ନୂଆଦିଲ୍ଲୀ,୬ା୩(ଏଜେନ୍ସି): ଜେନେରାଲାଇଜ୍ଡ ସିଷ୍ଟମ୍ ଅଫ୍ ପ୍ରିଫରେନ୍ସେସ୍ (ଜିଏସ୍ପି) ବା ବ୍ୟାପକ ଅଗ୍ରାଧିକାର ବ୍ୟବସ୍ଥାକୁ ନେଇ ଆମେରିକା ନିଜ ଜିଦ୍ରେ ଅଟଳ ରହିଛି । ଭାରତକୁ ମିଳୁଥିବା ଜିଏସ୍ପି ସୁବିଧାକୁ ଏହା ପ୍ରତ୍ୟାହାର କରିନେବାକୁ ଯାଉଛି । ତେବେ ଭାରତ ଏହାର ପ୍ରତିବାଦ କରିବ ନାହିଁ ବୋଲି ଯେଉଁ ରିପୋର୍ଟ ପ୍ରକାଶ ପାଉଥିଲା, ତାହା ଭୁଲ ବୋଲି ଜଣାପଡ଼ିଛି । ଭାରତ ଏହାର ଜବାବ ଦେବ ବୋଲି କହିଛି । ସମ୍ଭବତଃ ଏପ୍ରିଲ୍ ୧ ତାରିଖରୁ ଆମେରିକାର ୨୯ ସାମଗ୍ରୀ ଉପରେ ଭାରତ ଟିକସ ପରିମାଣ ବଢ଼ାଇବ ବୋଲି ନିଷ୍ପତ୍ତି ନେଇଛି । ଜିଏସ୍ପି ସୁବିଧା ଜାରି ରଖିବା ପାଇଁ ଆମେରିକାକୁ ଗତବର୍ଷ ଅଗଷ୍ଟରେ ଭାରତ ଅନୁରୋଧ କରିଥିଲା । ଭାରତ ନିଜ ଯୁକ୍ତିରେ କହିଥିଲା କି ଆମେରିକାର ଜିଏସ୍ପି ସୁବିଧା ବଳବତ୍ତର ରହିବା ଦ୍ୱାରା ଦେଶର ଡାଉନ୍ଷ୍ଟ୍ରିମ୍ କମ୍ପାନିଗୁଡ଼ିକ ଭାରତରୁ ସ୍ୱଳ୍ପ ମୂଲ୍ୟରେ କଞ୍ଚାମାଲ ଓ ଅନ୍ୟ ସାମଗ୍ରୀ ହାସଲ କରିପାରିବେ । ଏହାଦ୍ୱାରା ଆମେରିକୀୟ କମ୍ପାନିଗୁଡ଼ିକ ଉଭୟ ଘରୋଇ ଓ ଅନ୍ତର୍ଜାତୀୟ ବଜାରରେ ଆଗୁଆ ରହିପାରିବେ । ଏହାପରେ ଭାରତ ବିଶ୍ୱ ବାଣିଜ୍ୟ ସଂଗଠନ (ଡବ୍ଲ୍ୟୁଟିଓ) ନିକଟରେ ଫେରାଦ ହୋଇଥିଲା । ଆମେରିକା ଅଧିକ ଫାଇଦା ପାଇଁ ମନମୁଖି ଭାବେ ଜିଏସ୍ପି ସୁବିଧାକୁ ପ୍ରତ୍ୟାହାର କରିନେବାକୁ ନିଷ୍ପତ୍ତି ନେଇଛି ବୋଲି ଏହା କହିଥିଲା । କିନ୍ତୁ ଆମେରିକା ନିଜ ଜିଦ୍ରେ ଅଟଳ ରହି ଜିଏସ୍ପି ପ୍ରତ୍ୟାହାର କରିବ ବୋଲି ଜଣାପଡ଼ିଛି । ବୈଦେଶିକ ମନ୍ତ୍ରାଳୟ ଅଧିକାରୀଙ୍କ କହିବାନୁଯାୟୀ ଆମେରିକାର ଚଣା, ମସୁର ଡାଲି, ୱାଲ୍ନଟ୍, ବୋରିକ୍ ଏସିଡ୍ ଓ ଅନ୍ୟ ନିଦାନ ଉପାଦାନ ଭଳି ସାମଗ୍ରୀ ଉପରେ ଟିକସ ପରିମାଣ ବୃଦ୍ଧି କରାଯିବା ପାଇଁ ପ୍ରସ୍ତାବ ରହିଛି । ଏହାଦ୍ୱାରା ଆମେରିକା ଉପରେ ୨୯ କୋଟି ଡଲାରର ବୋଝ ପଡ଼ିବ । ୨୦୧୮ ଜୁନ୍ରେ ଏହି ଟିକସ ବଢ଼ାଇବ ବୋଲି ଭାରତ କହିଥିଲା । କିନ୍ତୁ ଏହାକୁ ଲାଗୁ କରିନଥିଲା । କିନ୍ତୁ ଏପ୍ରିଲ୍ ୧ରୁ ଏହା କାର୍ଯ୍ୟକାରୀ କରାଯିବ ବୋଲି ସେ କହିଛନ୍ତି । ସୂଚନାଯୋଗ୍ୟ, ଗତବର୍ଷ ଭାରତର କେତେକ ନିର୍ଦ୍ଦିଷ୍ଟ ଇସ୍ପାତ ଓ ଆଲୁମିନିୟମ ଉତ୍ପାଦ ଉପରେ ଟାରିଫ୍ ପରିମାଣ ବଢ଼ାଇବ ବୋଲି ଆମେରିକା ଘୋଷଣା କରିଥିଲା । ତେଣୁ ଏହାକୁ ବିରୋଧ କରି ଆମେରିକାର କେତେକ ସାମଗ୍ରୀ ଉପରେ ଟିକସ ପରିମାଣ ବଢ଼ାଇବା ନେଇ ଧମକ ଦେଇଥିଲା । ଏହା ସେତେବେଳଠାରୁ ଲାଗୁ ହୋଇନଥିଲା । ଏବେ ଆମେ ଏପ୍ରିଲ୍ ୧ ପର୍ଯ୍ୟନ୍ତ ଅପେକ୍ଷା କରିବୁ । ଭାରତ ଯଦି ଜିଏସ୍ପି ବାବଦରେ ନିଜ ନିଷ୍ପତ୍ତିରେ କାଏମ ରହେ, ତେବେ ଆମେରିକାର ୨୯ ସାମଗ୍ରୀ ଉପରେ ଆମେ ଟିକସ ପରିମାଣ ବୃଦ୍ଧି କରିବୁ । ଉଲ୍ଲେଖଯୋଗ୍ୟ, ଆମେରିକାରୁ ଆମଦାନୀ ହେଉଥିବା ଆଣ୍ଠୁ ପ୍ରତିରୋପଣ ଉତ୍ପାଦ ଏବଂ ଷ୍ଟେଣ୍ଟ୍ ଭଳି ଉତ୍ପାଦକୁ ଭାରତ ଅତ୍ୟାବଶ୍ୟକ ଡାକ୍ତରୀ ଉପକରଣ ବିବେଚନା କରି ଏଗୁଡ଼ିକର ସର୍ବୋଚ୍ଚ ମୂଲ୍ୟ ସୀମା ଧାର୍ଯ୍ୟ କରିଛି । କମ୍ପାନିଗୁଡ଼ିକ ଏହାଠାରୁ ଅଧିକ ମୂଲ୍ୟରେ ଏଗୁଡ଼ିକୁ ଭାରତରେ ବିକ୍ରି କରିପାରିବେ ନାହିଁ । ଏହାଦ୍ୱାରା ଆମେରିକୀୟ କମ୍ପାନିଙ୍କ ବ୍ୟବସାୟ ପ୍ରଭାବିତ ହେଉଛି । ସେମାନେ ଏଥିରୁ ଅଧିକ ଆୟ କରିପାରୁ ନାହାନ୍ତି । ଏହି ସୀମାକୁ ହଟାଇବା ପାଇଁ ଆମେରିକା ଚାପ ପକାଉଥିବା ବେଳେ ଭାରତ ରାଜି ହେଉନାହିଁ ।
ୟୁପିରେ ୨ୟ ପର୍ଯ୍ୟାୟ ଭୋଟିଂରେ ଖୁବ୍ ହ୍ରାସ , ପ୍ରଥମ...