ଜାପାନ, ୧୩/୦୪ : ଫୁକୁଶିମାର ରେଡିଓଆକ୍ଟିଭ୍ ୱାଟରକୁ ସମୁଦ୍ର ଭିତରକୁ ଛାଡିବାକୁ ନିଷ୍ପତ୍ତି ନେଇଛନ୍ତି ଜାପାନ ସରକାର। ଫୁକୁଶିମାର ୧୦ ଲକ୍ଷ ଟନର ରେଡିଓଆକ୍ଟିଭ୍ ୱାଟରକୁ ସମୁଦ୍ର ଭିତରକୁ ଛାଡିବାକୁ ଜାପାନର ପ୍ରଧାନମନ୍ତ୍ରୀ ୟୋଶିହିଦେ ସୁଗା ମଙ୍ଗଳବାର ମଞ୍ଜୁରି ଦେଇଛନ୍ତି। ଜାପାନ ସରକାରଙ୍କ ଏହି ନିଷ୍ପତ୍ତି ପରେ ପଡୋଶୀ ଦେଶ ଏବଂ ମତ୍ସଜିବୀମାନେ ଏହାକୁ ବିରୋଧ କରିଛନ୍ତି।

୨୦୧୧ ମାର୍ଚ୍ଚ ମାସରେ ହୋଇଥିବା ଭୂମିକମ୍ପ ଓ ସୁନାମୀ କାରଣରୁ ଫୁକୁଶିମାରେ ପରମାଣୁ କାରଖାନା ନଷ୍ଟ ହୋଇଯାଇଥିଲା। ଏହାପରେ ଜାପାନର ବିଜୁଳି କମ୍ପାନୀ ଟୋକିଓ ଇଲେକ୍ଟ୍ରିକ୍ ପାୱାର କମ୍ପାନୀ ନିକଟରେ ୧୦ ଲକ୍ଷ ଟନରୁ ଅଧିକ ରେଡିଓଆକ୍ଟିଭ୍ ୱାଟର ଜମା ହୋଇଗଲା। ଯାହାକୁ ଏବେ ଜାପାନ ସରକାର ସମୁଦ୍ରରେ ଛାଡିବାକୁ ମଞ୍ଜୁରୀ ଦେଇଛନ୍ତି। ତେବେ ସରକାରଙ୍କ ଏହି ନିଷ୍ପତ୍ତି ପରେ ସ୍ଥାନୀୟ ମତ୍ସଜିବୀ, ଦକ୍ଷିଣ କୋରିଆ ଠାରୁ ନେଇ ଫିଲିପାଇନ୍ସ ଏବଂ ଚୀନ ଏହାକୁ ବିରୋଧ ପ୍ରଦର୍ଶନ କରିଛନ୍ତି।

ସେପଟେ ରେଡିଓଆକ୍ଟିଭ୍ ୱାଟରକୁ ସମୁଦ୍ର ଭିତରକୁ ଛାଡିବା ପୂର୍ବରୁ ଏଥିରୁ ସମସ୍ତ ଆଣବିକ ତତ୍ତ୍ଵକୁ ବିଲୋପ କରାଯାଉଛି ଏବଂ ଅନ୍ତରାଷ୍ଟ୍ରୀୟ ପରମାଣୁ ଉର୍ଜା ଏଜେନ୍ସି ଏହାକୁ ସମର୍ଥନ କରୁଛି ବୋଲି ଏନେଇ ଜାପାନ ସରକାର ସ୍ପଷ୍ଟୀକରଣ ଦେଇଛନ୍ତି। ଫୁକୁଶିମାରେ ଜମା ହୋଇଥିବା ୧୦ ଲକ୍ଷ ଟନର ରେଡିଓଆକ୍ଟିଭ୍ ୱାଟର ଗତ ଏକ ଦଶକ ହେବ ଚର୍ଚ୍ଚାର କେନ୍ଦ୍ରବିନ୍ଦୁ ରହିଛି। ଦକ୍ଷିଣ କୋରିଆ ଫୁକୁଶିମାରୁ ଆସୁଥିବା ସିଫୁଡ ଉପରେ ପ୍ରତିବନ୍ଧକ ଲଗାଇଛି। ଗତ ବର୍ଷ ଦକ୍ଷିଣ କୋରିଆ ଜାପାନ ଠାରୁ ଏନେଇ ସ୍ପଷ୍ଟୀକରଣ ମଧ୍ୟ ମାଗିଥିଲା।

ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଜାପାନ ସରକାରଙ୍କ ପରାମର୍ଶକମାନେ ରେଡିଓଆକ୍ଟିଭ୍ ୱାଟରକୁ ସମୁଦ୍ର ମଧ୍ୟକୁ ଛାଡିବା ପାଇଁ ପ୍ରସ୍ତାବ ଦେଇଥିଲେ। ଏହାକୁ ଜାପାନ ସରକାର ମଞ୍ଜୁରୀ ଦେଇଛନ୍ତି। ଏହି ପାଣି ଏବେ ଟ୍ୟାଙ୍କର ଗୁଡିକରେ ଗଛିତ ହୋଇ ଅଛି। ତେବେ ଏଥିରେ ପୁଣି ଦୈନିକ ୧୭୦ ଟନର ଜଳ ମିଶ୍ରିତ ହେଉଛି। ଯଦି ଏହି ଭଳି ଚାଲିବ ତେବେ ୨୦୨୨ ସୁଦ୍ଧା ଆଉ ପାଣି ରଖିବା ପାଇଁ ସ୍ଥାନ ବଞ୍ଚିବ ନାହିଁ।