ଭୁବନେଶ୍ୱର ୨୬/୮ : ରାଜଧାନୀରେ ବୋମା ଫୁଟିଛି । ରବିବାର ବିଳମ୍ବିତ ସନ୍ଧ୍ୟାରେ ବିଜେବିନଗର ରାଧାକୃଷ୍ଟ ମନ୍ଦିର ଗଳିରେ ଏକ ଚଳନ୍ତା ଅଟୋରେ ବୋମା ଫୁଟିଛି । ବିଷ୍ଫୋରଣରେ ଅଟୋ ଚୁର୍ମାର ହୋଇ ଯାଇଥିବା ବେଳେ ଚାଳକ ଗୁରୁତର ଆହତ ହୋଇଛନ୍ତି । ଚାଳକଙ୍କ ନାମ ଜେ.ଗୋବିନ୍ଦ ରୟ(୩୨) । ଘର ବିଜେବିନଗର ବିଜୟଲକ୍ଷ୍ମୀ ବସ୍ତି । ଗୋବିନ୍ଦଙ୍କ ଡ଼ାହାଣ ଗୋଡ଼ଟି ସଂପୂର୍ଣ୍ଣ ନଷ୍ଟ ହୋଇଯାଇଛି । ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ବଡ଼ଗଡ଼ ଥାନା ପୁଲିସ ଅଟୋ(ଓଆର୦୨ବିବି-୬୩୫୯)କୁ ଜବତ କରିବା ସହ ଘଟଣାର ଛାନ୍ଭିନ ଚଳାଇଛି । ବୋମା ଫୁଟିବା ପରେ ବିଜେବିନଗର ଅଞ୍ଚଳରେ ଆତଙ୍କ ଖେଳି ଯାଇଛି ।
ପୁଲିସ ସୂଚନା ଅନୁଯାୟୀ, ଗୋବିନ୍ଦ ରାତି ୮ଟାବେଳେ ଅଟୋରେ ବିଜେବି କଲେଜ ଛକରୁ ଘରକୁ ଫେରୁଥିଲେ । ସେ ରାଧାକୃଷ୍ଣ ମନ୍ଦିର ଗଳି ଦେଇ ଯାଉଥିବାବେଳେ ହଠାତ୍ ବୋମା ଫୁଟିଥିଲା । ବୋମା ଫୁଟିବା ପରେ ଅଟୋଟି ରାସ୍ତା କଡ଼ରେ ଥିବା ଏକ ଇଲେକ୍ଟ୍ରିକ ଖୁଣ୍ଟରେ ପିଟି ହୋଇ ଯାଇଥିଲା । ପ୍ରଚଣ୍ଡ ଶବ୍ଦରେ ଲୋକେ ଆତଙ୍କିତ ହୋଇ ପଡ଼ିଥିଲେ । ବୋମା ବିଷ୍ଫୋରଣରେ ଗୋବିନ୍ଦଙ୍କ ଡ଼ାହାଣ ଗୋଡ଼ ଛିନ୍ଛତ୍ର ହୋଇ ଯାଇଥିଲା । ଗୋବିନ୍ଦଙ୍କ ଶରୀରର ଅନ୍ୟାନ୍ୟ ସ୍ଥାନରେ ମଧ୍ୟ କ୍ଷତ ହୋଇଛି । ଅଟୋଟି ସଂପୂର୍ଣ୍ଣ ଚୂର୍ମାର ହୋଇ ଯାଇଛି । ସ୍ଥାନୀୟ ଲୋକେ ବଡ଼ଗଡ଼ ଥାନା ପୁଲିସକୁ ଖବର ଦେଇଥିଲେ । ପୁଲିସ ପହଞ୍ଚି ଗୁରୁତର ଅବସ୍ଥାରେ ଗୋବିନ୍ଦଙ୍କୁ ଉଦ୍ଧାର କରି ଏକ ଘରୋଇ ହସ୍ପିଟାଲରେ ଭର୍ତ୍ତି କରିଛି । ଅଟୋକୁ ପୁଲିସ ଜବତ କରିଛି ।
ଅଟୋର ବ୍ୟାଟେରୀ ଫାଟିଯିବାରୁ ଏଭଳି ଘଟିଲା ବୋଲି ଗୋବିନ୍ଦ ପୁଲିସକୁ ସଫେଇ ଦେଇଛନ୍ତି । କିନ୍ତୁ ପୁଲିସ ଅଟୋକୁ ଯାଞ୍ଚ କରିବା ସମୟରେ ସେଥିରୁ କିଛି ସୁତୁଲି ଟୁକୁଡ଼ା ମିଳିଥିଲା । ବାରୁଦ ଗନ୍ଧ ମଧ୍ୟ ହେଉଥିଲା । ତେଣୁ ଅଟୋରେ ବୋମା ଫୁଟିଥିବା ପୁଲିସ ଜାଣିବାକୁ ପାଇଛି । ଗୋବିନ୍ଦ ଅଟୋରେ ବୋମା କାହିଁକି ନେଇ ଯାଉଥିଲେ ଓ କେଉଁ ଉଦ୍ଦେଶ୍ୟରେ ନେଉଥିଲେ ସେ ନେଇ ପୁଲିସ ତଦନ୍ତ ଚଳାଇଛି । ଗୋବିନ୍ଦଙ୍କ ନାମରେ ପୂର୍ବରୁ କିଛି ଅପରାଧିକ ମାମଲା ଅଛି କି ନାହିଁ ସେ ନେଇ ମଧ୍ୟ ପୁଲିସ ଖୋଳତାଡ଼ ଚଳାଇଛି ।
