ଭିଡିଓକନ୍‌ ଋଣ ମାମଲା; ନଜରବନ୍ଦୀ ହେବେ ଚନ୍ଦା

ନୂଆଦିଲ୍ଲୀ,୨୨ା୨(ଏଜେନ୍ସି):ଭିଡିଓକନ୍‌-ଆଇସିଆଇସିଆଇ ଋଣ ମାମଲାରେ ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚ୍ଚରଙ୍କ ଅଡୁଆ ଦିନକୁ ଦିନ ବଢ଼ିବାରେ ଲାଗିଛି । ଏହି ମାମଲାରେ ଚନ୍ଦା ବର୍ତ୍ତମାନ ନଜରବନ୍ଦୀ ହୋଇ ରହିବେ । ତାଙ୍କ ନାମରେ ଲୁକ୍‌ ଆଉଟ୍‌ ସର୍କୁଲାର(ଏଲ୍‌ଓସି) ଜାରି କରିଛି କେନ୍ଦ୍ରୀୟ ତଦନ୍ତ ବ୍ୟୁରୋ(ସିବିଆଇ) । ମାମଲାର ତଦନ୍ତ ଚାଲିଥିବାବେଳେ କାଳେ ସେ ଦେଶ ଛାଡିବାକୁ ଚେଷ୍ଟା କରିବେ ସେଥିପାଇଁ ଆଗୁଆ ସତର୍କ ହୋଇଛି ସିବିଆଇ । ଚନ୍ଦାଙ୍କ ସହିତ ସ୍ୱାମୀ ଦୀପକ କୋଚ୍ଚର ଏବଂ ଭିଡିଓକନ୍‌ ଗ୍ରୁପ୍‌ ଅଧ୍ୟକ୍ଷ ବେଣୁଗୋପାଳ ଧୂତ୍‌ଙ୍କ ନାମରେ ମଧ୍ୟ ଏଲ୍‌ଓସି ଜାରି କରାଯାଇଛି । ସାଧାରଣତଃ ତଦନ୍ତର ସାମ୍ନା କରୁଥିବା ବ୍ୟକ୍ତିମାନଙ୍କ ବିରୋଧରେ ଏଲ୍‌ଓସି ଜାରି କରାଯାଇଥାଏ । କାଳେ ଏମାନେ ଦେଶରୁ ଫେରାର ହୋଇଯିବେ ସେଥିପାଇଁ ଏହା ଜାରି ହୋଇଥାଏ । ବିମାନ ବନ୍ଦରରେ ଦେଖିବା କ୍ଷଣି ଏମାନଙ୍କୁ ଅଟକାଯାଏ ।
ବେଆଇନ ଅର୍ଥ କାରବାର ମାମଲାରେ ଏମାନଙ୍କ ବିରୋଧରେ ଗତ ସପ୍ତାହରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଏକ ଅପରାଧିକ ମାମଲା ଦାଏର୍‌ କରିବା ପରେ ସିବିଆଇ ପକ୍ଷରୁ ଉପରୋକ୍ତ କାର୍ଯ୍ୟାନୁଷ୍ଠାନ ନିଆଯାଇଛି । ଏ ନେଇ ସବୁ ବିମାନ ବନ୍ଦରଗୁଡିକୁ ସୂଚିତ କରାଯାଇଛି ।
ଗତ ବର୍ଷ ଚନ୍ଦାଙ୍କ ସ୍ୱାମୀ ଦୀପକ ଏବଂ ଧୂତଙ୍କ ବିରୋଧରେ ଲୁକ୍‌ଆଉଟ୍‌ ସର୍କୁଲାର ଜାରି କରାଯାଇଥିଲା । କିନ୍ତୁ ପ୍ରଥମ ଥର ପାଇଁ ଚନ୍ଦାଙ୍କ ବିରୋଧରେ ଏହା ଜାରି ହୋଇଛି ।
ସୂଚନାଯୋଗ୍ୟ, ଆଇସିଆଇସିଆଇ ବ୍ୟାଙ୍କ ପକ୍ଷରୁ ଭିଡିଓକନ୍‌ ଗ୍ରୁପ୍‌କୁ ୩,୨୫୦ କୋଟି ଟଙ୍କା ଋଣ ପ୍ରଦାନ ବେଳେ ଅନିୟମିତତା ହୋଇଥିବା ଅଭିଯୋଗ ରହିଛି । ଶ୍ରୀକ୍ରିଷ୍ଣା କମିଟି ରିପୋର୍ଟରେ ଚନ୍ଦା ଦୋଷୀ ସାବ୍ୟସ୍ତ ହୋଇଥିବାବେଳେ ତାଙ୍କୁ ବ୍ୟାଙ୍କ ପକ୍ଷରୁ ବହିଷ୍କାର କରାଯାଇଛି । ଏହା ସହିତ ବ୍ୟାଙ୍କରୁ ପାଇଥିବା ବୋନସ୍‌, ଅନ୍ୟାନ୍ୟ ପ୍ରୋତ୍ସାହନ, ବର୍ଦ୍ଧିତ ଦରମା ଆଦି ଫେରାଇବାକୁ ତାଙ୍କୁ ନିର୍ଦ୍ଦେଶ ଦିଆଯାଇଛି ।
ଶ୍ରୀକ୍ରିଷ୍ଣା କମିଟି ରିପୋର୍ଟ ଅନୁସାରେ ୨୦୧୨ରେ ଭିଡିଓକନ୍‌ ଗ୍ରୁପ୍‌କୁ ଆଇସିଆଇସିଆଇ ବ୍ୟାଙ୍କ ପକ୍ଷରୁ ପ୍ରଦାନ କରାଯାଇଥିବା ୩,୨୫୦ କୋଟି ଟଙ୍କାର ଋଣ ମଞ୍ଜୁରୀରେ ଚନ୍ଦାଙ୍କ ଅନୁଗ୍ରହ ଜଡିତ ଥିଲା । ନିଜ ତଥା ନିଜ ପରିବାରର ସ୍ୱାର୍ଥ ସକାଶେ ସେ ଏହି ଋଣ ମଞ୍ଜୁର କରିଥିଲେ । ବ୍ୟାଙ୍କର ଆଚରଣବିଧିକୁ ଉଲ୍ଲଂଘନ କରି ଚନ୍ଦା ଭିଡିଓକନ୍‌ ଗ୍ରୁପକୁ ଋଣ ମଞ୍ଜୁର କରିଥିଲେ । ୨୦୦୯ ଏପ୍ରିଲରୁ ୨୦୧୮ ମାର୍ଚ୍ଚ ଯାଏ ସେ ପାଇଥିବା ସମସ୍ତ ବୋନସ୍‌କୁ ସୁଧ ସହ ଅସୁଲ କରାଯିବ ବୋଲି ରିପୋର୍ଟ ପାଇବା ପରେ ବ୍ୟାଙ୍କ କହିଛି । ସୂଚନାଯୋଗ୍ୟ, ବିବାଦ ବଳବତ୍ତର ହେବା ପରେ ଚନ୍ଦା ଅକ୍ଟୋବର ୪ରେ ଆଗୁଆ ଇସ୍ତଫା ଦେଇଥିଲେ ।
୩ ଦଶନ୍ଧି ଧରି ସେ ଆଇସିଆଇସିଆଇ ବ୍ୟାଙ୍କରେ କାର୍ଯ୍ୟ କରିଥିଲେ । ନିଜର ପ୍ରଦର୍ଶନ ଜରିଆରେ ସେ ସିଇଓ ପଦକୁ ଉନ୍ନୀତ ହୋଇଥିଲେ । ଭିଡିଓକନ୍‌ ଋଣ ମାମଲା ଏହି ଷ୍ଟାର୍‌ ବ୍ୟାଙ୍କର୍‌ଙ୍କ ପତନର କାରଣ ସାଜିଛି ।