ଉତ୍ତର ଭୁବନେଶ୍ୱର,୨୭/୦୭(ବ୍ୟୁରୋ): ରାଜଧାନୀରେ ଲୁଟେରାଙ୍କୁ ଧରିବାକୁ ପୁଲିସ ଚଳାଇଛି ବ୍ଲକିଂ ଚେକିଂ । ସେପଟେ ପୁଲିସକୁ ଖୋଲା ଚ୍ୟାଲେଞ୍ଜ ଦେଇ ଲୁଟେରା ଆତଙ୍କ ଖେଳାଇ ଚାଲିଛନ୍ତି । ଶୁକ୍ରବାର ରାତି ୯ଟାରେ ସହିଦନଗର ଥାନା ଅନ୍ତର୍ଗତ କେଶୁରା ନଦୀ ବନ୍ଧ ଉପରେ କାର୍‌ ଅଟକାଇ ଚାଳକଙ୍କୁ ବନ୍ଧୁକ ବଟ୍‌ରେ ପିଟି ଗୁରୁତର କରି ପକାଇଛନ୍ତି । ଷ୍ଟେଟ୍‌ ବ୍ୟାଙ୍କ୍‌ ଅଫ୍‌ ଇଣ୍ଡିଆ ବାଳକାଟୀ ଶାଖାର ମ୍ୟାନେଜର ବିଜୟଲକ୍ଷ୍ମୀ ଭୂୟାଁଙ୍କୁ ବନ୍ଧୁକ ଦେଖାଇ ଭୟଭୀତ କରି ତାଙ୍କ ଠାରୁ ସୁନାଗହଣା ଲୁଟି ନେଇଛନ୍ତି । ଏହି ସମୟରେ ଲୋକେ ଆସିଯିବାରୁ ଦୁଇ ଲୁଟେରା ସେମାନଙ୍କୁ ମଧ୍ୟ ବନ୍ଧୁକ ଦେଖାଇ ଭୟଭୀତ କରି ଚମ୍ପଟ ମାରିଛନ୍ତି ।
ଘଟଣାରୁ ଜଣାଯାଇଛି, ବିଜୟଲକ୍ଷ୍ମୀ କେଶୁରା ଶ୍ରୀକ୍ଷେତ୍ରନଗରରେ ରହୁଛନ୍ତି । ସେ ତାଙ୍କ କାର୍‌ରେ କୋରଡ଼କଣ୍ଟାରେ ରହୁଥିବା ଶାରଦା ପ୍ରସାଦ ସାହୁଙ୍କ ସହ ରାତି ୯ଟାବେଳେ ବାଳକାଟୀରୁ ଘରକୁ ଫେରୁଥିଲେ ।

ସେମାନେ କେଶୁରା ନଦୀବନ୍ଧ ଉପରେ ହଠାତ୍‌ ଏକ ବାଇକ୍‌ରେ ଦୁଇ ଜଣ ଯୁବକ ଆସି କାର୍‌ ଅଟକାଇ ଚାଳକଙ୍କୁ ଗାଳିଗୁଲଜ କରିଥିଲେ । ରାସ୍ତାରେ କାହିଁକି ଏପଟ ସେପଟ କରି ଗାଡ଼ି ଚଳାଉଛୁ କହି ପାଟି କରିଥିଲେ । ପରେ ବାଇକ୍‌ ପଛରେ ବସିଥିବା ଯୁବକ ଜଣଙ୍କ ଓହ୍ଲାଇ ପଡ଼ି ବନ୍ଧୁକ ବାହାର କରି ବଟ୍‌ରେ ଶାରଦାଙ୍କ ମୁଣ୍ଡକୁ ପିଟି ଦେଇଥିଲେ । ଶାରଦାଙ୍କ ମୁଣ୍ଡ ଫାଟି ପ୍ରଚୁର ରକ୍ତଶ୍ରାବ ହୋଇଥିଲା । ବାଇକ୍‌ରେ ଥିବା ଅନ୍ୟ ଯୁବକ ଜଣକ କାର୍‌ ବାମ ସିଟ୍‌ରେ ବସିଥିବା ବିଜୟଲକ୍ଷ୍ମୀଙ୍କୁ ବନ୍ଧୁକ ଦେଖାଇ ବିଜୟଲକ୍ଷ୍ମୀ ପିନ୍ଧିଥିବା ସୁନାହାର, ଚୁଡ଼ି ଓ କାନଫୁଲ ଲୁଟି ନେଇଥିଲା । ଏହି ସମୟରେ କେଶୁରାର ଦୁଇ ଜଣ ବାଇକ୍‌ରେ ଆସୁଥିଲେ । ସେମାନେ ପାଟି କରିବାରୁ ୨ଲୁଟେରା ସେମାନଙ୍କୁ ମଧ୍ୟ ବନ୍ଧୁକ ଦେଖାଇ ଭୟଭୀତ କରିଥିଲେ । ପରେ ବାଇକ୍‌ରେ ଫେରାର ହୋଇଯାଇଥିଲେ । ଖବର ପାଇ ସହିଦନଗର ଥାନା ପୁଲିସ ପହଞ୍ଚି ଦୁଇ ଲୁଟେରାଙ୍କ ପିଛା କରିଥିଲେ ମଧ୍ୟ ପାଇ ନଥିଲା । ପୁଲିସ କାର୍‌ ଚାଳକ ଶାରଦାଙ୍କୁ ନେଇ ହସ୍ପିଟାଲରେ ଭର୍ତ୍ତି କରିଛି । ବିଜୟଲକ୍ଷ୍ମୀଙ୍କ ଅଭିଯୋଗକୁ ଭିତ୍ତିକରି ପୁଲିସ ଏକ ମାମଲା ରୁଜୁକରି ତଦନ୍ତ ଆରମ୍ଭ କରିଛି ।