ବାବା ରାମଦେବଙ୍କ କରୋନିଲ ଉପରେ ପ୍ରଶ୍ନ କଲେ ଆଇଏମ୍ଏ: ପତଞ୍ଜଳି କରିଥିବା ଦାବିକୁ ଡାହା ମିଛ ବୋଲି ଦର୍ଶାଇଲେ
ନୂଆଦିଲ୍ଲୀ,୨୩/୦୨: ପତଞ୍ଜଳି ଆୟୁର୍ବେଦର କରୋନା ଔଷଧ କରୋନିଲ ଉପରେ ଆଇଏମ୍ଏ (ଭାରତୀୟ ମେଡିକାଲ ଆସୋସିଏସନ) ପ୍ରଶ୍ନ ଉଠାଇଛି । ଏଥିସହ ଏହି ବଟିକା ବିକ୍ରି ଲାଗି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ଅନୁମତି ଦେଇଛି ବୋଲି ପତଞ୍ଜଳି କରିଥିବା ଦାବିକୁ ଆଇଏମ୍ଏ ଡାହା ମିଛ ବୋଲି ଦର୍ଶାଇଛି ।
କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡକ୍ଟର ହର୍ଷବର୍ଦ୍ଧନଙ୍କ ଉପସ୍ଥିତିରେ ପତଞ୍ଜଳି କରୋନିଲ ଉପରେ ମିଥ୍ୟା ଦାବି କରିଥିବାରୁ ଆଇଏମ୍ଏ କେନ୍ଦ୍ର ସରକାରଙ୍କ ଠାରୁ ଏହା ଉପରେ ସ୍ପଷ୍ଟୀକରଣ ମାଗିଛି । ସେମାବାର ଆଇଏମ୍ଏ ଏକ ବିବୃତ୍ତି ଜାରି କରି କହିଛି ଯେ ଦେଶର ସ୍ୱାସ୍ଥ୍ୟମନ୍ତ୍ରୀ ହୋଇ ହର୍ଷବର୍ଦ୍ଧନ କିଭଳି ମିଥ୍ୟା ଓ ଅବୈଜ୍ଞାନିକ ଉପାୟରେ ପ୍ରସ୍ତୁତ ସାମଗ୍ରୀର ପ୍ରସାର କରି ସମଗ୍ର ଦେଶକୁ ବିଭ୍ରାନ୍ତ କଲେ ତାହା ଚିନ୍ତାର ବିଷୟ । ଡବ୍ଲ୍ୟୁଏଚ୍ଓ ଏଭଳି କୌଣସି ଅନୁମତି କିମ୍ବା ପ୍ରମାଣପତ୍ର ପତଞ୍ଜଳିକୁ ଦେଇନାହିଁ ବୋଲି ସ୍ପଷ୍ଟ କରିସାରିଛି । ତେଣୁ କେନ୍ଦ୍ର ସରକାର ତାଙ୍କ ଆଭିମୁଖ୍ୟ ସ୍ପଷ୍ଟ କରନ୍ତୁ ବୋଲି ଆଇଏମ୍ଏ କହିଛି ।
