ଗୋପାଳପୁର,୧୧/୦୫: ଆଜି ଗୋପାଳପୁର ବତୀଘର ପର୍ଯ୍ୟଟକ ନିମନ୍ତେ ଖୋଲିବ । କେନ୍ଦ୍ର ବନ୍ଦର ନୌପରିବହନ ଏବଂ ଜଳମାର୍ଗ ମନ୍ତ୍ରାଳୟ ଅନ୍ତର୍ଗତ ବତିଘର ଏବଂ ବତିଜାହାଜ ନିର୍ଦ୍ଦେଶାଳୟ (କୋଲକତା) କାର୍ଯ୍ୟାଳୟ ପକ୍ଷରୁ ଏ ସମ୍ପର୍କିତ ଚିଠି ଶୁକ୍ରବାର ଗୋପାଳପୁର ବତୀଘର କର୍ତ୍ତୃପକ୍ଷଙ୍କ ହସ୍ତଗତ ହୋଇଥିବା କହିଛନ୍ତି ଅଧିକାରୀ ଏସ୍. କେ. ପାଢ଼ୀ । ବତିଘର ସନ୍ଧ୍ୟା ୪ଟାରୁ ୫ଟା ପର୍ଯ୍ୟନ୍ତ ପର୍ଯ୍ୟଟକଙ୍କ ପାଇଁ ଖୋଲା ରହିବ ।
ସେମାନେ ବତିଘର ଶୀର୍ଷକୁ ଯାଇପାରିବେ । ବୟସ୍କଙ୍କ ପାଇଁ ୧୦ ଟଙ୍କା ଟିକଟ, ୧୨ ବର୍ଷରୁ କମ୍ ପିଲାଙ୍କ ପାଇଁ ୩ ଟଙ୍କା ଓ ବିଦେଶୀ ପର୍ଯ୍ୟଟକଙ୍କ ସକାଶେ ୨୫ ଟଙ୍କା ଧାର୍ଯ୍ୟ ହୋଇଛି । ସେହିପରି ଫଟୋଗ୍ରାଫି ସକାଶେ ୨୦ ଟଙ୍କା, ଭିଡିଓଗ୍ରାଫି ନିମନ୍ତେ ୨୫ ଟଙ୍କା ପଇଠ କରିବାକୁ ହେବ । ବତିଘର ଶୀର୍ଷକୁ ଯିବା ପାଇଁ ବିଭିନ୍ନ ନିୟମାବଳୀ ରହିଛି । ପର୍ଯ୍ୟଟକଙ୍କ ପାଇଁ ବତିଘର ପରିସରରେ ସେଲ୍ଫି ପଏଣ୍ଟ, ପାର୍କ, ଶୌଚାଳୟ, ପାନୀୟ ଜଳ ଆଦି ବ୍ୟବସ୍ଥା ରହିଛି । ସୂଚନା ପ୍ରକାରେ ୨୦୧୩ ମସିହା ଠାରୁ ସର୍ବସାଧାରଣଙ୍କ ପ୍ରବେଶ ଉପରେ କଟକଣା ଲାଗି ରହିଥିଲା । ମୁମ୍ବାଇ ଆତଙ୍କବାଦୀ ଆକ୍ରମଣ ପରେ ଉପକୂଳ ସୁରକ୍ଷାକୁ ନଜରରେ ରଖି ସାମୁଦ୍ରିକ ପଥ ଉପରେ କଡ଼ା ନଜର ରଖିବା ପାଇଁ କେନ୍ଦ୍ର ସରକାରଙ୍କ ନିଷ୍ପତ୍ତି ପ୍ରକାରେ ସେତେବେଳେ ଏହି ବତିଘର ଉପରେ ଏକ ରାଡାର୍ ଖଞ୍ଜାଯାଇଥିଲା । ତଟରକ୍ଷୀ ବାହିନୀର ଏହି ରାଡାର୍ ସଂଯୋଗକୁ ଦୃଷ୍ଟିରେ ରଖି ଉପରୋକ୍ତ କଟକଣା ଜାରି ହୋଇଥିଲା । ତେବେ ଶନିବାରରୁ ବତିଘର ଗୋପାଳପୁରକୁ ଆସୁଥିବା ପର୍ଯ୍ୟଟକଙ୍କ ସକାଶେ ଅନ୍ୟତମ ଆକର୍ଷଣ ହେବ ବୋଲି ଆଶା କରାଯାଉଛି