ନୂଆଦିଲ୍ଲୀ: ଇରାକୀ ଟିକ୍ଟକ୍ ଷ୍ଟାର ଓମ୍ ଫହାଦଙ୍କୁ ଗୁଳିକରି ହତ୍ୟା କରାଯାଇଛି । ପୂର୍ବ ବାଗଦାଗର ଜୋଜୌନ ଜିଲ୍ଲାରେ ଥିବା ତାଙ୍କ ଘର ବାହାରେ ତାଙ୍କୁ ଗୁଳିକରି ହତ୍ୟା କରାଯାଇଛି । ସର୍ଟ ଭିଡିଓ ତିଆରି ପ୍ଲାଟଫର୍ମ ଟିକଟକରେ ଭାଇରାଲ ଭିଡିଓ ତିଆରି ପାଇଁ ଜଣାଶୁଣା ଏହି ଷ୍ଟାରଙ୍କୁ କେହି ଜଣେ ଅଜ୍ଞାତ ଅପରାଧୀ ଗୁଳିକରି ହତ୍ୟା କରିଛି । ତେବେ ଘର ବାହାରେ ଅପରାଧୀ ଜଣକ କଳା ପୋଷାକ ଏବଂ ହେଲମେଟ ପିନ୍ଧି ମୋଟର ସାଇକେଲରେ ଜଗି ରହିଥିଲା । ଆଉ ଯେତେବେଳେ ଓମ୍ ଫହାଦ କଳା ରଙ୍ଗର ଏକ ଏସୟୁଭିରୁ ଓହ୍ଲାଇ ଘରକୁ ପ୍ରବେଶ କରୁଥିଲେ, ଠିକ୍ ଏହି ସମୟରେ ତାଙ୍କ ପାଖକୁ ଆସି ଅତି ନିକଟରୁ ତାଙ୍କୁ ଗୁଳି କରିଥିଲା । ଘଟଣାସ୍ଥଳରୁ ମିଳିଥିବା ସିସିଟିଭି କ୍ୟାମେରା ଫୁଟେଜରେ ହତ୍ୟାକାଣ୍ଡର ଏହି ଦୃଶ୍ୟ କଏଦ ହୋଇଛି । ଅଲ ଜଜିରା ରିପୋର୍ଟ ମୁତାବକ, ହତ୍ୟାକାଣ୍ଡର ପରିସ୍ଥିତିକୁ ଅନୁଧ୍ୟାନ କରିବା ପାଇଁ ଏହା ଏକ ଟିମ୍ ଗଠନ କରିଛି ବୋଲି ଅନ୍ତରୀଣ ମନ୍ତ୍ରଣାଳୟ କହିଛି ।
ଓମ୍ ଫହାଦଙ୍କ ପ୍ରକୃତ ନାମ ଘୁଫ୍ରାନ ସଓ୍ବାଦି । ସେ ଟିକଟକ୍ ଷ୍ଟାର ଭାବେ ଇରାକରେ ବେଶ୍ ପରିଚିତ ଥିଲେ । ଟିକଟକରେ ତାଙ୍କର ମିଲିୟନ ମିଲିୟନ ଫଲୋୟର୍ସ ଅଛନ୍ତି । ପୋପ୍ ମ୍ୟୁଜିକ୍ ରେ ନାଚୁଥିବା ଭିଡିଓ ସେୟାର କରି ଲୋକପ୍ରିୟ ହୋଇଥିଲେ । ଜାନୁଆରୀ ୨୦୨୩ରେ, ଇରାକ ଆଭ୍ୟନ୍ତରୀଣ ମନ୍ତ୍ରଣାଳୟ ଇରାକ ସମାଜରେ" ନୈତିକତା ଏବଂ ପାରିବାରିକ ପରମ୍ପରା"ର ସୁରକ୍ଷା ପାଇଁ ଏକ ପ୍ରୟାସରେ ଓମ ଫହାଦଙ୍କ ପରି ପ୍ରଭାବଶାଳୀ ବ୍ୟକ୍ତିଙ୍କ ଦ୍ୱାରା ଅନଲାଇନରେ ପୋଷ୍ଟ କରାଯାଇଥିବା "ଅଶ୍ଳୀଳ ତଥା ଆପତ୍ତିଜନକ ସାମଗ୍ରୀ" ଖୋଜିବା ପାଇଁ ଏକ କମିଟି ଆରମ୍ଭ କରିଥିଲା।
ଫେବୃଆରୀ ୨୦୨୩ ରେ, ତାଙ୍କୁ ଏକ କୋର୍ଟ ଦ୍ବାରା ୬ ମାସ କାରାଦଣ୍ଡରେ ଦଣ୍ଡିତ କରାଯାଇଥିଲା । କୋର୍ଟ କହିଥିଲେ ଯେ, ତାଙ୍କ ଭିଡିଓରେ "ଅଶ୍ଳୀଳ ଭାଷଣ ରହିଛି ଯାହା ଶାସନ ଏବଂ ସାଧାରଣ ନୈତିକତାକୁ କ୍ଷୁର୍ଣ୍ଣ କରିଥାଏ"। ତାଙ୍କର କିଛି ଭିଡିଓ ଏକ ମିଲିୟନରୁ ଅଧିକ ଭ୍ୟୁ ପାଇଛି ।
