PRAMEYA

Prameya News Portal, Prameya Daily, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • କ୍ରୁଜ୍ ଡ୍ରଗ୍ସ ପାର୍ଟି ମାମଲା –ଅକ୍ଟୋବର ୩୦ ତାରିଖ ଯାଏ ଜେଲରେ ରହିବେ ଆର୍ୟନ ଖାନ୍ , ଆର୍ୟନଙ୍କ ହାଜତ ମିଆଦ ବୃଦ୍ଧ କଲେ ସ୍ୱତନ୍ତ୍ର ଏନ୍ସିବି କୋର୍ଟ
  • ||
  • ନଵମ ଓ ଦଶମ ଶ୍ରେଣୀ ପରୀକ୍ଷା ପଦ୍ଧତିରେ ପରିଵର୍ତ୍ତନ : ଵର୍ଷକୁ ୪ଟି ଫରମେଟିଭ୍ ଆସେସମେଣ୍ଟ ହେଵ
  • ||
  • କଳାହାଣ୍ଡି ମମିତା ମେହେର ହତ୍ୟା ମାମଲା – କେ ଗାଁ ଥାନା ଆଇଆଇସି ଡମୁ ପରଜା ନିଲମ୍ୱିତ , କର୍ତ୍ତବ୍ୟରେ ଅବହେଳା ପାଇଁ କାର୍ଯ୍ୟାନୁଷ୍ଠାନ ନେଲେ କଳାହାଣ୍ଡି ଏସ୍‌ପି
  • ||
  • ୩ ପ୍ରତିଶତ ବଢ଼ିଲା କେନ୍ଦ୍ରୀୟ କର୍ମଚାରୀଙ୍କ ମହଙ୍ଗା ଭତ୍ତା, ବୃଦ୍ଧି ପ୍ରସ୍ତାବକୁ କ୍ୟାବିନେଟର ମଞ୍ଜୁରୀ
  • ||
  • ପାଡ଼ୁଆ: ଜଙ୍ଗଲରୁ ପାଡ଼ୁଆ: ୮୦ ଲକ୍ଷ ଟଙ୍କାର ଗଞ୍ଜେଇ ଜବତ କଲା ପାଡୁଆ ଥାନା ପୋଲିସ, ଗଞ୍ଜେଇ ମାଫିଆଙ୍କୁ ଧରିବା ପାଇଁ ତଦନ୍ତ ଜାରି
  • ||
  • ବଲାଙ୍ଗୀର: ମମିତା ମେହେର ମର୍ଡର ମିଷ୍ଟ୍ରି, ଅଟକ ଜେସିବି ଡ୍ରାଇଭର ଗିରଫ କରିପାରେ ପୋଲିସ
  • ||
  • ରାୟଗଡ଼​‌: ଗୁଣି ଗାରେଡି ସନ୍ଦେହରେ ଟ୍ରିପଲ ମର୍ଡର ଘଟଣା, ୯ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କଲେ ଜିଲ୍ଲା ଓ ଦୌରା ଜଜ ଅଦାଲତ
  • ||
  • ଭବାନୀପାଟଣା: ମମିତା ମେହର ହତ୍ୟା ଘଟଣାରେ ସିବିଆଇ ତଦନ୍ତ କରାଯାଉ : ସ୍ମୃତିରାଣୀ ପଟ୍ଟନାୟକ
  • ||
  • ଭୁବନେଶ୍ୱର: ଆଜିଠୁ ଯୁକ୍ତ ଦୁଇ ପ୍ରଥମ ବର୍ଷ ଛାତ୍ରଛାତ୍ରୀଙ୍କ କ୍ଲାସରୁମ ପାଠପଢ଼ା, ନଭେମ୍ୱର ପହିଲାରୁ ୟୁନିଫର୍ମ ବାଧ୍ୟତାମୂଳକ
  • ||
  • ପୁରୀ: ଆଜିଠୁ ସେବାୟତଙ୍କ ଡ୍ରେସ୍‌କୋଡ୍, ଶ୍ରୀମନ୍ଦିରରେ ପାରମ୍ପରିକ ବସ୍ତ୍ର ପରିଧାନ କରି ପ୍ରବେଶ କରିବେ ସେବକ
  • ||
  • ବଲାଙ୍ଗୀର: ଆଜି ବିଜେପି ପକ୍ଷରୁ ବଲାଙ୍ଗୀର ବନ୍ଦ ପାଳନ, ସକାଳ ୬ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଯାତାୟତ ଠପ୍
  • ||
  • ଭୁବନେଶ୍ୱର: ଆଜି ଯୁକ୍ତ ୩ ସ୍ପଟ୍‌ ନାମଲେଖା ଆବେଦନ କପି ଦାଖଲ ଶେଷ, ୨୭ରୁ ନାମଲେଖା
  • ||
  • ଭୁବନେଶ୍ୱର: ଆଜିଠୁ ଶୁଖିଲା ପାଗ, ୨୩ ସୁଦ୍ଧା ସମ୍ପୂର୍ଣ୍ଣ ରୂପେ ଫେରିଯିବ ମୌସୁମୀ ବାୟୁ
  • ||

ଯୁଦ୍ଧ ପ୍ରସ୍ତୁତି, କାଶ୍ମୀରକୁ ପଠାଗଲା ୧୦ ହଜାର ଯବାନ୍‌

ନୂଆଦିଲ୍ଲୀ/ଶ୍ରୀନଗର,୨୩ ।୨(ଏଜେନ୍ସି): ଭାରତ-ପାକ୍‌ ସୀମାରେ ବଢ଼ୁଛି ଉତ୍ତେଜନା । ସୀମାବର୍ତ୍ତୀ ଗ୍ରାମକୁ ଆବଶ୍ୟକ ପଡ଼ିଲେ ଜରୁରି ଭିତ୍ତିରେ ଖାଲି କରିବା ପାଇଁ ଭାରତ ପ୍ରସ୍ତୁତି ଆରମ୍ଭ କରିଛି । ବିଚ୍ଛିନ୍ନତାବାଦୀ ନେତାଙ୍କ ଉପରେ ଳଗାମ ଆରମ୍ଭ ହୋଇଯାଇଛି । ପରିସ୍ଥିତିର ମୁକାବିଲା ପାଇଁ କାଶ୍ମୀରରେ ପହଞ୍ଚିଛନ୍ତି ହଜାରେ ବିଏସ୍‌ଏଫ୍‌ ଯବାନ । ଅପରପକ୍ଷେ ପାକିସ୍ତାନ ମଧ୍ୟ ସୀମାରେ ସୈନ୍ୟ ଠୁଳ କରିବା ସହ ଗ୍ରାମ ଗୁଡ଼ିକର ଲୋକଙ୍କୁ ସ୍ଥାନାନ୍ତର ପ୍ରକ୍ରିୟା ଆରମ୍ଭ କରିଛି ।
ଭାରତୀୟ ସେନାର ଅଧିକାରୀମାନେ ଜମ୍ମୁ-କାଶ୍ମୀର ସଂଲଗ୍ନ ସୀମାବର୍ତ୍ତୀ ଗ୍ରାମଗୁଡ଼ିକରୁ ଯେକୌଣସି ମୁହୂର୍ତ୍ତରେ ଲୋକଙ୍କୁ ନିରାପଦ ସ୍ଥାନକୁ ନେବା ପାଇଁ ପ୍ରସ୍ତୁତ ରହିବାକୁ ସ୍ଥାନୀୟ ପ୍ରଶାସନକୁ ପରାମର୍ଶ ଦେଇଛି । ସେନା ଓ ପ୍ରଶାସନର ଅଧିକାରୀମାନେ ସାଧାରଣ ଲୋକଙ୍କୁ କେଉଁ କେଉଁ ସ୍ଥାନକୁ ନିଆଯିବ ସେ ବିଷୟରେ ଆଲୋଚନା କରିବା ସହିତ ତାହାର ନିରୀକ୍ଷଣ ବି କରିଛନ୍ତି । ସୀମାବର୍ତ୍ତୀ ଅଞ୍ଚଳର ଲୋକଙ୍କୁ ବି ଜରୁରୀକାଳୀନ ପରିସ୍ଥିତିର ସମ୍ମୁଖୀନ ହେବା ପାଇଁ ପ୍ରସ୍ତୁତ ରହିବାକୁ ପରାମର୍ଶ ଦିଆଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ୱରାଷ୍ଟ୍ର ମନ୍ତ୍ରୀ ରାଜନାଥ ସିଂ ମଧ୍ୟ ଅନେକଥର ଏନେଇ ଇଙ୍ଗିତ ଦେଇସାରିଛନ୍ତି । ଏମିତିକି ଆମେରିକାର ରାଷ୍ଟ୍ରପତିି ଡୋନାଲ୍ଡ ଟ୍ରମ୍ପ ବି ଆଜି କହିଛନ୍ତି ଯେ ଭାରତ କିଛି କଡ଼ା ପଦକ୍ଷେପ ନେବାକୁ ଯାଉଛି ।
ସେହିପରି ପାକିସ୍ତାନ ପୂର୍ବରୁ କହିସାରିଛି ଯେ ସିଏ ଭାରତ ଆକ୍ରମଣର କଡ଼ା ଜବାବ ଦେବ । ଗତକାଲି ପାକ୍‌ ସେନାମୁଖ୍ୟ ଜେନେରାଲ କମର ଜାଭେଦ ବାଜୱା ଏଲଓସି ନିକଟରେ ଥିବା ଫରୱାର୍ଡ ପୋଷ୍ଟଗୁଡିକ ପରିଦର୍ଶନ କରିବା ସହିତ ଯୁଦ୍ଧ ପ୍ରସ୍ତୁତିର ସମୀକ୍ଷା କରିଥିଲେ । ପାକ୍‌ ସେନା ମଧ୍ୟ ଏଲଓସି ନିକଟରେ ଥିବା ଗ୍ରାମଗୁଡ଼ିକରୁ ଲୋକଙ୍କୁ ପୂର୍ବରୁ ଖାଲି କରିସାରିଛି । ସେହିପରି ପାକ୍‌ ସେନା ଦେଶର ସମସ୍ତ ବେସାମରିକ ହସ୍ପିଟାଲଗୁଡିକରେ ୨୫% ବେଡ୍‌ ଆହତ ସୈନିକମାନଙ୍କ ପାଇଁ ସଂରକ୍ଷିତ ରଖିବାକୁ ନିର୍ଦ୍ଦେଶ ଦେଇଛି । ଦୁଇ ଦିନ ପୂର୍ବରୁ ପାକ୍‌ ବାୟୁସେନା ବି ଭାରତର ସୀମା ନିକଟରେ ଉଡାଣ ଭରି ନିଜର ପ୍ରସ୍ତୁତି ପରଖିଥିଲା । ଏସବୁଥିରୁ ଭାରତ ଓ ପାକିସ୍ତାନ ବିରୋଧରେ ଯୁଦ୍ଧ ଲାଗିବା ଥୟ ବୋଲି ମନେ କରାଯାଉଛି ।
ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ୱରାଷ୍ଟ୍ର ମନ୍ତ୍ରୀ ରାଜନାଥ ସିଂ ଏବଂ ଗୁଇନ୍ଦା ସଂସ୍ଥାଗୁଡିକର ମୁଖ୍ୟମାନଙ୍କ ସହ ଏକ ଉଚ୍ଚ ସ୍ତରୀୟ ବୈଠକ କରିଛନ୍ତି । କିନ୍ତୁ ବୈଠକରେ ଆଲୋଚନାର ବିଷୟବସ୍ତୁ ସମ୍ପର୍କରେ କିଛି ତଥ୍ୟ ସାର୍ବଜନୀନ କରାଯାଇନାହିଁ । ହେଲେ ପୁଲୱାମା ବିସ୍ଫୋରଣ ପରେ ଦେଖାଦେଇଥିବା ପରିସ୍ଥିତି ଉପରେ ଏଥିରେ ଆଲୋଚନା କରାଯାଇଛି ବୋଲି ମନେ କରାଯାଉଛି ।
ଅନ୍ୟପଟରେ ପୁଲୱାମା ବିସ୍ଫୋରଣ ପରେ ଏବେ କେନ୍ଦ୍ର ସରକାର କାଶ୍ମୀର ବିଚ୍ଛିନ୍ନତାବାଦୀଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ଆହୁରି ଜୋରଦାର କରିଛନ୍ତି । ସରକାର ପୂର୍ବରୁ ଅନେକ ହୁରିୟାତ୍‌ ନେତାଙ୍କୁ ଦିଆଯାଇଥିବା ସୁରକ୍ଷା ପ୍ରତ୍ୟାହାର କରିନେଇଥିଲେ । ଏବେ ବିଚ୍ଛିନ୍ନତାବାଦୀ ନେତାମାନଙ୍କୁ ଅଟକ ରଖାଯିବା ଅଭିଯାନ ଆରମ୍ଭ ହୋଇଛି । ଶୁକ୍ରବାର ରାତିରେ ଜେକେଏଲଏଫ ନେତା ୟାସିନ ମଲ୍ଲିକକୁ ଅଟକ ରଖାଯାଇଥିଲାବେଳେ ମଧ୍ୟରାତ୍ରି ପରେ ବିଭିନ୍ନ ସ୍ଥାନରେ ଚଢ଼ାଉ କରି ମୌଳବାଦୀ ସଂଗଠନ ଜମାତ -ଇ-ଇସଲାମୀର ୧୫୦ ନେତାଙ୍କୁ ବି ଅଟକ ରଖାଯାଇଛି ।
ଶୁକ୍ରବାର ମଧ୍ୟରାତ୍ରିରେ ପୁଲିସ ହଠାତ କାଶ୍ମୀରର ବିଭିନ୍ନ ସ୍ଥାନରେ ଚଢ଼ାଉ କରି ଜମାତ ନେତାମାନଙ୍କୁ ଅଟକ ରଖିବା ଆରମ୍ଭ କରିଥିଲା । ଜମାତର ଅଧ୍ୟକ୍ଷ ଅବଦୁଲ ହମିଦ ଫୟାଜ ଏବଂ ପ୍ରବକ୍ତା ଜାହିଦ ଅଲ୍ଲୀଙ୍କୁ ଅଟକ ରଖାଯାଇଥିଲା । କିନ୍ତୁ ପୁଲିସ ଏହାର କିଛି କାରଣ ଦର୍ଶାଇନଥିଲା । ଜଣେ ପୁଲିସ ଅଧିକାରୀ କହିଥିଲେ କି କାଶ୍ମୀର ଘାଟିରେ ବିଚ୍ଛିନ୍ନତାବାଦୀମାନଙ୍କୁ ଅଟକ ରଖାଯିବା ନିୟମିତ ଘଟଣା । ତେବେ ସେ ସ୍ୱୀକାର କରିଥିଲେ କି ହୁରିୟାତ ମେଣ୍ଟରେ ସାମିଲ ଥିବା ଜମାତ ଇ ଇସଲାମୀ ସଂଗଠନ ଉପରେ ପ୍ରଥମ ଥର ପାଇଁ ଏପରି ଚଢ଼ାଉ କରାଯାଇଛି ।

ଜମାତର ଅଧ୍ୟକ୍ଷ ଫୟାଜ ଓ ଅନ୍ୟ ନେତାମାନେ କହିଛନ୍ତି କି ‘ସେମାନଙ୍କର ଜିଲା ଓ ରାଜ୍ୟ ସ୍ତରୀୟ ନେତାମାନଙ୍କୁ ଅଟକ ରଖାଯାଇଛି । ଏହାର କାରଣ କ’ଣ? ସୋମବାର ସୁପ୍ରିମକୋର୍ଟରେ ଧାରା ୩୫(କ)କୁ ରଦ୍ଦ କରଯିବା ମାମଲା ଉପରେ ଶୁଣାଣି ହେବାର ଅଛି । ଏହାକୁ ବିରୋଧ କରି ଘାଟିରେ ଅସନ୍ତୋଷର ଦାନା ବାନ୍ଧୁଥିଲାବେଳେ ତାହାକୁ ଦମନ କରିବା ପାଇଁ ସରକାର ଏଭଳି ପଦକ୍ଷେପ ନେଉଥିବାର ମନେ ହେଉଛି । ଏଥିରୁ ଲାଗୁଛି ସରକାର ଧାରା ୩୫(କ)କୁ ରଦ୍ଦ କରିବା ସପକ୍ଷରେ ଅଛନ୍ତି । ସରକାରଙ୍କ ଏଭଳି ଦମନଲୀଳା ଯୋଗୁ ପରସ୍ଥିତି ଆହୁରି ବିଗିଡ଼ିବ’ । ଏହି ଘଟଣା ଉପରେ ଅସନ୍ତୋଷ ବ୍ୟକ୍ତ କରି ପିଡିପି ନେତ୍ରୀ ମେହବୁବା ମୁଫତି କହିଛନ୍ତି ଯେ ଏଭଳି ପଦକ୍ଷେପର ଯଥାର୍ଥତା କ’ଣ? ଏହାଯୋଗୁ ପରିସ୍ଥିତିରେ ଆହୁରି ଅବନତି ହେବ । ସରକାର ଜଣେ ବ୍ୟକ୍ତିକୁ ଜେଲରେ ରଖିପାରିବେ, ତା’ର ଚିନ୍ତାଧାରାକୁ ନୁହେଁ ।

୧୦,୦୦୦ ଯବାନଙ୍କୁ କାଶ୍ମୀର ପଠାଗଲା
କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ତୁରନ୍ତ ଅର୍ଦ୍ଧ-ସାମରିକ ବାହିନୀର ୧୦,୦୦୦ ଯବାନଙ୍କୁ କାଶ୍ମୀର ଯିବାକୁ ନିର୍ଦ୍ଦେଶ ଦେଇଛି । ତେଣୁ ଆଜି ସକାଳୁ ଯବାନମାନେ ପହଞ୍ଚିବା ଆରମ୍ଭ ହୋଇଯାଇଛି । କିଛି ବିଏସ୍‌ଏଫ୍‌ ଯବାନ ଆଜି କାଶ୍ମୀରରେ ପହଞ୍ଚିଛନ୍ତି । ୧୪ ବର୍ଷର ବ୍ୟବଧାନ ପରେ ବିଏସ୍‌ଏଫ୍‌ ଯବାନମାନଙ୍କୁ ପୁଣି ଥରେ କାଶ୍ମୀରରେ ମୁତୟନ କରାଯାଇଛି । ହଠାତ୍‌ ଏତେ ସଂଖ୍ୟକ ଯବାନଙ୍କୁ ସେଠାକୁ ପ୍ରେରଣ କରାଯିବାର କାରଣ ସମ୍ପର୍କରେ କିଛି କୁହାଯାଇନାହିଁ । ତେଣୁ ଏହାକୁ ନେଇ ଅନେକ କଳ୍ପନାଜଳ୍ପନା ପ୍ରକାଶ ପାଉଛି । କିଛି ଲୋକ ମତ ଦେଉଛନ୍ତି କି ଏହା ରାଜ୍ୟରେ ଧାରା ୩୫(କ) ଏବଂ ଧାରା ୩୭୦କୁ ରଦ୍ଦ କରାଯିବାର ପ୍ରସ୍ତୁତି । କେନ୍ଦ୍ର ସରକାର ଏହି ଦୁଇ ଧାରାକୁ ରଦ୍ଦ କରିବା ପାଇଁ ସ୍ଥିର କରିସାରିଛନ୍ତି । କିନ୍ତୁ ଏହାଯୋଗୁ କାଶ୍ମୀରରେ ପରିସ୍ଥିତି ବିଗିଡ଼ିବାର ଆଶଙ୍କା ଥିବାରୁ ସରକାର ଏଭଳି ପଦକ୍ଷେପ ନେଇଛନ୍ତି । ସେହିପରି ପୁଲୱାମା ବିସ୍ଫୋରଣ ପରେ ସରକାର ବିଚ୍ଛିନ୍ନତାବାଦୀଙ୍କ ଉପରେ ଚଢ଼ାଉ ଆରମ୍ଭ କରିଥିବାରୁ ତାହାଯୋଗୁ ସେଠାରେ ଆଇନଶୃଙ୍ଖଳା ପରିସ୍ଥିତି ଉପୁଜିପାରେ । ତେଣୁ ଏତେସଂଖ୍ୟକ ଯବାନଙ୍କୁ ପ୍ରେରଣ କରାଯାଉଛି ବୋଲି ମଧ୍ୟ ମତ ପ୍ରକାଶ ପାଇଛି । କିନ୍ତୁ ଆଜି ରାତିରେ ସ୍ୱରାଷ୍ଟ୍ର ମନ୍ତ୍ରଣାଳୟ ସୂତ୍ରରୁ କୁହାଯାଇଛି କି ଆଗାମୀ ନିର୍ବାଚନକୁ ଆଖି ଆଗରେ ରଖି ଅତିରିକ୍ତ ଯବାନଙ୍କୁ ସେଠାକୁ ପଠାଯାଇଛି । ଏହାକୁ ନେଇ କରାଯାଉଥିବା କଳ୍ପନାଜଳ୍ପନା ଯୋଗୁ କାଶ୍ମୀର ଘାଟିରେ ସାଧାରଣ ଲୋକେ ଆତଙ୍କିତ ହୋଇପଡିଛନ୍ତି ଏବଂ ବିଭିନ୍ନ ଅତ୍ୟାବଶ୍ୟକ ସାମଗ୍ରୀ ଘରେ ଠୁଳ କରୁଛନ୍ତି । ତେଣୁ ତେଜରାତି ଓ ଅନ୍ୟ କିଛି ଦୋକାନରେ ପ୍ରବଳ ଭିଡ଼ ଲାଗିଥିଲା । ସେହିପରି ପେଟ୍ରୋଲ ପମ୍ପଗୁଡିକରେ ଭିଡ଼ ପରିଲକ୍ଷିତ ହୋଇଥିଲା ।

ଧାରା ୩୫(କ) ଉପରେ ସୋମବାର ଶୁଣାଣି
ଜମ୍ମୁ-କାଶ୍ମୀରର ଲୋକଙ୍କୁ ସ୍ୱତନ୍ତ୍ର କ୍ଷମତା ପ୍ରଦାନ କରୁଥିବା ସମ୍ବିଧାନର ଧାରା ୩୫(କ) ଉପରେ ସୁପ୍ରିମକୋର୍ଟରେ ସୋମବାର ଶୁଣାଣି ହେବାର ଅଛି । ଏହି ଧାରା ଯୋଗୁ ଭାରତର ଅନ୍ୟ ଭାଗର ଲୋକେ ଜମ୍ମୁ-କାଶ୍ମୀରରେ ସମ୍ପତ୍ତି କ୍ରୟ କରିପାରିବେ ନାହିଁ କି ସେଠାରେ ସ୍ଥାୟୀ ବାସିନ୍ଦା ପ୍ରମାଣପତ୍ର ପାଇପାରିବେ ନାହିଁ । ଏହାକୁ ରଦ୍ଦ କରିବା ପାଇଁ ଦାବି କରି ସୁପ୍ରିମକୋର୍ଟରେ ଜନସ୍ୱାର୍ଥ ମାମଲା ଦାୟର କରାଯାଇଛି । ଗଣମାଧ୍ୟମ ଏବଂ ସୋସିଆଲ ମିଡିଆରେ ଚର୍ଚ୍ଚା ହେଉଛି କି ସରକାର ଧାରା ୩୫(କ) ସହିତ ଧାରା ୩୭୦କୁ ରଦ୍ଦ କରିବାକୁ ପଦକ୍ଷେପ ନେଇପାରନ୍ତି । ଏହି ଦୁଇ ଧାରା ଯୋଗୁ ରାଜ୍ୟରେ ବିଚ୍ଛିନ୍ନତାବାଦ ଏବଂ ଆତଙ୍କବାଦ ମୁଣ୍ଡ ଟେକିଛି ବୋଲି ଅଧିକାଂଶ ମତ ଦେଉଛନ୍ତି । ତେଣୁ ମୋଦି ସରକାର ଏଗୁଡିକୁ ରଦ୍ଦ କରିବା ପାଇଁ ସୁପ୍ରିମକୋର୍ଟରେ ମତ ଦେଇପାରନ୍ତି ବୋଲି କୁହାଯାଉଛି ।

ସମ୍ବନ୍ଧିତ ଖବର