ଭୁବନେଶ୍ୱର ୧୬/୦୫ (ସସ୍ମିତା ମଲ୍ଲ): ନିର୍ବାଚନରେ ପ୍ରାର୍ଥୀଙ୍କ ପୋଷାକକୁ ନେଇ ଏବେ ଢ଼େର ଚର୍ଚ୍ଚା । କିଏ ରାହୁଲ ଗାନ୍ଧୀ ଷ୍ଟାଇ୍ଲରେ ଧଳା ଟି-ସାର୍ଟ ପିନ୍ଧୁଛନ୍ତି ତ ଆଉ କିଏ ମୋଦି ଷ୍ଟାଇଲ୍ର କୁର୍ତ୍ତା, ପାଇଜାମା । ମାର୍କେଟକୁ ବାହାରିବାବେଳେ କିନ୍ତୁ ହାଫ୍ କୋଟ୍ ମାରି ବାହାରୁଛନ୍ତି । ପୁଣି ସଫେଦ୍ ସାର୍ଟ ସାଙ୍ଗକୁ ପ୍ୟାଣ୍ଟ୍ର ଚାହିଦା ବି ରହିଛି ।
ନିର୍ବାଚନ ପୂର୍ବରୁ ଯେଉଁ ପରିଧାନ ଥିଲା ହଠାତ୍ ପ୍ରଚାର ସମୟରେ ବଦଳିଯାଇଛି । କେହି କେହି ଦଳୀୟ ରଙ୍ଗର ପୋଷାକ ପିନ୍ଧୁଛନ୍ତି ତ ଆଉ କେହି ବିଭିନ୍ନ ପ୍ରକାରର ଧଳା ପୋଷାକ ପିନ୍ଧୁଛନ୍ତି । କିଏ ଦିନକୁ ୪ରୁ ଅଧିକ ଥର ପୋଷାକ ବଦଳାଉଛନ୍ତି ତ ଆଉ କିଏ ପୋଷାକ ଷ୍ଟାଇଲ୍ ବଦଳାଇ ଚାଲିଛନ୍ତି । ତେଣୁ ବରାଦି ପୋଷାକ ପାଇଁ ଦରଜିଙ୍କ ପାଖରେ ଲାଗୁଛି ଭିଡ଼ । ଆଉ ପୋଷାକ ବଦଳାଇବା ବେଳେ ଅଧିକ ଦାମ୍ର ନ କିଣି କାମ ଚଳାଇବା ଭଳି କମ୍ ଦାମର ପୋଷାକ କିଣୁଛନ୍ତି ।
ସେତିକି ନୁହେଁ ରୁଚି ଅନୁସାରେ ପୋଷାକ ଡିଜାଇନ୍ ବି ହେଉଛି । ସବୁ ପ୍ରାର୍ଥୀଙ୍କ ଗେଟ୍ ଅପ୍ ନିଆରା । କାହାର କାହା ସହ ମ୍ୟାଚ୍ ହେଉନି। ଯେମିତି ଧର୍ମେନ୍ଦ୍ର ପ୍ରଧାନ ସମ୍ବଲପୁରୀ ପୋଷାକ ପିନ୍ଧି ମଇଦାନକୁ ଓହ୍ଲାଉଛନ୍ତି । ବବି ଦାସ ବି ସମ୍ବଲପୁରୀ ହାଫ୍ ସାର୍ଟ ପିନ୍ଧି ସମ୍ବଲପୁରିଆଙ୍କ ମନ କିଣିବାକୁ ଉଦ୍ୟମ କରୁଛନ୍ତି । ସେହିପରି ଅଶୋକ ପଣ୍ଡା ଉପର ବଟମ୍ ଖୋଲି ସାର୍ଟ ପିନ୍ଧୁଛନ୍ତି ତ ଅନନ୍ତ ଜେନା କଳା ପ୍ୟାଣ୍ଟ ସାଙ୍ଗକୁ ଧଳା ଡ୍ରେସ୍ ପିନ୍ଧୁଛନ୍ତି । ବାବୁ ସିଂ ନିର୍ବାଚନ ମଇଦାନରେ ପାଦ ଦେବା ଦିନରୁ ଗେରୁଆ ପୋଷାକ ଛଡା ଆଉ କିଛି ପିନ୍ଧୁନାହାନ୍ତି । କେବେ ଗେରୁଆ କୁର୍ତ୍ତା ତ ଆଉ କେବେ ଗେରୁଆ ରଙ୍ଗର ସାର୍ଟ । ବେକରେ କିନ୍ତୁ ଗେରୁଆ ରଙ୍ଗର ନାମାବଳୀ ଥିବା ଗାମୁଛା ପକାଇବାକୁ ଭୁଲୁ ନାହାନ୍ତି । କର୍ମୀମାନେ ବି ତାଙ୍କୁ ଦେଖି ଗେରୁଆ ଗାମୁଛା ବେକରେ ପକାଇ ଘରକୁ ଘର ବୁଲୁଥିବା ଦେଖିବାକୁ ମିଳୁଛି । ସୁଶାନ୍ତ ରାଉତ ନାମୀଦାମୀ କମ୍ପାନୀର ଧଳା ରଙ୍ଗର ପୋଷାକ ପିନ୍ଧୁଛନ୍ତି । ମନ୍ମଥ ରାଉତରାୟ କିନ୍ତୁ ଟି-ସାର୍ଟ ଓ ବ୍ଲାକ୍ ଚଷମା ପିନ୍ଧି ଭୋଟରଙ୍କ ପାଖକୁ ଯାଉଛନ୍ତି ।
ନେତା କିଣା ସାର୍ଟ ସହ ତିଆରି କୁର୍ତ୍ତା, ପାଇଜାମା ପିନ୍ଧିବାକୁ ପସନ୍ଦ କରୁଛନ୍ତି । କିଛି ବରିଷ୍ଠ ନେତାଙ୍କ ସହ ଦଳୀୟ କର୍ମୀ ଓ ଅନ୍ୟ ନେତାମାନେ ମନପସନ୍ଦର ରଙ୍ଗ ବାଛି କୁର୍ତ୍ତା ତିଆରି କରୁଛନ୍ତି । ସେଥିପାଇଁ ଖୋଜୁଛନ୍ତି ଭଲ ଦରଜି । ତେଣୁ ଯେଉଁ ଦୋକାନୀଙ୍କ ଟିକେ ନାଁ ଅଛି ତାଙ୍କ ପାଖରେ ଜମୁଛି ଭିଡ଼ । କେଉଁ ଭଳି ତିଆରି ହେବ, କୁର୍ତ୍ତା କେତେ ଲମ୍ବା ହେବ, କେତେଟା ପକେଟ୍ ରହିବ, ଏମିତି ବରାଦ ଦିଆଯାଉଥିବା ଅଶୋକ ନଗରସ୍ଥିତ ନାକ୍ସୋ ଲାଇନ୍ର ମନୋଜ କୁମାର ମୁଦୁଲି କହିଛନ୍ତି । କୁର୍ତ୍ତା,ପାଇଜାମା ତିଆରି ମଜୁରି ୧୨୦୦ ଟଙ୍କାରୁ ଆରମ୍ଭ ହେଉଥିବା ସେ କହିଛନ୍ତି । ତାଙ୍କ କହିବା କଥା ପ୍ରଶାନ୍ତ ଜଗଦ୍ଦେବ, ରଣଜିତ୍ ଠାକୁର, କାଳନ୍ଦୀ ସାମଲଙ୍କ ପରି ବହୁ ବରିଷ୍ଠ ନେତା ଏବେ ବି କପଡା ସିଲାଇ କରି ପିନ୍ଧୁଛନ୍ତି ।
ଟି-ସାର୍ଟ ଗୋଦାମରେ ବି କର୍ମୀଙ୍କ ଭିଡ଼ ଲାଗୁଛି । ଟି-ସାର୍ଟ ପାଇଁ ବିଭିନ୍ନ ଦଳ ପକ୍ଷରୁ ବଇନା ଦିଆଯାଇଥିବା ଜଣେ ଟିସାର୍ଟ ଗୋଦାମ ମାଲିକ କହିଛନ୍ତି । ବିଜେଡିର ଧଳା ଓ ସବୁଜ ମିଶା ଏବଂ ବିଜେପି ପାଇଁ କମଳା ରଙ୍ଗର ଗଞ୍ଜି ଅର୍ଡର ଦିଆଯାଉଛି । ଅନ୍ଲାଇନ୍ରେ ମଧ୍ୟ ବିଜେପି ଓ କଂଗ୍ରେସର ଟି-ସାର୍ଟ ଓ ଉତ୍ତରୀୟ ଉପଲବ୍ଧ ହେଲାଣି । ମୁମ୍ବାଇ ଓ ଦିଲ୍ଲୀରୁ ଟି-ସାର୍ଟ ମଗାଯାଉଛି । ଟିସାର୍ଟରେ ରାହୁଲ ଗାନ୍ଧି, କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ୍ଗେଙ୍କ ଭଳି କଂଗ୍ରେସ ତୁଙ୍ଗ ନେତାଙ୍କ ଛବି ରହିଛି । ନିର୍ବାଚନ ପାଇଁ ସେ ୮ କ୍ୱିଣ୍ଟାଲ ଗଞ୍ଜି ଓ ୫୦ ହଜାର ଧଳା ଟୋପି ଆଣିଛନ୍ତି । ଫଟୋ ପ୍ରିଣ୍ଟ୍ ପାଇଁ ଦୁଇଟି ମେସିନ୍ ମଧ୍ୟ ରଖିଛନ୍ତି । ତେବେ କଟନ୍ କପଡ଼ାର ଦର ଅଲଗା ରହିଥିବା ସେ କହିଛନ୍ତି।
