ସିଙ୍ଗଲ ୟୁଜ ପ୍ଲାଷ୍ଟିକକୁ ଗୁଡ୍‌ବାୟ କରିବାର ସମୟ ଆସିଛି: ମୋଦି

ନୂଆଦିଲ୍ଲୀ ୧୦/୯ : ଭାରତରେ ସିଙ୍ଗଲ ୟୁଜ ପ୍ଲାଷ୍ଟିକ (ଥରେ ବ୍ୟବହୃତ ପ୍ଲାଷ୍ଟିକ) ର କୌଣସି ସ୍ଥାନ ନାହିଁ । ଆଗାମୀ କିଛି ବର୍ଷ ଭିତରେ ଦେଶ ଏଥିରୁ ମୁକ୍ତ ହେବ । ଏଥିପାଇଁ ସରକାର ପ୍ରତିଶ୍ରୁତିବଦ୍ଧ । ବିଶ୍ୱ ସମୁଦାୟ ମଧ୍ୟ ଏ ଦିଗରେ କାର୍ଯ୍ୟ କରିବା ଉଚିତ । ସିଙ୍ଗଲ ୟୁଜ ପ୍ଲାଷ୍ଟିକକୁ ଗୁଡ୍‌ବାୟ କରିବାର ସମୟ ଏବେ ଆସିଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ।

ଉତ୍ତରପ୍ରଦେଶର ଗ୍ରେଟର ନୋଏଡା ଠାରେ ଚାଲିଥିବା ଚତୁର୍ଦ୍ଦଶ ‘ୟୁନାଇଟେଡ ନେସନ୍ସ କନ୍‌ଭେନ୍‌ସନ ଟୁ କମ୍ବାଟ ଡେଜର୍ଟିଫିକେସନ (ୟୁଏନ୍‌ସିସିଡି) ସମ୍ମିଳନୀକୁ ସମ୍ବୋଧନ କରି ପ୍ରଧାନମନ୍ତ୍ରୀ କହିଲେ ଯେ ଭାରତବାସୀ ମାଟିକୁ ପବିତ୍ର ମନେକରନ୍ତି । ତାକୁ ନିଜର ମା’ ବୋଲି ଭାବନ୍ତି । ଏପରିକି ସକାଳୁ ଉଠି ମାଟିରେ ପାଦ ରଖିବା ପୂର୍ବରୁ ଜଣେ ଭାରତୀୟ ଧରିତ୍ରୀ ମାତାଙ୍କ ନିକଟରେ କ୍ଷମା ପ୍ରାର୍ଥନା କରିଥାଏ । ସେଥିପାଇଁ ପ୍ରତ୍ୟେକ ଭାରତୀୟଙ୍କ ଜୀବନରେ ମାଟି ହିଁ ସବୁଠାରୁ ଅଧିକ ମହତ୍ତ୍ୱ ରଖିଥାଏ । ଜଳବାୟୁ ପରିବର୍ତ୍ତନ, ଜୈବ ବିବିଧତା ଓ ମୃତ୍ତିକା କ୍ଷୟକୁ ରୋକିବା ଦିଗରେ ଭାରତ ସହଯୋଗ ଦେବା କ୍ଷେତ୍ରରେ ସର୍ବଦା ଆଗରେ ରହିବ । ଆସନ୍ତା ବର୍ଷରୁ ସରକାର ସିଙ୍ଗଲ ୟୁଜ ପ୍ଲାଷ୍ଟିକ ବ୍ୟବହାର ବନ୍ଦ କରିବାକୁ ଯାଉଛନ୍ତି ।

ତେଣୁ ବିଶ୍ୱ ସମୁଦାୟ ମଧ୍ୟ ଏଦିଗରେ ପଦକ୍ଷେପ ନେବାକୁ ସେ ଆହ୍ୱାନ ଦେଇଛନ୍ତି ।
ପ୍ରଧାନମନ୍ତ୍ରୀ କହିଲେ ଯେ ପରିବେଶ ସୁରକ୍ଷା ଲାଗି ଜଳ ସଂରକ୍ଷଣର ଆବଶ୍ୟକତା ରହିଛି । ସେଥିପାଇଁ କେନ୍ଦ୍ର ସରକାର ଜଳଶକ୍ତି ମନ୍ତ୍ରଣାଳୟ ଗଠନ କରିଛନ୍ତି । ସରକାର କୃଷକଙ୍କ ଆୟ ଦୁଇଗୁଣ କରିବା ଲାଗି ପଦକ୍ଷେପ ନେଇଛନ୍ତି । ସେଥିରେ ଜମି ପୁନରୁଦ୍ଧାର ଓ କ୍ଷୁଦ୍ର ଜଳସେଚନ ବ୍ୟବସ୍ଥାକୁ ସାମିଲ କରାଯାଇଛି । ପ୍ରତି ବୁନ୍ଦା ପାଣିରେ ଅଧିକ ଫସଲ (ପର୍‌ ଡ୍ରପ-ମୋର କ୍ରପ) ଲକ୍ଷ୍ୟ ନେଇ ସରକାର କାମ କରୁଛନ୍ତି । ବିନା ବଜେଟରେ ପ୍ରାକୃତିକ ଚାଷକୁ ଅଗ୍ରାଧିକାର ଦିଆଯାଉଥିଲା ବେଳେ ମୃତ୍ତିକା ସ୍ୱାସ୍ଥ୍ୟ କାର୍ଡ ମଧ୍ୟ ପ୍ରଚଳନ କରାଯାଉଛି । ଯେଉଁଥିରେ ମାଟିକୁ ପରୀକ୍ଷା କରାଯାଇ ଚାଷୀଙ୍କୁ କାର୍ଡ ଦିଆଯାଉଛି ।

ସରକାର ଏପର୍ଯ୍ୟନ୍ତ ୨୭ କୋଟି ମୃତ୍ତିକା ସ୍ୱାସ୍ଥ୍ୟ କାର୍ଡ ପ୍ରଦାନ କରିଛନ୍ତି । ଜଳବାୟୁ ଓ ପରିବେଶର ପ୍ରଭାବ ଜୈବ ବିବିଧତା ଓ ଜମି ଉପରେ ମଧ୍ୟ ପଡୁଛି । ଏକଥା ପୁରା ଦୁନିଆ ଜାଣିସାରିଛି । ଜଳବାୟୁ ପରିବର୍ତ୍ତନ ଯୋଗୁ ସମୁଦ୍ରର ଜଳସ୍ତର ବଢ଼ୁଛି । ଅସମୟରେ ବନ୍ୟା ଓ ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟ ଆସୁଛି । ପୃଥିବୀର ତାପମାତ୍ରା ଅହେତୁକ ଭାବେ ବଢ଼ିଯାଉଛି ।

ଏହି ଅବସରରେ ମୋଦି ‘ଅନୁପୂରକ ବନୀକରଣ ପାଣ୍ଠି ପରିଚାଳନା ଓ ଯୋଜନା କର୍ତ୍ତୃପକ୍ଷ’ ପାଣ୍ଠି ବିଷୟରେ ଉଲ୍ଲେଖ କରିଥିଲେ । କହିଥିଲେ ଭାରତରେ ବିକାଶ ପ୍ରକଳ୍ପ ପାଇଁ ଯେତିକି ଜମିରୁ ଗଛ କାଟିବାକୁ ପଡୁଛି ସେତିକି ଜମିରେ ନୂଆ ଗଛ ଲଗାଇବାକୁ ପଡୁଛି । କଟାଯାଉଥିବା ଗଛର ମୂଲ୍ୟ ମଧ୍ୟ ଉକ୍ତ ପାଣ୍ଠିରେ ଜମା କରାଯାଉଛି । ଏ କ୍ଷେତ୍ରରେ ଗତ ଏକ ସପ୍ତାହ ଭିତରେ ପ୍ରାୟ ୪୦ରୁ ୫୦ ହଜାର କୋଟି ଟଙ୍କା ଆସିଛି । ଭାରତରେ ଜଙ୍ଗଲ ଜମିର ପରିମାଣ ୨୦୧୫ରୁ ୨୦୧୭ ମଧ୍ୟରେ ବୃଦ୍ଧି ଘଟିଥିବା ମୋଦି ମଧ୍ୟ କହିଥିଲେ । ଗତ ୨ ତାରିଖରୁ ଆରମ୍ଭ ହୋଇଥିବା ଏହି ସମ୍ମିଳନୀ ଆସନ୍ତା ୧୩ ତାରିଖ ପର୍ଯ୍ୟନ୍ତ ଚାଲିବ । ଏଥିରେ ୧୯୬ଟି ଦେଶ ଓ ୟୁରୋପୀୟ ୟୁନିଅନର ୮ ହଜାର ପ୍ରତିନିଧି ଯୋଗଦେଉଛନ୍ତି ।

   ସମ୍ବନ୍ଧିତ ଖବର


ଶୁଙ୍ଘିକି କରୋନା ଭାଇରସକୁ ଚିହ୍ନଟ କରିବ କୁକୁର!ବିଶ୍ବର ଏହି ସବୁ ଦେଶ ଦେଉଛନ୍ତି ଟ୍ରେନିଂ

ପାକିସ୍ତାନର ମୁଖା ଖୋଲିଲେ ନଓ୍ବାଜ ସରିଫ୍, କହିଲେ-କାର୍ଗିଲ ଯୁଦ୍ଧ ବେଳେ ସେନା ପାଖରେ ଖାଦ୍ୟ ଓ ଅସ୍ତ୍ରଶସ୍ତ୍ର ନଥିଲା

ପୁରୁଣା ମାନଚିତ୍ର ସେୟାର କରି ଦଶହରାର ଶୁଭେଚ୍ଛା ଜଣାଇଲେ ପିଏମ୍‌ ଓଲି, ନେପାଳବାସୀ କହିଲେ..

୬୫ ବର୍ଷ ବୟସରେ ଦ୍ବିତୀୟ ବିବାହ କରିବେ ଜଣାଶୁଣା ଓକିଲ ହରିଶ ସାଲଭେ, କାହାକୁ ବାହା ହେବେ ଜାଣନ୍ତୁ

ଡ୍ରଗ୍ସ କିଣୁଥିବା ବେଳେ ଏନ୍‌ସିବି ହାତରେ ଧରାପଡ଼ିଲେ ଅଭିନେତ୍ରୀ

ପ୍ରଧାନମନ୍ତ୍ରୀ ପାକିସ୍ତାନ ଓ ଚୀନ୍‌ ସହ ଯୁଦ୍ଧ ତାରିଖ ସ୍ଥିର କରି ସାରିଛନ୍ତି – ୟୁପି ବିଜେପି ଅଧ୍ୟକ୍ଷଙ୍କ ବିବାଦିତ ବୟାନ