ଏସିଆର ସମସ୍ତ କରେନ୍ସି ଉପରେ ଭାରି ପଡିଲା ଭାରତୀୟ ଟଙ୍କା, ସାଧାରଣ ଖାଉଟିଙ୍କ ଉପରେ କଣ ପଡିବ ପ୍ରଭାବ? ପଢନ୍ତୁ…
ନୂଆଦିଲ୍ଲୀ, ୨୩|୧୨: ସାରା ବିଶ୍ୱର ବୃହତ ଅର୍ଥବ୍ୟବସ୍ଥାର ପ୍ରଚଳିତ କରେନ୍ସି ମୁକାବିଲାରେ ଭାରତୀୟ ଟଙ୍କା ମଜବୁତ ହୋଇଛି। ଆମେରିକା ଡଲାର ତୁଳନାରେ ଡିସେମ୍ବରରେ ଭାରତୀୟ ମୁଦ୍ରା ୧ ପ୍ରତିଶତ ମଜବୁତ ହୋଇଛି। ନ୍ୟୁଜ୍ ଏଜେନ୍ସି ବ୍ଲୁମବର୍ଗର ରିପୋର୍ଟ ଅନୁସାରେ, ଏସିଆରେ ବୃହତ ଅର୍ଥବ୍ୟବସ୍ଥାର କରେନ୍ସିରେ ଭାରତୀୟ ଟଙ୍କା ସବୁଠାରୁ ଭଲ ପ୍ରଦର୍ଶନ କରିଛି। ଅକ୍ଟୋବର ଓ ନଭେମ୍ବରରେ ଭାରତୀୟ ଟଙ୍କା ୧ ପ୍ରତିଶତରୁ ଅଧିକ ଦୁର୍ବଳ ହୋଇଥିଲା।
ଭାରତୀୟ ଟଙ୍କା ମଜବୁତ ହେଲେ ଏହାର ସିଧା ପ୍ରଭାବ ପେଟ୍ରୋଲ ଓ ଡିଜେଲ୍ ଦାମ୍ ଉପରେ ପଡିଥାଏ। କାରଣ ଭାରତ ନିଜ ଆବଶ୍ୟକତାର ୮୦ ପ୍ରତିଶତ ବିଦେଶରୁ କିଣିଥାଏ। ଏବେ ଭାରତୀୟ ତୈଳ କମ୍ପାନୀ ଅଶୋଧିତ ତୈଳ କିଣିବା ପାଇଁ କମ୍ ଅର୍ଥ ଖର୍ଚ୍ଚ କରିବେ। ଏହାର ଫାଇଦା ଗ୍ରାହକଙ୍କୁ ମିଳିବ।
ବ୍ଲୁମବର୍ଗ ଆହୁରି କହିଛି ଯେ, ଅକ୍ଟୋବର ଓ ନଭେମ୍ବରରେ ଭାରତୀୟ ଟଙ୍କା ସବୁଠାରୁ ଅଧିକ ଦୁର୍ବଳ ହୋଇଥିଲା। କିନ୍ତୁ କର୍ପୋରେଟ୍ ଟିକସ୍ ହ୍ରାସ ପାଇବା ପରେ ବିଦେଶୀ ନିବେଶକମାନେ ଭାରତୀୟ ସେୟାର ବଜାରରେ କାରବାର କରିଥିଲେ। ଏହାର ଫାଇଦା ଟଙ୍କାକୁ ମିଳିଥିଲା। ଏବେ ଆମେରିକୀୟ ଡଲାର ତୁଳନାରେ ଭାରତୀୟ ଟଙ୍କା ୭୧.୧୬ ସ୍ତରରେ ପହଁଚିଛି।
ସାଧାରଣ ଖାଉଟିଙ୍କ ଉପରେ କଣ ପଡିବ ପ୍ରଭାବ
ଭାରତୀୟ କମ୍ପାନୀ ନିଜ ଆବଶ୍ୟକତାର ୮୦ ପ୍ରତିଶତ ପେଟ୍ରୋଲିୟମ ଉତ୍ପାଦ ଆମଦାନୀ କରିଥାଏ। ଟଙ୍କା ମଜବୁତ ହେବା ପରେ ପେଟ୍ରୋଲିୟମ ଉତ୍ପାଦର ଆମଦାନୀରେ କମ ଅର୍ଥ ଖର୍ଚ୍ଚ ହେବ।ତୈଳ କମ୍ପାନୀ ପେଟ୍ରୋଲ୍ ଓ ଡିଜେଲର ମୂଲ୍ୟ କମ କରିପାରନ୍ତି।ଡିଜେଲ ଦାମ କମ ହେଲେ ଦରବୃଦ୍ଧି ହ୍ରାସ ପାଇବ। ଏପରିକି ଭାରତରେ ରନ୍ଧନ ତୈଳ ଓ ଡାଲି ଜାତୀୟ ଉତ୍ପାଦର ଦାମ କମିଯିବ।
