ନୂଆଦିଲ୍ଲୀ: ଉତ୍ତର-ପଶ୍ଚିମ ପାକିସ୍ତାନରେ ଏକ ମର୍ମତୁଦ ସଡ଼କ ଦୁର୍ଘଟଣା ଘଟିଛି । ଏଥିରେ ୨୦ ଜଣଙ୍କର ମୃତ୍ୟୁ ହୋଇଛି । ଏଥି ସହ ୨୧ରୁ ଅଧିକ ଲୋକ ଆହତ ହୋଇଛନ୍ତି । ସୂଚନା ମୁତାବକ ଆଜି (ଶୁକ୍ରବାର) ଏକ ଯାତ୍ରୀବାହୀ ବସ୍ ପାହାଡୀ ରାସ୍ତାରୁ ଖସି ଏକ ଗଭୀର ଖାଇକୁ ଖସିପଡିିଛି । ଏହି ଦୁର୍ଘଟଣାରେ ୨୦ ଜଣଙ୍କର ମୃତ୍ୟୁ ହୋଇଥିବା ବେଳେ ୨୧ ଜଣ ଆହତ ହୋଇଛନ୍ତି । ପାକିସ୍ତାନୀ ପୋଲିସ ଅଧିକାରୀ ମାନେ ଏହି ସୂଚନା ଦେଇଛନ୍ତି । ଜଣେ ପୋଲିସ ଅଧିକାରୀ କହିଛନ୍ତି ଯେ, ଗିଲଗିଟ-ବାଲ୍ଟିସ୍ତାନ ଅଞ୍ଚଳର ଡାଇମର ଜିଲ୍ଲାର କରାକୋରମ ରାଜପଥରେ ଏହି ଦୁର୍ଘଟଣା ଘଟିଛି । ସକାଳ ପ୍ରାୟ ସାଢେ ୫ଟା ସମୟରେ ଏହି ଘଟଣା ଘଟିଛି ।
ସୂଚନା ମୁତାବକ, ଦୁର୍ଘଟଣାର ସମ୍ମୁଖୀନ ହୋଇଥିବା ଏହି ବସ୍ ରାୱଲପିଣ୍ଡିରୁ ହୁଞ୍ଜା ଅଭିମୁଖେ ଯାଉଥିଲା । ଚାଳକ ବସ୍ର ନିୟନ୍ତ୍ରଣ ହରାଇବାରୁ ଗାଡିଟି ଭାରସାମ୍ୟ ହରାଇ ସିନ୍ଧୁ ନଦୀ କୂଳରେ ପଡ଼ିଯାଇଥିଲା । ଅଧିକାରୀ କହିଛନ୍ତି ଯେ, ଘଟଣା ସମୟରେ ବସ୍ରେ ୪୩ ଜଣ ଯାତ୍ରୀ ଥିଲେ । ସେ କହିଛନ୍ତି ଯେ ଆହତମାନଙ୍କୁ ଚିଲାସ ଡାକ୍ତରଖାନାକୁ ନିଆଯାଇଛି । ସେନା ହେଲିକପ୍ଟର ସାହାଯ୍ୟରେ ଉଦ୍ଧାର କାର୍ଯ୍ୟ ଶେଷ ହୋଇଛି । ଅନେକ ଆହତଙ୍କ ଅବସ୍ଥା ସଙ୍କଟାପନ୍ନ ଥିବାରୁ ମୃତ୍ୟୁ ସଂଖ୍ୟା ବଢିପାରେ ବୋଲି ଆଶଙ୍କା କରାଯାଉଛି ।
ଗିଲଗିଟ-ବାଲ୍ଟିସ୍ତାନ ମୁଖ୍ୟମନ୍ତ୍ରୀ ହାଜି ଗୁଲବର ଖାନ ଏହି ଘଟଣାରେ ଦୁଃଖ ପ୍ରକାଶ କରିଛନ୍ତି ଏବଂ ଆହତମାନଙ୍କୁ ତୁରନ୍ତ ଚିକିତ୍ସା ସହାୟତା ପ୍ରଦାନ କରିବାକୁ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ପ୍ରଧାନମନ୍ତ୍ରୀ ଶେହବାଜ ସରିଫ ମୃତ୍ୟୁକୁ ନେଇ ଦୁଖ ପ୍ରକାଶ କରିବା ସହ ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି। ଆହତମାନଙ୍କୁ ସମସ୍ତ ସମ୍ଭାବ୍ୟ ଚିକିତ୍ସା ଯୋଗାଇଦେବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
