ଜି.ଉଦୟଗିରି, ୧୭/୫ : ଜି.ଉଦୟଗିରି ବ୍ଲକ କଳିଙ୍ଗା ପଞ୍ଚାୟତ ଅନ୍ତର୍ଗତ କୁରୁ୍ମିଙ୍ଗିଆ ଗ୍ରାମରେ ଗୁରୁବାର ମଧ୍ୟରାତ୍ରୀରେ ୧୮ ଟିକିଆ ହାତୀପଲ ପଶିଆସିଛନ୍ତି। ଏହି ପଲରେ ୧୮ଟି ହାତୀ ଅଛନ୍ତି। ଏମାନେ ଗଞ୍ଜାମ ଜିଲ୍ଲା ଘୁମୁସର ବନଖଣ୍ଡରୁ ଆସିଥିବା ଅନୁମାନ କରାଯାଉଛି। ସବୁ ବର୍ଷ ଭଳି ହାତୀପଲ ଖାଦ୍ୟ ସନ୍ଧାନରେ ଆସିଥିବା କୁହାଯାଉଛି। ତେଣୁ କୁରୁ୍ମିଙ୍ଗିଆ ଗ୍ରାମବାସୀ ଆଗୁଆ ଧାନ ଫସଲ କାଟି ଘରକୁ ଆଣୁଛନ୍ତି।
ଗ୍ରାମବାସୀଙ୍କ କହିବାନୁଯାୟୀ, ଗୁରୁବାର ମଧ୍ୟରାତ୍ରୀରେ ଏହି ହାତୀପଲ ଆମ୍ବ, ପଣସ ସମେତ ଧାନ ଫସଲ ନଷ୍ଟ କରିଛନ୍ତି। ଏବେ ସେମାନେ ଘଞ୍ଚ ଜଙ୍ଗଲ ମଧ୍ୟରେ ରହିଥିବା ଅନୁମାନ କରାଯାଉଛି। ଜଙ୍ଗଲର ବିଭିନ୍ନ ସ୍ଥାନରେ ହାତୀଙ୍କ ମାଳ ପଡିଥିବା ଦେଖିବାକୁ ମିଳିଛି। ହାତୀପଲ ଗାଁ ମଧ୍ୟରେ ଥିବା ଆମ୍ବ, ପଣସ, କଦଳୀ ମଧ୍ୟ ଖାଇଥିବା ଲୋକେ କହିଛନ୍ତି। ସକାଳୁ ଖବର ପାଇ ବନବିଭାଗ କର୍ମଚାରୀ ପହଞ୍ଚି ହାତୀପଲଙ୍କ ଗତିଵିଧି ଉପରେ ନଜର ରଖିବା ସହ ଲୋକଙ୍କୁ ଜଙ୍ଗଲ ଭିତରକୁ ନଯିବା ପାଇଁ ପରାମର୍ଶ ଦେଇଛନ୍ତି।