ସିଏଏକୁ ନେଇ ରାଉରକେଲାରେ ଦୁଇ ଗୋଷ୍ଠୀ ମୁହାଁମୁହିଁ: ଟେକା ପଥର ମାଡ଼, ପୁଲିସ୍‌ର ମୃଦୁ ଲାଠି ଚାଳନା

ସୁନ୍ଦରଗଡ଼ ୧୫/୧: ନାଗରିକତା ସଂଶୋଧନ ଆଇନ (ସିଏଏ) ଓ ଏନ୍‌ଆରସିକୁ ନେଇ ସୁନ୍ଦରଗଡ଼ରେ ଦୁଇ ଗୋଷ୍ଠୀ ମଧ୍ୟରେ ଦେଖା ଦେଇଛି ଉତ୍ତେଜନା । ଦୁଇ ଗୋଷ୍ଠୀ ପରସ୍ପର ଉପରକୁ ଟେକା ପଥର ମାଡ଼ କରିଥିଲେ । ପରିସ୍ଥିତି ଅଣାୟତ୍ତ ଆଡ଼କୁ ଯାଉଥିବା ଦେଖି ପୁଲିସ୍‌ ପକ୍ଷରୁ ମୃଦୁ ଲାଠି ଚାଳନା କରାଯାଇଛି ।

ଗତକାଲି ସୁନ୍ଦରଗଡ଼ରେ କଂଗ୍ରେସ ଦଳ ପକ୍ଷରୁ ସିଏଏ ଓ ଏନ୍‌ଆରସିକୁ ବିରୋଧ କରି ଏକ ଶୋଭାଯାତ୍ରା ଜିଲ୍ଲାପାଳଙ୍କ କାର୍ଯ୍ୟାଳୟ ଆଡ଼କୁ ଆସୁଥିଲା । ଏହି ସମୟରେ କିଛି ଯୁବକ ଶୋଭାଯାତ୍ରାରେ ଯାଉଥିବା ଜଣେ ଯୁବକଙ୍କୁ ଟାଣି ନେଇ ମାଡ଼ ମାରିଥିଲେ । ଫଳରେ ସେଠାରେ ଉତ୍ତେଜନା ଦେଖା ଦେଇଥିଲା । ଉପସ୍ଥିତ ଥିବା ପୁଲିସ ଓ କଂଗ୍ରେସ ଦଳର ବରିଷ୍ଠ ନେତାଙ୍କ ହସ୍ତକ୍ଷେପ ଯୋଗୁ ପରିସ୍ଥିତି ଶାନ୍ତ ପଡ଼ିଥିଲା । ହେଲେ ରାତି ୧୦ଟାରେ ପୁଣି ଥରେ ଦୁଇ ଗୋଷ୍ଠୀ ମଧ୍ୟରେ ରିଜେଣ୍ଟ ମାର୍କେଟ ଛକରେ ଗଣ୍ଡଗୋଳ ଆରମ୍ଭ ହୋଇଥିଲା । ଖବର ପାଇ ଏସ୍‌ପି ସୌମ୍ୟା ମିଶ୍ର ଓ ଅନ୍ୟ ପୁଲିସ୍‌ ଅଧିକାରୀମାନେ ଘଟଣା ସ୍ଥଳରେ ପହଞ୍ଚି ଥିଲେ । ଫଳରେ ଉଭୟ ଗୋଷ୍ଠୀର ଲୋକେ ସେଠାରୁ ପଳାଇ ଯାଇଥିଲେ । ରାତିରେ ଯେପରି କୌଣସି ଅଘଟଣ ନଘଟେ ସେଥି ପାଇଁ ବ୍ୟାପକ ପୁଲିସ୍‌ ମୁତୟନ କରାଯାଇଥିଲା ।

ମଙ୍ଗଳବାର ଦିନ ୧୨ଟାରେ ରିଜେଣ୍ଟ ମାର୍କେଟକୁ ଲାଗି ରହିଥିବା ମସଜିଦପଡ଼ା ଓ ଘାସିପଡ଼ା ଲୋକଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଏହି ପାଟିତୁଣ୍ଡ ଶେଷରେ ଉଗ୍ରରୂପ ନେଇଥିଲା । ଉଭୟ ଗୋଷ୍ଠୀ ପରସ୍ପର ଉପରକୁ ଟେକା ପଥର ମାଡ଼ କରିଥିଲେ । ଉତ୍ତେଜନା ଯେପରି ଆଗକୁ ନ ବଢ଼ିବ ସେଥିପାଇଁ ପୁଲିସ୍‌ ପକ୍ଷରୁ ଭିଡ଼କୁ ହଟାଇବା ଲାଗି ମୃଦୁ ଲାଠି ଚାଳନା କରାଯାଇଥିଲା । ଏସ୍‌ପି ପହଞ୍ଚି ପୁଲିସ୍‌ ଅଧିକାରୀଙ୍କ ସହ ଘାସିପଡ଼ା ଓ ମସଜିଦପଡ଼ା ଅଞ୍ଚଳ ବୁଲିବା ସହ ଲୋକଙ୍କୁ ଶାନ୍ତିରେ ରହିବା ଲାଗି ଅନୁରୋଧ କରିଥିଲେ ।

ଏହି ଅବସରରେ ଏସ୍‌ପି ସାମ୍ବାଦିକମାନଙ୍କୁ ସୂଚନା ଦେଇଥିଲେ, ଏହି ଘଟଣା ସହ କଂଗ୍ରେସ ଶୋଭାଯାତ୍ରାରେ ହୋଇଥିବା ଗଣ୍ଡଗୋଳର କୌଣସି ସମ୍ପର୍କ ନାହିଁ । ଏହା ମୁଢ଼ି କିଣାକୁ ନେଇ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଛି ବୋଲି ଜଣାଇଥିଲେ । ରିଜେଣ୍ଟ ମାର୍କେଟ ଅଞ୍ଚଳରେ ଦେଖା ଦେଇଥିବା ଉତ୍ତେଜନାକୁ ନେଇ ଏସ୍‌ପିଙ୍କ ନେତୃତ୍ୱରେ ସଂଧ୍ୟାରେ ଏକ ଶାନ୍ତି କମିଟି ବୈଠକ ରିରେଣ୍ଟ ମାର୍କେଟ୍‌ ଅଞ୍ଚଳରେ ବସିଥିଲା । ବୈଠକରେ ସମସ୍ତ ରାଜନୈତିକ ଦଳର ନେତୃବୃନ୍ଦ, ବରିଷ୍ଠ ନାଗରିକ ଓ ସବୁ ସମ୍ପ୍ରଦାୟର ଲୋକେ ଯୋଗ ଦେଇଥିଲେ । ସମସ୍ତଙ୍କୁ ଶାନ୍ତି ବଜାୟ ରଖିବା ଲାଗି ଏସ୍‌ପି ନିବେଦନ କରିଛନ୍ତି ।

   ସମ୍ବନ୍ଧିତ ଖବର


ଦିବ୍ୟାଙ୍ଗ ଯୁବତୀ ୮ମାସର ଗର୍ଭବତୀ – ଦୁଷ୍କର୍ମ କରିଥିବା ବିବାହିତ ଯୁବକ ଫେରାର

ପୋଖରୀରେ ବୁଡ଼ି ଯୁବକଙ୍କ ମୃତ୍ୟୁ, ଶବ ଉଦ୍ଧାର କଲା ଅଗ୍ନିଶମ ବିଭାଗ

କରୋନା ନେଲା ଆଉ ୧୪ ଜୀବନ, ରାଜ୍ୟରେ ମୃତକଙ୍କ ସଂଖ୍ୟା ୮୪୨କୁ ବୃଦ୍ଧି

ଏମିତିବି ଆସେ ମୃତ୍ୟୁ, ବାଇକ ଚଳାଇବା ବେଳେ ବଜ୍ରାଘାତରେ ଯୁବକଙ୍କ ମୃତ୍ୟୁ

୩୪୪୩ ନୂଆ କରୋନା ପଜିଟିଭ୍ ଚିହ୍ନଟ, ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ୨ ଲକ୍ଷ ୧୯ ହଜାର ୧୧୯କୁ ବୃଦ୍ଧି

ଗୋଟିଏ ପଦବିରେ ଦୁଇ ଅଧିକାରୀ, ଦ୍ୱନ୍ଦ୍ୱରେ କର୍ମଚାରୀ..