ସହିଦଙ୍କ ପରିବାର ପାଇଁ ସହାୟତାର ସୁଅ

ନୂଆଦିଲ୍ଲୀ, ୧୫ ।୨(ଏଜେନ୍ସି): ପୁଲୱାମା ଆକ୍ରମଣ ଘଟଣାରେ ସହିଦ ହୋଇଥିବା ୧୬ ରାଜ୍ୟର ୪୦ ଯବାନଙ୍କ ପରିବାର ପାଇଁ ବିଭିନ୍ନ ମହଲରୁ ସହାୟତାର ସୁଅ ଛୁଟିଛି । ୟୁପି ସରକାର ରାଜ୍ୟର ୧୨ ସହିଦଙ୍କ ପରିବାରକୁ ୨୫ ଲକ୍ଷ ଟଙ୍କା ଲେଖାଁଏ ଆର୍ଥିକ ସହାୟତା ସହ ପରିବାରର ଜଣକୁ ଚାକିରି ପ୍ରଦାନ କରାଯିବ ବୋଲି ଘୋଷଣା କରିଛନ୍ତି । ତା’ଛଡା ପ୍ରତି ସହିଦ ଯବାନଙ୍କ ଗ୍ରାମକୁ ସଂଯୁକ୍ତ କରୁଥିବା ରାସ୍ତାର ନାମ ତାଙ୍କ ନାମରେ ନାମିତ କରାଯିବ ବୋଲି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସୂଚନା ଦେଇଛନ୍ତି । ଓଡ଼ିଶା ସରକାର ରାଜ୍ୟର ଦୁଇ ସହିଦଙ୍କ ପରିବାରକୁ ୧୦ ଲକ୍ଷ ଟଙ୍କା ଲେଖାଁଏ ଅନୂକମ୍ପାମୂଳକ ସହାୟତା ଦିଆଯିବ ବୋଲି ପ୍ରକାଶ କରିଛନ୍ତି । ମଧ୍ୟପ୍ରଦେଶରୁ ଜଣେ ଯବାନ ସହିଦ ହୋଇଥିଲାବେଳେ ମୁଖ୍ୟମନ୍ତ୍ରୀ କମଲନାଥ ତାଙ୍କ ପରିବାରକୁ କୋଟିଏ ଟଙ୍କା, ଜଣକୁ ଚାକିରି ଏବଂ ପରିବାର ପାଇଁ ଘର ଯୋଗାଇ ଦିଆଯିବ ବୋଲି ଘୋଷଣା କରିଛନ୍ତି । ମହାରାଷ୍ଟ୍ର ସରକାର ରାଜ୍ୟର ଦୁଇ ସହିଦଙ୍କ ପରିବାରକୁ ୫୦ ଲକ୍ଷ ଟଙ୍କା ଲେଖାଁଏ ଦେବାକୁ ନିଷ୍ପତ୍ତି ନେଇଛନ୍ତି । ରାଜ୍ୟର ସିଦ୍ଧିବିନାୟକ ମନ୍ଦିର ଟ୍ରଷ୍ଟ ସମସ୍ତ ୪୦ ସହିଦଙ୍କ ପାଇଁ ୫୧ ଲକ୍ଷ ଟଙ୍କାର ସହାୟତା ପ୍ରଦାନ କରିଛି । ତାମିଲନାଡୁରେ ଦୁଇ ସହିଦଙ୍କ ପରିବାରକୁ ରାଜ୍ୟ ସରକାର ୨୦ ଲକ୍ଷ ଟଙ୍କା ଲେଖାଁଏ ସହାୟତା ରାଶି ପ୍ରଦାନ କରିବେ ବୋଲି ସୂଚନା ଦିଆଯାଇଛି ।