ଭୁବନେଶ୍ୱର,୨୬/୦୪: ରାଜ୍ୟରେ ପ୍ରଥମ ପର୍ଯ୍ୟାୟ ମତଦାନ ପାଇଁ ଗୁରୁବାର ଶେଷ ହୋଇଛି ନାମାଙ୍କନ । ରାଜ୍ୟର ୪ଟି ଲୋକସଭା ଓ ତା ଅନ୍ତର୍ଗତ ୨୮ ବିଧାନସଭାରେ ପ୍ରାର୍ଥୀମାନେ ନାମାଙ୍କନପତ୍ର ଦାଖଲ କରିଛନ୍ତି । ମୋଟ କେତେ ସଂଖ୍ୟାରେ ପ୍ରାର୍ଥୀ ପ୍ରାର୍ଥିପତ୍ର ଦାଖଲ କରିଛନ୍ତି ତା’ର ଚୂଡ଼ାନ୍ତ ସୂଚନା ହସ୍ତଗତ ହୋଇନି । ତେବେ ୨୪ ତାରିଖ ସୁଦ୍ଧା ୪ ଲୋକସଭା ଆସନରେ ୩୦ ଜଣ ପ୍ରାର୍ଥୀ ତାଙ୍କ ସମର୍ଥକଙ୍କ ଗହଣରେ ଆସି ନାମାଙ୍କନପତ୍ର ଦାଖଲ କରିଛନ୍ତି । ସେହିଭଳି ୨୮ ବିଧାନସଭା ସିଟ୍ରେ ୧୭୮ ଜଣ ପ୍ରାର୍ଥୀ ପ୍ରାର୍ଥିପତ୍ର ଦାଖଲ କରିଛନ୍ତି ।
ରାଜ୍ୟରେ ଦ୍ୱିତୀୟ ପର୍ଯ୍ୟାୟ ଭୋଟ ଗ୍ରହଣ ଆସନ୍ତା ମେ ୨୦ରେ ଅନୁଷ୍ଠିତ ହେବ । ଏଥିପାଇଁ ଶୁକ୍ରବାର ବିଧିବଦ୍ଧ ବିଜ୍ଞପ୍ତି ଜାରି ସହ ନାମାଙ୍କନ ଆରମ୍ଭ ହେବ । ଆସନ୍ତା ୩ ଯାଏ ପ୍ରାର୍ଥୀମାନେ ତାଙ୍କ ନାମାଙ୍କନ କରିପାରିବେ । ୬ ମେ ଯାଏ ପ୍ରାର୍ଥୀମାନେ ନିଜ ପ୍ରାର୍ଥିପତ୍ର ପ୍ରତ୍ୟାହାର କରିପାରିବେ ।
ପ୍ରଥମ ଦଫାରେ ରାଜ୍ୟର କଳାହାଣ୍ଡି, ନବରଙ୍ଗପୁର, ବ୍ରହ୍ମପୁର, କୋରାପୁଟ ଲୋକସଭା ଆସନ ସହ ସଂଲଗ୍ନ ୨୮ ବିଧାନସଭା ଆସନ ପାଇଁ ପ୍ରଥମ ପର୍ଯ୍ୟାୟରେ ଆସନ୍ତା ମେ ୧୩ରେ ଭୋଟ ଗ୍ରହଣ କରାଯିବ । ଏଥିପାଇଁ ଗତ ୧୮ରୁ ନାମାଙ୍କନ ଆରମ୍ଭ ହୋଇଥିଲା । କଳାହାଣ୍ଡି ଆସନ ପାଇଁ ୧୦ ଜଣ ପ୍ରାର୍ଥୀ ଥିଲା ବେଳେ ନବରଙ୍ଗପୁରରେ ୩, ବ୍ରହ୍ମପୁରରେ ୮ ଏବଂ କୋରାପୁଟ ଏମପି ଆସନରେ ୯ ଜଣ ପ୍ରାର୍ଥିପତ୍ର ଦାଖଲ କରିଛନ୍ତି । ଗୁରୁବାର ସଂଖ୍ୟା ମିଶିଲେ ମୋଟ ସଂଖ୍ୟା ଆହୁରି ଅଧିକ ହେବ ।
ସେହିଭଳି ୨୮ ବିଧାନସଭା ସିଟରେ ମଧ୍ୟ ପ୍ରାର୍ଥୀମାନେ ଉତ୍ସାହର ସହ ନାମାଙ୍କନ କରିଛନ୍ତି । ୨୪ ସୁଦ୍ଧା ନୂଆପଡ଼ା, ଖରିଆର, ଜୁନାଗଡ଼, ଭବାନୀପାଟଣା, ଗୋପାଳପୁର, ପାରଳାଖେମୁଣ୍ଡି, ରାୟଗଡ଼ା ଓ ଜୟପୁରରେ ୬ ଜଣ ଲେଖାଏଁ ନାମାଙ୍କନ କରିଛନ୍ତି । ଝରିଗାଁ, ନବରଙ୍ଗପୁର, ଡାବୁଗାଁ ଆସନ ପାଇଁ ୩ ଜଣ ଲେଖାଏଁ, ଲାଞ୍ଜିଗଡ, ଧର୍ମଗଡ, ମୋହନା, ଲକ୍ଷ୍ମୀପୁର ଓ ମାଲକାନଗିିରିରେ ୫ ଜଣ ଲେଖାଏଁ ପ୍ରାର୍ଥିପତ୍ର ଦାଖଲ କରିଛନ୍ତି । ସେହିଭଳି ଉମରକୋଟ, କୋଟପାଡ଼ ଓ ଚିତ୍ରକୋଣ୍ଡାରେ ୪ ଜଣ ଲେଖାଏଁ ନାମାଙ୍କନ କରିଛନ୍ତି ।
ନର୍ଲା, ଚିକିଟି, କୋରାପୁଟ ଓ ପଟାଙ୍ଗୀରେ ୮ ଜଣ ଲେଖାଏଁ, ବ୍ରହ୍ମପୁରରେ ୧୬, ଦିଗପହଣ୍ଡିରେ ୧୨, ଗୁଣୁପୁରରେ ୧୦ ଜଣ ଲେଖାଏଁ ପ୍ରାର୍ଥୀ ଅଛନ୍ତି । ଛତ୍ରପୁର ଓ ବିଷମକଟକରେ ୭ ଜଣ ଲେଖାଏଁ ପ୍ରାର୍ଥୀ ନାମାଙ୍କନ କରିଛନ୍ତି । ଆଜି ଶେଷ ଦିନରେ ଆଉ କିଛି ପ୍ରାର୍ଥୀ ନାମାଙ୍କନ କରିଥିଲେ ମଧ୍ୟ ଚୂଡ଼ାନ୍ତ ସଂଖ୍ୟା ହସ୍ତଗତ ହୋଇନାହିଁ । ଶୁକ୍ରବାର ଯାଞ୍ଚ କରାଯିବ । ୨୯ ସୁଦ୍ଧା ପ୍ରାର୍ଥିପତ୍ର ପ୍ରତ୍ୟାହାର କରିହେବ।