ଭୁବନେଶ୍ୱର ୨୩/୩: ରାଜ୍ୟର ୫ ଜିଲ୍ଲା ଓ ୮ ସହରରେ ଲକଡାଉନ୍ ଆରମ୍ଭ ହୋଇଥିଲା ବେଳେ କେଉଁ ବିଭାଗର କର୍ମଚାରୀ ଅଫିସ ଆସିବେ ଏବଂ କେଉଁ ବିଭାଗ ଆସିବେନି ସେ ନେଇ ସାଧାରଣ ପ୍ରଶାସନ ବିଭାଗ ନିଷ୍ପତ୍ତି ନେଇଛି । ସରକାରଙ୍କ ସମସ୍ତ ବିଭାଗକୁ ୩ ଭାଗରେ ବିଭକ୍ତ କରାଯାଇଛି । ଜରୁରିକାଳୀନ ବିଭାଗ, ଆଂଶିକ ଜରୁରି ଓ ଜରୁରି ଶୂନ୍ୟ ବିଭାଗ ଭାବେ ଚିହ୍ନଟ କରାଯାଇଛି । ଜରୁରିଶୂନ୍ୟ ୨୫ ବିଭାଗର କର୍ମଚାରୀ ଲକ୍ଡାଉନ ବେଳେ ଅଫିସ ନ ଆସିବାକୁ କୁହାଯାଇଛି ।
ଜରୁରି ବିଭାଗର କର୍ମଚାରୀ ଅଫିସ ଆସିବେ । ତେବେ ବିଭାଗ ଅଧୀନସ୍ଥ ନିର୍ଦ୍ଦେଶାଳୟ ଓ ସଂସ୍ଥାର କର୍ମଚାରୀ ଆସିବେ ନା ନାହିଁ ବିଭାଗୀୟ ସଚିବ ନିଷ୍ପତ୍ତି ନେବେ । ସରକାରଙ୍କର ଖାଦ୍ୟ ଯୋଗାଣ, ସାଧାରଣ ପ୍ରଶାସନ, ଗୃହ ଓ ନଗର ଉନ୍ନୟନ,ସ୍ୱାସ୍ଥ୍ୟ ଓ ପରିବାର କଲ୍ୟାଣ, ସ୍ୱତନ୍ତ୍ର ରିଲିଫ କମିଶନର ଓ ଓସଡମାକୁ ଏହାର ଅନ୍ତର୍ଭୁକ୍ତ କରାଯାଇଛି । ସେହିଭଳି ଆଂଶିକ ଜରୁରି ବିଭାଗର ସଚିବ ଓ ପ୍ରମୁଖ ଅଧିକାରୀ ଅଫିସ ଆସିବେ । ବିଭାଗର ନିର୍ଦ୍ଦେଶାଳୟ ଓ ସଂସ୍ଥାର କର୍ମଚାରୀ ଆସିବେ ନା ନାହିଁ ସଚିବ ନିଷ୍ପତ୍ତି ନେବେ । ତେବେ ଉଦ୍ୟୋଗଗୁଡ଼ିକ ଅଳ୍ପ କର୍ମଚାରୀରେ କାମ ଚଳାଇବାକୁ କୁହାଯାଇଛି । ଏହା ଅଧୀନରେ ବାଣିଜ୍ୟ ଓ ପରିବହନ, ଇଲେକଟ୍ରୋନିକ ଓ ଆଇଟି, ଶକ୍ତି, ଅର୍ଥ, ସୂଚନା ଓ ଲୋକସଂପର୍କ, ପଞ୍ଚାୟତିରାଜ, ରାଜସ୍ୱ, ଅନୁସୂଚିତ ଜାତି ଓ ଜନଜାତି ଏବଂ ପୂର୍ତ୍ତ ବିଭାଗ ରହିଛି ।
ଜରୁରିଶୂନ୍ୟ ବିଭାଗର କର୍ମଚାରୀମାନେ ଅଫିସ ଆସିବେନି । ସେମାନେ ଘରୁ ଟେଲିଫୋନରେ କାମ ତଦାରଖ କରିବାକୁ କୁହାଯାଇଛି । ପରବର୍ତ୍ତୀ କାର୍ଯ୍ୟପନ୍ଥା ନେଇ ସେମାନଙ୍କୁ ଆଗକୁ ଅବଗତ କରାଯିବ । ଏହା ଅଧୀନରେ କୃଷି, ସମବାୟ, ଅବକାରୀ, ଜଙ୍ଗଲ ଓ ପରିବେଶ, ହସ୍ତତନ୍ତ ଓ ବୟନଶିଳ୍ପ, ଉଚ୍ଚଶିକ୍ଷା, ଆଇନ, ଶିଳ୍ପ, ଏମଏସଏମଇ, ସଂସଦୀୟ ବ୍ୟାପାର, ଗ୍ରାମ୍ୟ ଉନ୍ନୟନ, ବିଦ୍ୟାଳୟ ଓ ଗଣଶିକ୍ଷା, ଇସ୍ପାତ ଓ ଖଣି, ପର୍ଯ୍ୟଟନ, ଜଳସମ୍ପଦ, ବିଜ୍ଞାନ ଓ କାରିଗରୀ, ଯୋଜନା ଓ ସଂଯୋଜନ, ଶ୍ରମ, ମହିଳା ଓ ଶିଶୁ ବିକାଶ, କ୍ରୀଡ଼ା ଓ ଯୁବ ସେବା ।
