ନୂଆଦିଲ୍ଲୀ: ଗତ କିଛି ସପ୍ତାହ ହେବ ତାଞ୍ଜାନିଆରେ ପ୍ରବଳ ବର୍ଷା କାରଣରୁ ବନ୍ୟା ପରିସ୍ଥିତି ସୃଷ୍ଟି ହୋଇଛି । ବନ୍ୟା ଓ ଭୂସ୍ଖଳନ ଯୋଗୁଁ ଏପର୍ଯ୍ୟନ୍ତ ୧୫୫ ଜଣ ପ୍ରାଣ ହରାଇଛନ୍ତି । ପ୍ରବଳ ବର୍ଷା ହେତୁ ସାମ୍ପ୍ରତିକ ପରିସ୍ଥିତିକୁ ଦେଖି ତାଞ୍ଜାନିଆର ପ୍ରଧାନମନ୍ତ୍ରୀ କାସିମ ମଜଲିୱା ଏଥିପାଇଁ ଏଲ ନିନୋ ଜଳବାୟୁ ଢାଞ୍ଚାକୁ ଦାୟୀ କରିଛନ୍ତି। ତାଞ୍ଜାନିଆରେ ପ୍ରବଳ ବର୍ଷା ଯୋଗୁଁ ରାସ୍ତା, ବ୍ରିଜ୍ ଏବଂ ରେଳଟ୍ରାକ ବ୍ୟାପକ କ୍ଷୟକ୍ଷତି ହୋଇଛି ।
ପ୍ରଧାନମନ୍ତ୍ରୀ ମଜଲିୱା କହିଛନ୍ତି ଯେ, "ପ୍ରବଳ ଝଡ ବତାସ ସହ ଏଲ୍ ନିନୋ ବର୍ଷା ପ୍ରଭାବରେ ଦେଶର ବିଭିନ୍ନ ସ୍ଥାନରେ ବନ୍ୟା ଓ ଭୂସ୍ଖଳନ ଘଟିଛି । ଏହା ଦ୍ୱାରା ଅନେକ କ୍ଷୟକ୍ଷତି ହୋଇଛି । ବର୍ଷାର ଭୟଙ୍କର ପ୍ରଭାବ ପାଇଁ ସେ ଅସ୍ଥାୟୀ ଚାଷ କାର୍ଯ୍ୟ ଶୈଳୀକୁ ଦାୟୀ କରିଛନ୍ତି। ଏହି ଅସ୍ଥାୟୀ ଚାଷ ପ୍ରଣାଳୀରେ ଫସଲକୁ କାଟି ଜାଳିବା,ପଶୁମାନଙ୍କର ଅନିୟନ୍ତ୍ରିତ ଚରିବା ଏବଂ ଜଙ୍ଗଲ ନଷ୍ଟ ହେବା ଅନ୍ତର୍ଭୁକ୍ତ ।
ତାଞ୍ଜାନିଆର ପ୍ରଧାନମନ୍ତ୍ରୀ କହିଛନ୍ତି ଯେ ପ୍ରବଳ ବର୍ଷା ହେତୁ ୫୧ ହଜାର ଘର ନଷ୍ଟ ହୋଇଯାଇଛି । ଏହା ଦ୍ୱାରା ୨୦ ହଜାରରୁ ଅଧିକ ଲୋକ ପ୍ରଭାବିତ ହୋଇଛନ୍ତି । ଗଣମାଧ୍ୟମର ରିପୋର୍ଟ ଅନୁଯାୟୀ, ବନ୍ୟାରେ ଫସି ରହିଥିବା ଲୋକଙ୍କୁ ଜରୁରୀକାଳୀନ ସେବା ମାଧ୍ୟମରେ ସୁରକ୍ଷିତ ସ୍ଥାନକୁ ନିଆଯାଉଛି । ପାଣି ଲାଗି ରହିବା କାରଣରୁ ଏଠାରେ ଥିବା ବିଦ୍ୟାଳୟଗୁଡ଼ିକ ମଧ୍ୟ ବନ୍ଦ ରହିଛି। ବନ୍ୟା ଯୋଗୁଁ ୨୨୬ ଜଣ ମଧ୍ୟ ଆହତ ହୋଇଛନ୍ତି । ପୂର୍ବ ଆଫ୍ରିକାରେ ପ୍ରବଳ ବର୍ଷା ଜାରି ରହିଛି ।