ନୂଆଦିଲ୍ଲୀ ୧୮/୦୫: ଖୁବ୍ଶୀଘ୍ର ପ୍ରସ୍ତୁତ ହେବ ଇସ୍ରୋ (ଭାରତୀୟ ମହାକାଶ ଅନୁସନ୍ଧାନ ସଂଗଠନ)ର ନୂଆ ରକେଟ୍ । ଏହାର ଡିଜାଇନ୍ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ରକେଟ୍ର ନାଁ ‘ନେକ୍ସଟ୍ ଜେନେରେସନ ଲଞ୍ଚ୍ ଭେଇକଲ’ (ଏନ୍ଜିଏଲ୍ଭି) । ଏହା ଭାରୀ ମହାକାଶଯାନ ବହନକାରୀ ରକେଟ୍ ହେବ । ଦୀର୍ଘ ଦଶନ୍ଧି ଧରି ଇସ୍ରୋ ପାଇଁ କାମ କରୁଥିବା ପିଏସ୍ଏଲ୍ଭି ରକେଟ୍ର ସ୍ଥାନ ଏହା ନେବ ।
ରକେଟ୍ ପ୍ରସ୍ତୁତି ଲାଗି କେବଳ ସରକାରଙ୍କ ସବୁଜ ସଙ୍କେତକୁ ଇସ୍ରୋର ଅପେକ୍ଷା । ଏନ୍ଜିଏଲ୍ଭି ରକେଟ୍ ୩ ସୋପାନର ହେବ । ଏହା ୧୦ ଟନ୍ ପେଲୋଡ୍କୁ ଜିଓଷ୍ଟେସନାରୀ ଟ୍ରାନ୍ସଫର ଅର୍ବିଟ୍ରେ ପହଞ୍ଚାଇବ । ଅନ୍ୟ ରକେଟ୍ ତୁଳନାରେ ମଧ୍ୟ ଏହା ସୁଲଭ ହେବ । ଭବିଷ୍ୟତରେ ଇସ୍ରୋ ଏହା ମାଧ୍ୟମରେ ଭାରୀ ଯୋଗାଯୋଗ ଉପଗ୍ରହ ଉତ୍କ୍ଷେପଣ କରିପାରିବ । କାରଣ ଏବେ ଇସ୍ରୋ ପାଖରେ ଯେଉଁ ରକେଟ୍ ଅଛି, ତାହା ସର୍ବାଧିକ ୪-୫ ଟନ୍ର ଉପଗ୍ରହକୁ ଲଞ୍ଚ୍ କରିପାରୁଛନ୍ତି ।
ଏନ୍ଜିଏଲ୍ଭି ରକେଟ୍ ପୁନଃବ୍ୟବହାରଯୋଗ୍ୟ ରକେଟ୍ ହେବ । ଅର୍ଥାତ୍ ଏହାର କିଛି ଅଂଶକୁ ପୁନଃ ବ୍ୟବହାରଯୋଗ୍ୟ କରାଯାଇପାରିବ । ଏଥିପାଇଁ ରକେଟ୍ ଲଞ୍ଚ୍ର ମୂଲ୍ୟ କମିଯିବ । ଏହାର ଡିଜାଇନ୍ ମଡ୍ୟୁଲାର ହେବ, ଫଳରେ ଅଧିକ ମାତ୍ରାରେ ଏହାର ଉତ୍ପାଦନ ହୋଇପାରିବ । ଏହା ଦ୍ୱାରା ରକେଟ୍ର ରକ୍ଷଣାବେକ୍ଷଣ ସହଜ ହୋଇଯିବ । ଏଥିରେ ସେମି-କ୍ରାୟୋଜେନିକ୍ ପ୍ରପଲସନ୍ ସିଷ୍ଟମ୍ ରହିବ । ସେମି-କ୍ରାୟୋଜେନିକ୍ ପ୍ରପଲସନ୍ ସିଷ୍ଟମ୍ ଅର୍ଥାତ୍ ରିଫାଇଣ୍ଡ୍ କିରୋସିନ ଓ ତରଳ ଅମ୍ଳଜାନକୁ ଇନ୍ଧନ ରୂପେ ଉପଯୋଗ କରାଯିବ । ଏହି ଇନ୍ଧନ ଉପଯୋଗ ଜରିଆରେ ମଧ୍ୟ ଖର୍ଚ୍ଚ କମ୍ ହେବ । ଏନ୍ଜିଏଲ୍ଭିର ଉଚ୍ଚତା ୨୪୬ ଫୁଟ ହେବ । ବ୍ୟାସ ୧୬ ଫୁଟ ଏବଂ ଓଜନ ୬୦୦ ଟନ୍ରୁ ୭୦୦ ଟନ୍ ମଧ୍ୟରେ ହେବ । ଏହାର ଭିନ୍ନ ଭିନ୍ନ ପ୍ରକାର ନିର୍ମିତ ହେବ । ଏନ୍ଜିଏଲ୍ଭି ରକେଟ୍ ଲୋଅର୍ ଆର୍ଥ୍ ଅର୍ବିଟ୍ (ଲିଓ) ପର୍ଯ୍ୟନ୍ତ ୧୭ ହଜାରରୁ ୪୮ ହଜାର କିଲୋଗ୍ରାମ୍ର ଓଜନ ନେଇପାରିବ । ଅନ୍ୟପକ୍ଷେ, ଜିଓଷ୍ଟେସନ୍ନାରୀ ଟ୍ରାନ୍ସଫର ଅର୍ବିଟ୍ (ଜିଟିଓ) ପର୍ଯ୍ୟନ୍ତ ୮୫୦୦ରୁ ୨୪ ହଜାର କିଲୋଗ୍ରାମ୍ ପର୍ଯ୍ୟନ୍ତର ପେଲୋଡ୍କୁ ଏହା ପହଞ୍ଚାଇ ପାରିବ ।