PRAMEYA

Prameya News Portal, Prameya Daily, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • ଦେବଗଡ : ରିଆମାଳ ରେଞ୍ଜ ନୁଆଁଡିହି ସେକ୍ସନ ଖିଲେଇ ଜଙ୍ଗଲରେ ହାତୀ ଆକ୍ରମଣ ଯୋଗୁଁ ବନ ଶ୍ରମିକ ଗୁରୁତର
  • ||
  • କୋଣାର୍କ : ରୋଗ କଷ୍ଟ ସହିନପାରି ସ୍କୁଲ ହତାରେ ଆତ୍ମହତ୍ୟା କଲେ ବୃଦ୍ଧ
  • ||
  • ଭୁବନେଶ୍ଵର : ରାଜ୍ୟରେ ଆଉ ୪ ଜଣଙ୍କ ଜୀବନ ନେଲା କରୋନା, ମୃତ୍ୟୁ ସଂଖ୍ୟା ୮୧୫୦କୁ ବୃଦ୍ଧି
  • ||
  • ଭୁବନେଶ୍ୱର : ରାଜ୍ୟରେ ଉପର ତଳ ହେଉଛି କରୋନା ଗ୍ରାଫ୍, ୨୪ ଘଣ୍ଟାରେ ଚିହ୍ନଟ ହେଲେ ୭୩୪ ପଜେଟିଭ୍
  • ||
  • ନୀଳଗିରି : ମାଡ଼ିଆସୁଛନ୍ତି ନୀଳଗିରି ଆଡକୁ ଝାଡ଼ଖଣ୍ଡ ହାତୀ, ଚାଷୀ ଆତଙ୍କିତ
  • ||
  • କଳାହାଣ୍ଡି : ପୋଖରୀରେ ବୁଡି ୨ ଶିଶୁ ମୃତ
  • ||
  • ଜଳେଶ୍ଵର : ବିପଦ ସଂକେତ ଉପରେ ପ୍ରବାହିତ ହେଉଛି ଜଳକା, ବନ୍ୟା ପାଣି ଘେରରେ ୧୦ରୁ ଉର୍ଦ୍ଧ୍ଵ ଗ୍ରାମ
  • ||
  • ଲମତାପୁଟ : ଅଟୋରୁ ୧୦ ଲକ୍ଷ ଟଙ୍କାର ଗଞ୍ଜେଇ ଜବତ, ଗାଡି ଛାଡି ୨ ମାଫିଆ ଫେରାର୍
  • ||

‘କାଳିଆ’, ‘କିଷାନ’, ‘ନ୍ୟାୟ’ର ଲୋଭ; ଏଥର କିଏ ହେବ ଗେମ୍‌ ଚେଞ୍ଜର ଜାଣନ୍ତୁ…

ଭୁବନେଶ୍ୱର,୧୨ା୪(ବ୍ୟୁରୋ): ଭୋଟ ପୂର୍ବରୁ ସବୁ ଦଳ ଭୋଟରଙ୍କୁ ଆକୃଷ୍ଟ କରିବା ପାଇଁ ବେଶ୍‌ ଲୋଭନୀୟ ଯୋଜନା ଫିଙ୍ଗିଛନ୍ତି । ଆମର ‘କାଳିଆ’ ଯୋଜନା । ତା’ ସାଂଗକୁ ବିଜୁ ସ୍ୱାସ୍ଥ୍ୟ ଯୋଜନା, ମିଶନ ଶକ୍ତି ଏମିତି ଅନେକ ରହିଛି । ଆମକୁ ଭୋଟ ଦେଲେ ଲାଭରେ ରହିବ । ବିଜେଡି ଏମିତି ଯୋଜନା ଦ୍ୱାରା ଲୋଭ ଦେଖାଉଛି ଭୋଟରଙ୍କୁ । ବିଜେପି ବି ପଛରେ ପଡ଼ିନାହିଁ । ବିଜେପି କହିଛି, ଆମର ‘ପିଏମ୍‌ କିଷାନ୍‌’ ଯୋଜନା, ‘ଉଜ୍ଜ୍ୱଳା’ ସାଙ୍ଗକୁ ‘ଆୟୁଷ୍ମାନ ଭାରତ’ ଯୋଜନା ଲୋକଙ୍କୁ ସବୁଠୁ ଅଧିକା ଲାଭରେ ରଖିବ । ଏମାନଙ୍କଠାରୁ କଂଗ୍ରେସ ଆହୁରି ଆଗେଇଯାଇ ‘ନ୍ୟାୟ’ ଯୋଜନା ନିର୍ବାଚନ ମାର୍କେଟକୁ ଛାଡ଼ିଛି । କଂଗ୍ରେସ କହିଛି, ‘ନ୍ୟାୟ’ ଯୋଜନା ଦେଶରେ ନୂଆ ଇତିହାସ ସୃଷ୍ଟି କରିବ ।

ବିଜୁ ଜନତା ଦଳ ସହ ବିଜେପି ଓ କଂଗ୍ରେସର ପୂର୍ଣ୍ଣ ଭରସା ଯେ ଆମର ଏସବୁ ଅଭିନବ ଯୋଜନା ଓ କାର୍ଯ୍ୟକ୍ରମ ଭୋଟ ମଇଦାନରେ ‘ଗେମ୍‌ଚେଞ୍ଜର’ ଭଳି କାମ କରିବ । ଜନତା ଜନାର୍ଦ୍ଦନ ଏହି ଯୋଜନାରୁ ହିଁ ଦଳକୁ ଭରସା କରିବେ, ଭୋଟ ଦେବେ । ଏସବୁ ଯୋଜନା ଡଙ୍ଗାରେ ଆମେ ନିର୍ବାଚନ ବୈତରିଣୀ ପାର୍‌ ହୋଇଯିବୁ ।

ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭୋଟ ପୂର୍ବରୁ ତାଙ୍କ ପ୍ରସୂତ ଏସବୁ ଯୋଜନାର ମାର୍କେଟିଂ କରିବା ପାଇଁ ସାରା ଓଡ଼ିଶା ଖେଦିସାରିଛନ୍ତି । ସୁନ୍ଦରଗଡ଼ରୁ ଗଜପତି, ଖୋର୍ଦ୍ଧାରୁ ମୟୂରଭଞ୍ଜ ଭୋଟ ବିଜ୍ଞପ୍ତି ପୂର୍ବରୁ ସବୁଠି ପ୍ରଚାର କରିଛନ୍ତି । ସେ ରାଜ୍ୟ ସରକାରଙ୍କ ସଫଳତାକୁ ଲୋକଙ୍କ ଆଗରେ ରଖୁଛନ୍ତି, କେନ୍ଦ୍ରର ବିଫଳତାକୁ ମଧ୍ୟ ଟାର୍ଗେଟ୍‌ କରୁଛନ୍ତି । ‘କାଳିଆ’ ଯୋଜନାରେ ୪୦ ଲକ୍ଷ ଚାଷୀ ଉପକାର ପାଇଲେଣି । ଆଉ ୨୫ ଲକ୍ଷ ଚାଷୀଙ୍କ ତାଲିକା ତିଆରି ହୋଇଛି । ମୋ ସରକାରର ପ୍ରଥମ ଦିନ ଦି କିସ୍ତି କାଳିଆ ଟଙ୍କା ମିଳିବ । ବିଜେଡି ଭୋଟବ୍ୟାଙ୍କ ପାଇଁ ‘କାଳିଆ’ ଅମୋଘ ଅସ୍ତ୍ର ପାଲଟିବ ବୋଲି ଦଳ ଅନୁମାନ କରୁଛି । ତା’ଛଡ଼ା ମିଶନ ଶକ୍ତି ଯୋଜନାରେ ମହିଳା ସ୍ୱୟଂ ସହାୟକ ଗୋଷ୍ଠୀଙ୍କୁ ୧୫ ହଜାର ଟଙ୍କାର ସିଡ୍‌ ମନି, ସ୍ମାର୍ଟ ଫୋନ ସହ ବିନା ସୁଧରେ ଋଣ । ବିଜୁ ବାହିନୀ ଯୁବକଙ୍କୁ ବିଦେଶ ଭ୍ରମଣ, ଲୋକସଭାରେ ମହିଳାଙ୍କୁ ୩୩% ପ୍ରାର୍ଥୀତ୍ୱ ଆଦି ଭୋଟ ଭିଡ଼ିବାରେ ବେଶ୍‌ ସହାୟକ ହେବ ।

ବିଜେପି ମଧ୍ୟ ନିଜର ଅଭିନବ ଯୋଜନା ମାଧ୍ୟମରେ ଲୋକଙ୍କ ନିକଟରେ ପହଞ୍ଚୁଛି । ଦଳ ପକ୍ଷରୁ ‘ପ୍ରଧାନମନ୍ତ୍ରୀ କିଷାନ ଯୋଜନା’କୁ ଢେର ଫୋକସ୍‌ କରାଯାଉଛି । ଏହି ଯୋଜନାରେ ୨ ହେକ୍ଟର ପର୍ଯ୍ୟନ୍ତ ଚାଷଜମି ଥିବା ଦେଶର ପ୍ରତିଟି ଚାଷୀ ବାର୍ଷିକ ୬,୦୦୦ ଟଙ୍କାର ଆର୍ଥିକ ସହାୟତା ପାଇବେ । ହିତାଧିକାରୀଙ୍କ ବ୍ୟାଙ୍କ ଖାତାକୁ ୩ଟି କିସ୍ତିରେ ୨,୦୦୦ ଟଙ୍କା ଲେଖାଏଁ ପାଣ୍ଠି ସ୍ଥାନାନ୍ତର କରାଯିବ । ଏହି ଯୋଜନାକୁ ନେଇ କେନ୍ଦ୍ର ଓ ରାଜ୍ୟ ମଧ୍ୟରେ ଠେଲା ପେଲା ଚାଲିଛି । ମାତ୍ର ଏ ଯୋଜନା ବିଜେପି ପାଇଁ ଫାଇଦା ଆଣିବ ବୋଲି ଦଳ ଆଶା ବାନ୍ଧିଛି । ଓଡ଼ିଶା ବିଜେପି ପାଇଁ ‘ଉଜ୍ଜ୍ୱଳା’ ଯୋଜନା ଆଶ୍ଚର୍ଯ୍ୟଜନକ ଫଳ ଆଣିପାରେ ବୋଲି ଦଳ ଆଶା ବାନ୍ଧିଛି । ଏହି ଯୋଜନାରେ ରାଜ୍ୟରେ ୪୦ ଲକ୍ଷ ପରିବାରକୁ ମାଗଣାରେ ରନ୍ଧନ ଗ୍ୟାସ୍‌ ଯୋଗାଇ ଦିଆଯାଇଛି । ଏହି ଯୋଜନା ବିଜେପିର ହାଣ୍ଡିଶାଳ ଭୋଟକୁ ବେଶ ସୁରକ୍ଷିତ କରି ରଖିବାରେ ସହାୟକ ହେବ ବୋଲି ଦଳ ଆଶା ବାନ୍ଧିଛି । ସେହିଭଳି ‘ଆୟୁଷ୍ମାନ ଭାରତ ଯୋଜନା’ ଓ ‘ପ୍ରଧାନମନ୍ତ୍ରୀ ଶ୍ରମ ଯୋଗୀ ମାନଧନ (ପିଏମ୍‌-ଏସ୍‌ୱାଇଏମ୍‌) ଯୋଜନା’ରେ ଶ୍ରମିକଙ୍କୁ ମାସକୁ ୩ହଜାର ଟଙ୍କାର ପେନ୍‌ସନ ବଣ୍ଟନ ମଧ୍ୟ ବିଜେପି ପାଇଁ ଭୋଟ ଭିଡ଼ିବ ବୋଲି ପଦ୍ମ ଶିବିର ଆଶାବାଦୀ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ ବାରମ୍ବାର ଓଡ଼ିଶା ଆସି ଏସବୁ ଯୋଜନାକୁ ଭୋଟରଙ୍କ ମୁଣ୍ଡରେ ପୂରାଇବାକୁ ଚେଷ୍ଟା କରୁଛନ୍ତି ।

କଂଗ୍ରେସ ବି ନିଜ ମଡେଲ ଯୋଜନାକୁ ଭୋଟରଙ୍କ ପାଖରେ ରଖିଛି । ଯେଉଁ ଯୋଜନା ବଳରେ ଦଳ ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡ଼ ଦଖଲ କରିଛି ସେହି ଯୋଜନାକୁ ଅସ୍ତ୍ର କରି ଦେଶ ଦଖଲ କରିବାକୁ କଂଗ୍ରେସ ଟାର୍ଗେଟ କରିଛି । ଓଡ଼ିଶାକୁ ପ୍ରଚାରରେ ଆସି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ପଡ଼ୋଶୀ ଛତିଶଗଡ଼ ମଡେଲକୁ ଓଡ଼ିଶାରେ କାର୍ଯ୍ୟକାରୀ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି । ଧାନ ଏମ୍‌ଏସ୍‌ପିରେ କୁଇଣ୍ଟାଲ ପିଛା ୨୬୦୦ ଟଙ୍କା ମିଳିବ । ଚାଷୀଙ୍କ କୃଷିଋଣ ଛାଡ଼ କରାଯିବ । ଏ ପ୍ରଚାରର ପ୍ରଭାବ ମଧ୍ୟ ଚାଷୀକୁଳ ଉପରେ ପଡୁଥିବା କଂଗ୍ରେସ କହୁଛି । ସେହିଭଳି ରାହୁଲଙ୍କ ବାର୍ଷିକ ନ୍ୟୁନତମ ନୂଆ ଯୋଜନା ‘ନ୍ୟାୟ’କୁ ମଧ୍ୟ ଦଳ ଜୋରଦାର ପ୍ରଚାର କରୁଛି । ଏଥିରେ ଗରିବ ପରିବାରକୁ ବାର୍ଷିକ ୭୨ ହଜାର ଟଙ୍କା ଦେବାକୁ ଦଳ ପ୍ରତିଶ୍ରୁତି ଦେଉଛି ।
ଭୋଟର କେଉଁ ଯୋଜନା ଲୋଭରେ କାହାକୁ ଭୋଟ ଦେଉଛନ୍ତି ତାହା ଆଗାମୀ ଦିନରେ ଜଣାପଡ଼ିବ ।