ଘରୋଇ ମଇଦାନରେ ଓଡ଼ିଶା ଫେଲ୍‌; ଲଗାତାର ଦ୍ୱିତୀୟ ପରାଜୟ, ୧୦ ରନ୍‌ରେ ଜିତିଲା ହରିଆନା

କଟକ,୨୨ା୨(ବ୍ୟୁରୋ): ସୟଦ ମୁସ୍ତାକ ଅଲ୍ଲୀ ଟି-ଟ୍ୱେଣ୍ଟିରେ ଓଡ଼ିଶା ଲଗାତାର ଦ୍ୱିତୀୟ ମ୍ୟାଚରେ ପରାଜୟର ସାମ୍ନା କରିଛି । ହରିଆନା ୧୦ ରନ୍‌ରେ ଘରୋଇ ଦଳକୁ ପରାସ୍ତ କରିଛି । ବାରବାଟୀ ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍‌ରେ ପ୍ରଥମେ ବ୍ୟାଟିଂ କରି ହରିଆନା ୧୯.୫ ଓଭରରେ ୧୪୧ ରନ୍‌ରେ ଅଲ୍‌ଆଉଟ ହୋଇଯାଇଥିଲା । ସୂର୍ଯ୍ୟକାନ୍ତ ପ୍ରଧାନ ଓ ପପୁ ରୟ ୩ଟି ଲେଖାଏଁ ୱିକେଟ୍‌ ଅକ୍ତିଆର କରିଥିଲେ । ଜବାବରେ ଓଡ଼ିଶା ବିଜୟ ଲକ୍ଷ୍ୟର ପିଛା କରି ୫ୱିକେଟରେ ୧୩୧ ରନ୍‌ କରିପାରିଥିଲା ।

ଓଡ଼ିଶା ଟସ୍‌ ଜିଣି ପ୍ରଥମେ ଫିଲ୍ଡିଂ କରିବାର ନିଷ୍ପତ୍ତି ନେଇଥିଲା । ଫଳରେ ହରିଆନା ବ୍ୟାଟିଂ କରିବାକୁ ଓହ୍ଲାଇଥିଲା । ଦ୍ୱିତୀୟ ଓଭରରେ ସୂର୍ଯ୍ୟକାନ୍ତ ପ୍ରଧାନଙ୍କ ଏକ ବଲ୍‌ରେ ଓପନର ତ୍ରେୟକଶ ବାଲି (୧ ରନ୍‌) ଆଉଟ୍‌ ହୋଇଥିଲେ । ପେସ୍‌ ବୋଲିଂକୁ ହରିଆନାର ଖେଳାଳି ମାନେ ବେଶ୍‌ ସହଜରେ ଖେଳିପାରୁଥିବା ବେଳେ ଠିକଣା ସମୟରେ ରଣନୀତି ବଦଳାଇଥିଲେ ଓଡ଼ିଶା ଅଧିନାୟକ ଶୁଭ୍ରାଂଶୁ ସେନାପତି । ପପୁ ରୟଙ୍କୁ ବୋଲିଂ କରାଇ ରନ୍‌ ଉପରେ ଅଙ୍କୁଶ ଲଗାଇଥିଲେ ।

ସୂର୍ଯ୍ୟ ଓ ପପୁଙ୍କୁ ସାମ୍ନା କରି ନପାରି ନିୟମିତ ବ୍ୟବଧାନରେ ହରିଆନା ୱିକେଟ ହରାଇଥିଲା । ଫଳରେ ଦଳ ୧୯.୫ ଓଭରରେ ଦଳ ଅଲ୍‌ ଆଉଟ୍‌ ହୋଇଯାଇଥିଲା । ହରିଆନା ପକ୍ଷରୁ ଓପନର ଏଚ୍‌.ଜେ.ରାଣା ୨୫, ସି.କେ.ବିଷ୍ଣୋଇ ୧୪, ଏନ୍‌.ଆର୍‌.ସାଇନି ୨୨, ପ୍ରମୋଦ ଚଣ୍ଡିଲା ୧୪, ଏସ୍‌.ପି.କୁମାର ୧୮, ଆର୍‌.କେ.ତେୱାଟିଆ ୧୩, ଅରୁଣ ଚପର୍ଣ୍ଣା ୧୦, ଅମିତ ମିଶ୍ରା ୨, ଏ.କେ.ଚହଲ୍‌ ୧୨ରନ୍‌ କରିଥିଲେ । ଓଡ଼ିଶା ପକ୍ଷରୁ ପପୁ ରୟ ୪ ଓଭର ବୋଲିଂ କରି ମାତ୍ର ୯ ରନ୍‌ ବ୍ୟୟରେ ୩ ୱିକେଟ ପାଇଥିଲେ । ସେହିପରି ୩.୫ ଓଭର ବୋଲିଂ କରି ୩୧ ରନ୍‌ ଦେଇ ୩ ୱିକେଟ ନେଇଥିଲେ ସୂର୍ଯ୍ୟକାନ୍ତ ପ୍ରଧାନ । ରାଜେଶ ମହାନ୍ତି ଓ ଗୋବିନ୍ଦ ପୋଦ୍ଦାରଙ୍କୁ ଗୋଟିଏ ଲେଖାଏଁ ୱିକେଟ ମିଳିଥିଲା ।

ବିଜୟ ଲକ୍ଷ୍ୟକୁ ପିଛା କରି ଓଡ଼ିଶା ତରଫରୁ ଅନୁରାଗ ଷଡଙ୍ଗୀ ଓ ରାଜେଶ ଧୂପର ଓପନିଂ କରିଥିଲେ । ରାଜେଶ ବେଶ୍‌ କିଛି ସମୟ ପିଚ୍‌ରେ ସଂଘର୍ଷ କରିବା ପରେ ୧୪ବଲ୍‌ ଖେଳି ମାତ୍ର ୪ରନ୍‌ ସଂଗ୍ରହ କରି ପାଭିଲିୟନ୍‌ ଫେରିଯାଇଥିଲେ । ପରେ ଅନୁରାଗ ଷଡଙ୍ଗୀ ଓ ଗୋବିନ୍ଦ ପୋଦ୍ଦାରଙ୍କ ମଧ୍ୟରେ ସ୍ୱଳ୍ପ ଭାଗିଦାରୀ ହୋଇଥିଲା । ଅନୁରାଗ ୧୬ ରନ୍‌ କରି ଆଉଟ୍‌ ହେବା ପରେ ଗୋବିନ୍ଦ ମଧ୍ୟ ୨୫ ବଲ୍‌ରୁ ୨୧ ରନ୍‌ କରି ପାରିଥିଲେ । ଭରସାଯୋଗ୍ୟ ବ୍ୟାଟ୍ସମ୍ୟାନ ତଥା ଅଧିନାୟକ ଶୁଭ୍ରାଂଶୁ ସେନାପତି ୧ ରନ୍‌ କରି ଆଉଟ୍‌ ହେବା ଦଳକୁ ସମସ୍ୟାରେ ପକାଇ ଦେଇଥିଲା ।

ପରେ ବିପ୍ଳବ ସାମନ୍ତରାୟ ଓ ଅରବିନ୍ଦ ସିଂଙ୍କ ମଧ୍ୟରେ ୭୯ ରନ୍‌ର ଭାଗିଦାରୀ ଗଢ଼ି ଉଠିଥିଲେ ବି ସେମାନେ ଦଳକୁ ବିଜୟୀ କରାଇପାରିନଥିଲେ । ବିପ୍ଳବ ସାମନ୍ତରାୟ ୨୮ବଲ୍‌ରୁ ୫ଟି ଛକା ସହାୟତାରେ ୪୮ରନ୍‌ କରିଥିବା ବେଳେ ୩୦ବଲ୍‌ ଖେଳି ୩ଟି ଚୌକା ଓ ଗୋଟିଏ ଛକା ବଳରେ ୩୪ରନ୍‌ କରିଥିଲେ ଅରବିନ୍ଦ ସିଂ । ହରିଆନା ପକ୍ଷରୁ ଏ.କେ.ଚହଲ ସର୍ବାଧିକ ୨ଟି ୱିକେଟ ଅକ୍ତିଆର କରିଥିଲେ ।

   ସମ୍ବନ୍ଧିତ ଖବର


ଏହି ଅଷ୍ଟ୍ରେଲୀୟ କ୍ରିକେଟ ଖେଳାଳିଙ୍କ ପତ୍ନୀ ଭାଙ୍ଗିଲେ ଧୋନିଙ୍କ ଓ୍ବାର୍ଲ୍ଡ ରେକର୍ଡ

ପୁଣି ଭାରତ ବିରୋଧରେ ବିଷ ଓଗାଳିଲେ ସାହିଦ୍ ଆଫ୍ରିଦ୍, ମୋଦିଙ୍କକୁ ନେଇ କହିଲେ ଏହି କଥା

ସୁନୀଲ ଗାଭାସ୍କରଙ୍କ ଟିପ୍ପଣୀକୁ ନେଇ କଡା ଜବାବ୍ ଦେଲେ ଅନୁଷ୍କା ଶର୍ମା, କହିଲେ ଏଭଳି

ଡ୍ରଗ୍ସ ଜାଲରେ କ୍ରିକେଟରଙ୍କ ପତ୍ନୀ!

ବିରାଟ କୋହଲିଙ୍କ ଉପରେ ଲାଗିଲା ୧୨ ଲକ୍ଷ ଟଙ୍କାର ଜରିମାନା, ଜାଣନ୍ତୁ କ’ଣ ରହିଛି କାରଣ?

ଅଷ୍ଟ୍ରେଲିଆର ପୂର୍ବତନ କ୍ରିକେଟରଙ୍କ ହୃଦଘାତରେ ମୃତ୍ୟୁ