨ ମିଟର) ଶ୍ରେଷ୍ଠ ପ୍ରଦର୍ଶନ ଦେଇ ତୃତୀୟ ସ୍ଥାନ ସହ ବ୍ରୋଞ୍ଜ ପଦକ ପାଇଥିଲେ ।
ଓଡ଼ିଶାର କିଶୋର ଜେନାଙ୍କ ପ୍ରଦର୍ଶନ ନୈରାଶ୍ୟଜନକ ରହିଥିଲା । ସେ ୭୬.୩୧ ମିଟର ଫିଙ୍ଗି ନବମ ସ୍ଥାନରେ ରହିଥିଲେ । ସିଜନର ପ୍ରଥମ ପ୍ରତିଯୋଗିତାରେ ନୀରଜ ଦୋହାରେ ୯୦ ମିଟର ମାର୍କ ଅତିକ୍ରମ କରିବେ ବୋଲି ଆଶା ରହିଥିଲା । କିନ୍ତୁ ସେ ସଫଳ ହୋଇନଥିଲେ । ଫାଉଲରୁ ସେ ଅଭିଯାନ ଆରମ୍ଭ କରିଥିଲେ । ଦ୍ୱିତୀୟ ପ୍ରୟାସରେ ୮୪.୯୩ ମିଟର, ତୃତୀୟରେ ୮୬.୨୪ ମିଟର, ଚତୁର୍ଥରେ ୮୬.୧୮ ମିଟର, ପଞ୍ଚମରେ ୮୨.୨୮ ମିଟର ଏବଂ ଅନ୍ତିମ ପ୍ରୟାସରେ ୮୮.୩୬ ମିଟର ଫିଙ୍ଗିଥିଲେ।କିଶୋରଙ୍କ ପଦାର୍ପଣ ଯାତ୍ରା ୭୫.୭୨ ମିଟରରୁ ଆରମ୍ଭ ହୋଇଥିଲା । ଦ୍ୱିତୀୟ ପ୍ରୟାସ ଫାଉଲ ଓ ତୃତୀୟରେ ୭୬.୩୧ ମିଟର ଫିଙ୍ଗିବା ପରେ ତାଙ୍କର ଅଭିଯାନ ଶେଷ ହୋଇଥିଲା ।
