ନୂଆଦିଲ୍ଲୀ: ଦିଲ୍ଲୀର ପଣ୍ଡିତ ପନ୍ତ ମାର୍ଗରେ ଅବସ୍ଥିତ ଭାରତୀୟ ଜନତା ପାର୍ଟି କାର୍ଯ୍ୟାଳୟରେ ଆଜି (ଗୁରୁବାର) ହଠାତ୍ ନିଆଁ ଦେଖାଦେଇଥିଲା । ଏହି ସମୟରେ କାର୍ଯ୍ୟାଳୟ ଭିତରେ ବିଶୃଙ୍ଖଳା ଖେଳିଯାଇଥିଲା । ବିଶୃଙ୍ଖଳା ମଧ୍ୟରେ ଏହି ସୂଚନା ଅଗ୍ନିଶମ ବାହିନୀକୁ ଦିଆଯାଇଥିଲା। ଅଗ୍ନିଶମ ବାହିନୀ ଗାଡି ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣ କରିବାକୁ ଚେଷ୍ଟା କରିବା ଆରମ୍ଭ କରିଥିଲା । ୧୫ ମିନିଟ ମଧ୍ୟରେ ନିଆଁକୁ ନିୟନ୍ତ୍ରଣକୁ ନିଆଯାଇଥିଲା । ଏଥିରେ କୌଣସି ପ୍ରକାରର କ୍ଷୟକ୍ଷତିର ସୂଚନା ନାହିଁ ।
ଅନ୍ୟପକ୍ଷରେ, ଦିଲ୍ଲୀ ବିଜେପି ମିଡିଆ ସେଲ ପକ୍ଷରୁ କୁହାଯାଇଛି ଯେ, ବିଦ୍ୟୁତ ମିଟର ବାକ୍ସରେ ସର୍ଟ ସର୍କିଟ ଯୋଗୁଁ ଆଜି ଅପରାହ୍ନ ପ୍ରାୟ ୪.୧୫ ସମୟରେ ଦିଲ୍ଲୀ ବିଜେପି କାର୍ଯ୍ୟାଳୟରେ ଅଗ୍ନିକାଣ୍ଡ ଘଟିଥିଲା । ଅଗ୍ନିକାଣ୍ଡ ସମ୍ପର୍କରେ ସୂଚନା ପାଇବା ମାତ୍ରେ ଏନଡିଏମସି ବୈଦ୍ୟୁତିକ କର୍ମଚାରୀ ଏବଂ ଅଗ୍ନିଶମ ବାହିନୀ ଦଳ ବିଜେପି କାର୍ଯ୍ୟାଳୟରେ ପହଞ୍ଚିଥିଲେ । ଅପରାହ୍ନ ସାଢେ ୪ଟା ସୁଦ୍ଧା ନିଆଁକୁ ଆୟତ୍ତ କରାଯାଇଥିଲା । କେବଳ କାର୍ଯ୍ୟାଳୟ ପରିସରରେ ବିଦ୍ୟୁତ୍ ବିଛିନ୍ନ କରାଯାଇଛି । ଏହାର ପୁନରୁଦ୍ଧାର ପାଇଁ କିଛି ଘଣ୍ଟା ଲାଗିପାରେ । ଏହି ଅଗ୍ନିକାଣ୍ଡରେ କୌଣସି ସମ୍ପତ୍ତିର କିମ୍ବା ଜୀବନ କ୍ଷୟକ୍ଷତି ହୋଇନାହିଁ ।